Read Fore 2 Korinti 4 Bible Online

2 Korinti 4 - Fore bible

2 Korinti 4

¹Pigoya, Kotiba antaraꞌena aboraramima aeꞌwa nkago aborakena yugarapa uratantegi, pika kampa taekitaba pune.

²Piya pumagita, kakakena tanintanaba takabigasima kumpari kipa kampa nasima, Koti kamanapa kampa antageꞌena potaune. Kampaye. Taeba Koti nkaobi taga kamanatakaꞌya uma aborakini aꞌyaꞌma kinaꞌmiba yogarepa agamagini taeka intabaipintiba aogima ntapiyewe.

³Piya, kana mono yompepa, pipa igaikena kinaꞌmi nkiyobinkamana kakasu piye.

⁴Eya, mampabisa ama koti aeba kampa imatiti pe kinaꞌmi ntapiyenawaipa airarikaewaitamagina, Karaisiti nkeꞌwasaenama nkawaga kamanaꞌama igupipa ubasegini Koti nkaraꞌenawapa agasanaga airarikaewaitaye. Piya, Karaisiti aeba Koti nkamatakaꞌyane.

⁵We taeba mono urimompepa, pipa taerekaba kampa urimune. Kampaye. Isu Karaisiti aeba Waꞌega miyegi, taeba Isuka kayokaya kinati mpiyune, pipa urimima miyune.

⁶Piya, Koti aeba paitakaꞌya: Tununtanabisa arao, yogana arantiye. Pi unti Koti nkeꞌwasaenawampaba ibaba tagupi araye. Eya, Koti nkeꞌwasaenamaba Karaisiti nkaobisa aboragi agabebe pune.

⁷Piya, taeba magabu kanta puma miyokana, pi mantabintisa eꞌwasaba tantabaipi waiye. Piya, taetisa aogiyenaba aboramipa pipa taeꞌena wanane. Aeba Koti nkesegiyenarakaꞌya tae tauta aboragini agawe.

⁸Piya, wasanamiba tonarona tauki nakiyena aboraramepa, kampa akutatawe. Kuntaena aboraramekaba, kampa taekitaba pune.

⁹Igeba kama puratakaba Kotiba kampa tagasaye. Igeba taeguyega wareꞌnaokanaba taoꞌmaeyagi to ka asima yogaba pune.

¹⁰Piya, aꞌyaꞌma yagaba Isu mpiyaba mikenaenawapa tae tauta ampa aborakenaga tae tautepa Isu purintemi kiꞌi wama miyune.

¹¹Eya, aꞌyaꞌma yaga mampara miyompe ntagaba Isukaba igeba ata purataga, taeba purikena kiꞌi nasune. Piya, Isu mpiyaba mikenaenawampaba tae purikena taupisaba aborakenaga piyama nasune.

¹²Pipa mayamawe: Taetiba purikenaenamaba yoga pegina, pi ntugarasa tigetiba miyabaꞌena ago aboraye.

¹³Pigoya, paipa kaꞌwainaba amatiti puma mono isapipa mayama kaentiye: Naeba namatiti poka kamana uma aborauwe, untisa puma, taeba tamatiti puma mono kamana yune.

¹⁴Piya, taeba mayama abibebe pune: Waꞌega Isu purintapisa asinti, aeba taepa pabiyama Isuge purintapisa asiratamagina, tigepe taepe kaga aeꞌwa nkagora taba puratakiyema, abintune.

¹⁵Piya, aꞌyaꞌma taeti aboraramintintanaba pipa tiyoꞌmaekenaenawe. Piya, Koti nkawagaenamaba wagana kana pegini, uwaena kinaꞌmiba abima tabera iꞌmu puma Koti nkage asagayuyiyo. Mabisa kuntuyenamaba aogi eꞌwasaena aborakiye

¹⁶Pikayema taeba kampa taekitaba pune. Kampaye. We, tauꞌamaba paka paka abararagina, aꞌyaꞌma yagaba taguꞌamaba paka paka aososiye.

¹⁷Piya, tauki nakiyena taeti aborawaeyamipa pipa uwa aro ntaganto puwama, tabe eꞌwasaena taeti aborama, tabe kuntuyenaba asugasima waiyaba mikiye.

¹⁸Piya, taeba taorasa agaompentanagaba kampa napiyune. Kampaye. Taeba taorasa kampa agaompentanaga, pika taeba kamanapa yune. Pikaba kampa taekitaba pune. Eya, taorasa agaompentanaba pipa aro ntaganto waiyekana, taorasa kampa agaompentanaba pipa waiyaba mikiye.