Read Fore 2 Korinti 2 Bible Online

2 Korinti 2 - Fore bible

2 Korinti 2

¹Piya, naeba tigeti wama tinta ataena to kake aborarimisanaga napima kampa wantone. Kampaye.

²Piya, naenepa tinta ata puritakiripa, aeꞌnagita nae nantaba asoya punatakibewe, a. Piya, tige asoya punatakibeꞌnagitipa, nana piyema naeba tige tintaba ata puritakuwe, a. Pipa kampaye.

³Piya, naeba wakiripa, tigeba asoya punatakibeꞌnagitipa nanta ataena aboranamisanaga naeba arupu puritakena isaꞌnepa pai kaerimintone. Piya, naeba tigekaba mayama napintone: Nae nantawamaba asoya pegina tige tintawamaba kaga asoya piyema, napintone.

⁴Piya, nae nantawamaba tigekaba tabera nauki nakiyena pegina kunta nabegi tabera kubeꞌena puma marusa isapa kaema timintone. Piya, tinta ata puritakena wanane. Agu kaoꞌenanepa tigeti tabera waintegi, piꞌna aborarimikenaga kaema timintone. Aguntaena maegainti ntagaraba to kake tiyoꞌena potaiyo

⁵Pigoya, kaꞌwaina tinta kuntaena aborarimemipa, aeba naeꞌamana nane. Tigeti kuntuyena aborarimintiye. We, aꞌyugu naeba esegi kamanapa uwa yuwa, aeba tigetibe naetibe kaga kaꞌisa kuntuyenaba aboraramintiyema, yuwe.

⁶Pigoya, aeba agu aꞌwae piya, antotaꞌenawa tikabitakenaenaripa tigeba aꞌyaꞌma uwa ataiyo. Pipa pabigoye.

⁷Piya, ibaba tigeba aꞌwae puma asuꞌa potama to kakema tiyoꞌena potaiyo. Eya, tabe kuntuyenama aerarikaesanaga to kakema tiyoꞌena potaiyo.

⁸Pika naeba to kakema agu kaoꞌenaripa aboramiyoma, esuritauwe.

⁹Piya, aꞌyaꞌmaenagaba tigeba kanara nawamupa wasiyewo, kampayoma abisanaga esa paipa kaentone.

¹⁰Piya, tigeba kaꞌwaina kaintana atunkapa agaikibepa, pipa naegeba kaga agaikuwe. Piya, kainto kaintanaba pipa naeba Karaisiti nkaobi kaintone. Eya, tige tiyoꞌmaekenaga pabiyama kaintone.

¹¹Pipa Satani tamiyo pusanaga piyaba puntone. We, aeba ata puratakena napiyaba miye. Pikaba taeba aiboꞌenaba kampa puma, kabiyeno. Poroba Torowasi kumata kuntaena abuntiye

¹²Paipa naeba Karaisiti nkawaga kamana ukenaga Torowasi kumata ampa irosauwagana, Waꞌegawamaba kepa pita iꞌnatantiye.

¹³Aiboga, naꞌnanto Taitasipa pi kumatapa kampa agauwagana naumanempaba pikaba kampa aogima pasema mintantiye. Piya poga, naeba Torowasi kinapa igaite Masetoniya mari kanantuwe. Koti nkesegiyenaba asugaikenaenawe

¹⁴Pigoya, Koti aeba Karaisiti ntugarasa paitaratagi, kama kinatepa igasune. Pikaba taꞌmu potano. Piya, aeba yogaretaka uratagini wasanami tae yugarasa Karaisitipa agagana, aogi aguntaena aꞌyaꞌma mariba piꞌnaba piye.

¹⁵Eya, taeba aogi agunta kanta puma miyokana Karaisitiba kaeyagina Kotiti iye. Pi nkaguntamaba iꞌikena peꞌnagi nkikapi aboramagina, kaiwaitakena peꞌnagi nkikapipa kaga aboraye.

¹⁶Piya, agora purikibe kinaꞌmitiba pipa ata purikena agunta kanta puma aboraye. Piya, to kaꞌisa kinaꞌmitiba, eꞌwasa maenta kinaꞌmitiba pipa aogi eꞌwasa agunta kanta puma aboraye. We, pi ntugaba ke pekana kanarasakiye, a.

¹⁷We, taeba kaꞌisa uwaena kina kantaba kampaye. Ige Koti kamanatasa pisinisi yugawaipa pesapa kampa pune. Kampaye. Taeba tagantana pompeka Kotiba yogaretapa utaratagi, taeba Karaisititi atokaema Koti nkaobipa kamanaꞌwapa taga uma aboraune.