Read Fore 2 Korinti 5 Bible Online

2 Korinti 5 - Fore bible

2 Korinti 5

¹Pigoya, taeba mayama abintune: Mampabi ibaba seri nama kanta puma tau mintompepa, pipa maegasigipa: Aerawane, ukune. Piya, Kotiba ka esegi namatepa kimaꞌma mintikana aborama tamikiye. Pi ntamapa wasanamiba iyatasaba kampa kimaranta ntamapa mantara uwa waiyaba waikiye.

²Piya, taeba mampabi pi ntamapi mima kubeꞌenaba puma miyune. We, taeba mantabinti wainti ntamatasa kai kanta puma amirisanaga tabugaye.

³Eya, uwa tauka misanaga pintana purisanaga tabugaye.

⁴Piya, taeba ma seri namapi miyompeka, taeba: A-e, a-e, uma kubeꞌena puma miyune. We, paisa tau kasakana wanane. Taeba to aogaso tauꞌena pu uꞌma misanaga tabiye. Piya pekana aoganta eꞌwasaenamaba purikenaenarepa nawagaikiye. Pikaba tabugaye.

⁵Piya, aogantaꞌenara yokege puratai ntagara aeba Kotiwe. Piya, aeba marupa Aota Awamusapa tamintegi, ainti aꞌyaꞌmaena tamikenaenagaba taeba abibebe pune.

⁶Piya, taeba pika abima pero puma miyune. Pipa mayama abune: Ibasa yaga Waꞌegamageba kumaꞌwatiba kampa miyompekaba mamparapa tauꞌamaba namate kanta pegi miyunema, abune.

⁷Piya, ma kanarapa taobisa agantompentana wanane. Taeba uwa tamatiti puma mono kiꞌiba nasune.

⁸Pika abima pero pune. Piya puma, taupa kaite Waꞌegamage ampisanaga tabugaye.

⁹Piya, ma ntamatepi miyompepe, kaite aege miyompepe, taeba yokege puma Waꞌegawama nkabugaintana wasiyekana aꞌmu puratano.

¹⁰Piya, taeba aꞌyaꞌma kinaꞌmitaba Karaisiti nkantotaꞌena aborakena aemu yabaera irosakune. Aibekana, tauꞌyaga pompentanaba aꞌyigitatama aꞌyaꞌma ka ka kinaꞌmitepa ikapa aogiyenawo, ataenawo aboraramikiye. Poroba wasana Kotiti atokaekena yuga puntiye

¹¹Piya, taeba Waꞌegamaka taekuru pukenagaba napima, wasanamikaba imatiti piyema yogaba pune. Piya pokanaba Kotiba agorepa tagawaeye. Piya tintabaipipa pabiyama agorepa tagawaeyanema, napiyuwe.

¹²Piya, ma kamana yompepa, pipa tae taupa tiyobi to kakema kampa maete iyune. Kampaye. Tigeba abiginaba taekaba aogima ntapima, wasanami nkiyoriba tiꞌmuntanaba aborano. Eya, iꞌama nkasagayuntini igupa kampa napiye kinaꞌmi nkiyoriba taekaba abima tiꞌmu piyo.

¹³Piya, wasanami nkiyobi taeba aibosabo pompepa, aerawane, taeba Koti ntuga pune. Wasanami nkiyobi taeba aogima ntapiyompepa, pipa tiyoꞌmaekenaenawe.

¹⁴We, Karaisiti nkagu kaoꞌenawampa kabirataye. Pikaba taeba aogima napimagita mayama abibebe pune: Aꞌyaꞌma kinaꞌmite nkantotapa ka yagarama ago purintiye. Piya, aeti atokaekenaga aꞌyaꞌma kinaꞌmitepa mampabisaenara ago puruntunema, abune.

¹⁵Piya, miyaba miye kinaꞌmiba taetentana wanane. Aeti atokaema miyaba miyompeka purintiye. Eya, aeti atokaesanaga aꞌyaꞌma kinaꞌmiteka purogana asitantiye.

¹⁶Piya, ibasa yagaba taeba wasanami ntapiyenabisa wasanapa kampa aꞌyigi nkitaune. Kampaye. Piya, paipa Karaisitikaba wasanami ntapiyenabisa aꞌyigi nkatantune. We, ibaba kampaye. Aeba to awametanema, abune.

¹⁷Piya, kaꞌwainaba Karaisititi atokaeyamipa aeba to auga puwaeye. Paisaenawampaba nagariwagina, we, aogantaꞌenawampa aborawaeye.

¹⁸Pipa aꞌyaꞌma aogantaꞌenaba Kotintana manane. Piya, aeba Karaisiti ntugarasa taepa maema aeti atokaeratama ka tantabariratantiye. Piya pumagina, aeba ka tantabarikena yugara uratantiye.

¹⁹Eya, Karaisiti ntugarasa Kotiba aeꞌwa ntuga puma mabisa kinaꞌmite nkaiboꞌenarepa aewake ka tantabariratantiye. Piya pumagina, aeba ka tantabarikena kamanapa tayapisa aboranoma uratantiye.

²⁰Pika taeba Karaisiti nkaogi agoya kamanaꞌwa ukena kina miyokana, Kotiba kamanaꞌwapa tawamutasa esegima urimiye. Piya, taeba Karaisiti ntugaraka mayama esuritaune: Tigeba Kotiti atokaema ka tintabarima miyiyoma, uritaune.

²¹Piya, Karaisitiba aguntaenawapa kampa waintipa, tae agunta asuꞌa puratakenagaba otaogana agunta yagara kanta puma purintiye. Aiboga, taeba Karaisititi atokaemagi yogawatasa Koti nkarupu kina aborakena pune.