Read Fore 2 Korinti 3 Bible Online

2 Korinti 3 - Fore bible

2 Korinti 3

¹We, taeka: Igewai asagayukena pewema, napiyewa, a. Taeba kaꞌisa kina pesa puma, wasanami tage asagayuntini isa kaema tamigi tiyakisuna, a. Tage asagayukena isa tigeba kaema tamigi wasanaba iyakisuwa, a.

²Pipa kampaye. Tagegaꞌe asagayukena isapa tigewe. Piya isapa kaemarantapa, tigupi waiyegini, aꞌyaꞌma kinaꞌmiba ago agama aisumagini taekaba aogima abewe.

³Piya, taeba tigeti yoga pokiri, Karaisiti nkisaꞌena puguna piꞌna nkagowapa arantiye. Piya, pi nkisapa inkirasa wanane. Pipa eꞌwasa Koti Nkawamusatasa kaemarantine. We, yaba nkisata nane. Wasana igupi kaemarantine.

⁴Piya, pi yo kamanaꞌama nkagoba mayamawe: Taeba Karaisiti ntugarasa Kotiti atokaema tara tagiba kampa napiyune. Kampaye.

⁵We, pi ntugarapa tae esegiyena kampa waintegi, tae tayapisa taeba kaꞌenaba kampa uwa abae puma pune. Kampaye. Koti ae abintowa esegiyenawapa tamegi yogarepa abae puma pune.

⁶Eya, Koti aeba kasaꞌena utaratamagina taepa pi kasa monotapa yoga kina urataye. Piya, pai yaba nkisata kaemaranti ago kamana nane. Awamusatasa kasa mono aborama pi ntugara utarataye. Eya, pai yaba nkisata kaemaranti kamanaꞌamaba wasanaba aeguma kaiye. We, Awamusaꞌamaba kasaꞌena aborama wasanamipa aoganta eꞌwasaba imiye.

⁷Pigoya, paipa Koti aeba ago kamanaꞌwapa yaba nkisata kaema imogana, iwaꞌenawaimpa aogiyenaba puntine. Eya, pi ntagaba Koti nkeꞌwasaenamaba Mosese nkaowabipa eꞌwasa puwantiye. Piya, pi nkeꞌwasaba nagarikena pogini, Isureyo kinaꞌmiba aowabi kampa uwa aganta parokaentawe. We, pi paisa ago kamanapa aogi iwaꞌenabisa aboramagina purikenaenamaba arawantiye.

⁸Aibogana, Awamusaꞌama aborami aogantaꞌenamaba iwaꞌena taberakaꞌyapisa aboraye. Pipa to awametane.

⁹Eya, ata ikantaga kamana aboranti ntagaba eꞌwasaenaba puntegina, we, arupu puratakena kamana aborai ntagaba eꞌwasaenawapa tabera asugasima waiye.

¹⁰We, pikaba maya yuwe: Kasaꞌenaba eꞌwasarakaꞌyane. Piya, paipa eꞌwasaenara aborantintanaba ibaba eꞌwasaena kampa wainta kanta puma waiye. Eya, kasaꞌenamaba paisaenaba asugasima tabera eꞌwasaba piye.

¹¹Eya, nagarikenaba aeba eꞌwasaenayaga pai aborantiye. We, waiyaba mikenaba aeba tabe eꞌwasaenayaga waiyegina kanarasaye.

¹²Piya, Koti utaratanti waiyaba mikenaenagaba taeba aobi puma miyompeka taeba kampa taekuruba pune. Kampaye.

¹³We, taeba Mosese puntemisapa kampa pune. Piya, aeba kai atutasa aowabipa aerarikaetama, Isureyo kinaꞌmiba eꞌwasaenawa nagarikena pogana agaigina ani pusanaga kakantiye.

¹⁴Piya, napiyenawaipa akumpa esegi puwaitagini igeba paisa utawaitanta ago kamana aisepa, agowapa kampa aogima ntapiyewe. Kampaye. Piya, kana kai atupa iyora uwa waintegini kampa maegasima agawe. Kampaye. We, wasanamitaba Karaisititi atokaeyakana maegasaka agakune. To kipa kampaye.

¹⁵Eya, igeba paipe ibasa kanabipe Mosese kaemaranti kamana aisepa, kai atunkama napiyenawaipa aerarikaeyagini kampa napiyewe.

¹⁶Aibegina, kaꞌwaina agu aꞌwae puma Waꞌegawamati atokaeyamipa, pi kai atupa maegasagina agaye.

¹⁷We, Waꞌegaba aeba Awamusane. Piya, Waꞌegawama Nkawamusaꞌamaba kaꞌwainati miyegina, kaꞌenamaba pi ntagaraba kampa arakuriye. Kampaye. Aeba aogima uwa miye.

¹⁸Pigoya, aogima uwa miyompe kinaꞌmite taowabisa kaiba ago maegasagi agaune. Piya, Waꞌegawama nkeꞌwasaenamaba taeti aboragi pemonta kanta puma pakasa piye. Eya, aꞌyaꞌma yagaba tagu aꞌwae puta iyegi, taeba eꞌwasaenawapa maeta ima ae kanta puma aborakena pune. Piya, Waꞌega, aeba Awamusaꞌama, aeba piyaba purataye.