Read Fore 2 Korinti 6 Bible Online

2 Korinti 6 - Fore bible

2 Korinti 6

¹Piya, taeba Kotige ka yuga pompe kinaꞌmitaba, kamanapa esegi kamana urimima: Tigeba Koti nkawagaenawapa maentapa, a-nkuwa ataiyoma, urimune.

²Piya, aeba maya kamanapa untiye:Aogi kanabipa kamanakapa abimagi, wasanami nkiꞌikena yagaba kaoꞌmaentone, untiye, iye. We, aogi kanarapa iba aboraye. We, tauꞌikena yagaba ibanto aboraye.

³Pigoya, wasanami tae yugaga uma ata pusanagaba taeba kaꞌenaba igisabi wareꞌnakenaenaba kampa puma kabiyune.

⁴Piya, taeba Koti kayokaya kina mimagi aogi yugarepa tonaronabisa aborariyakima miyune. Piya, taeba tauki nakiyenarepe kuntaenarepe kamparagaenabi mpikenaenabe pasema aesagaꞌma asima esegi pune.

⁵Eya, kasotasa taeguma, igaꞌna puratamagini, tabe kamana uratawe. Aerawane. Taeba araga ntuga puma, aogima kabima mimagi, nanintagaba iꞌmima agorepa aboraune.

⁶We, tabe nare ntare puma mimagi, abikenaenarepa aogima aborama, kampa karuꞌena taoꞌmipa kamana uwaitama, kayonena puma agorepa aboraune. Eya, Aota Awamusati atokaema mima, agu kaoꞌena auꞌwantaga mimagi,

⁷taga kamanaꞌamana uma, Koti nkesegiyenaba aboramagi miyune. Piya, taeba Koti nkarapuyenaba kaso kanta puma tayatakantibe tayakeꞌmasibe puꞌma miyune.

⁸We, kaꞌisa kinaꞌmiba tageba asagayuyegini, to kaꞌisamiba maete tumewe. Kaꞌisamiba ata kamana uratagini, to kaꞌisamiba: Aogi yuga pewema, uratawe. Kaꞌisamiba taekaba: Kumpari kinanema, napiyepa, pipa kampaye. Taeba tagantana pune.

⁹Uwoma kinaꞌmiba tagapa, agorepa kampa aogima agawe. Taeba purikena kina kanta pompepa, uwa taogama miyune. Taeguyepa, kampa purune.

¹⁰Piya, taeba intaraꞌena pe kina kanta puma mima, asi nasiba taꞌmuba pune. Taeba kusi kina kanta puma mima, mono kutatepa etaꞌma ima uwoma kina imune. Eya, taeba kota kampa wainta kina mima, aꞌyaꞌmaena wainta kina kanta puma taꞌmu puyabaꞌmiyune.

¹¹We, Korinti kinapa, agu kaoꞌenayaga puritamagi, tantabaipisa kamanapa aborawaerimune.

¹²Taeba agu kaoꞌena puritakenaenaba kampa akunune. Kampaye. Taeba kanara agu kaoꞌena puritaokiri, tigeba agu kaoꞌenaripa akunega kaꞌenaba kampa puma miyune.

¹³We, araga yagarane kanta puma miyepa, tigeba antotapa tigupa ataigina taeti kananoma, urimuwe. Taerepa Koti ntama mpintune

¹⁴Pigoya, kampa imatiti punta kinaꞌmigeba ka kina kanta pumaba a-mpiyiyo. We, ayama antageꞌenambe arupuyenamabe kaꞌenaba pukiye, a. Kampaye. Ayama eꞌwasaenamabe tununtanamabe kaꞌenaba pukiye, a. Pipa kampaye.

¹⁵Piya, ayama Karaisitige kewamageba napiyenawaisipa kaꞌmasa puma mikibese, a. Kampaye. We, ayama amatiti pemiꞌnabe kampa pemiꞌnabe isigupa kaꞌmasa puma mikibese, a. Pipa kampaye.

¹⁶Piya, ayama Koti mpono namake ama kotigeba maema atokaekibese, a. Pipa kampaye. Abiyo. Miyaba Koti mpono namapa pipa taewe. Pika Kotiba maya untiye:Naeba igege mima, ige ikapi nasikuwe, iye.Piya pumagi, ige Koti miyekini igeba nae tu mpikibewe, iye.

¹⁷Piya, abeꞌisa kinapa igaitegiri aota miyiyo, Waꞌegawama naba piya yuwe, iye.Piya, iꞌnintanaba a-mpaema miyigi, naene tibabeno, iye.

¹⁸Piya, naeba tibantana pekiri, tigeba araga yagaranentana puma mikibewema, tabe Waꞌegarakaꞌyankamana yuwe, piya untiye.