Read Fore 2 Korinti 7 Bible Online

2 Korinti 7 - Fore bible

2 Korinti 7

¹Piya, nabugai ntaoꞌmitaba, piyaenaga agebama utaratantika, taeba tagu tauꞌama iꞌnintana pemika aeyobaꞌmagi Kotikaba taekuru puma aotaꞌenama nkaupa aogima aborama miyeno. Korinti kinaꞌmi igu aꞌwae puguna Poro aꞌmu puntiye

²We, tigeba agu kaoꞌena purataiyo. Piya, taeba tigetiba kaꞌwainapa ataena kampa potantune. Piya, kaꞌwainapa antage kipa kampa aboraeyakintune. Piya, kaꞌwainapa kumpari kamana kapa kampa omima aeꞌenawapa paibuntune. Kampaye.

³We, naeba piyama tipi pima kamanapa kampa yuwe. Kampaye. Naeba: Tigekaba napima agu kaoꞌena puritaunemaba, taga kamana ago urimuwe. Eya, taeba tigege kaꞌena puma mita wama purenemawe.

⁴Piya, tigeba aogima ntapima arupuyena pusanagaba tara nagiba kampa napiyuwe. Tigekaba tabera naꞌmu pogiri esegima asinatawe. Eya, wasanamiba tauki nakiyenaba aborawae tamega, aerawane. Tigekaba napima tabera naꞌmuntanabi mpiyuwe.

⁵We, paipa Masetoniya mariba ampa irosauwapa, pitaꞌigeba uwaba kampa mintantune. Kampaye. Asi nasiba toma toma tauki nakiyenaba tauta aborantiye. Eya, tautapa maꞌena puratauguna, tantabaipipa taekuruyena aborantiye.

⁶Aibogana, Kotiba aeba kuntaena maeya kinaꞌmipa agoya puwaitaiꞌna aeba Taitasipa otaogana taeti kanaogana tantaba agoya puratantiye.

⁷Piya, Taitasi taeti kanantemipa, pikaba Kotiba agoya puratantiye. We tigeba Taitasi nkantaba agoya potauguna, aeba pi kamana maete kanama kaga agoya puratantiye. Piya, Taitasiba kamanatipa unamimagina: Tigeba nagakenagaba tibugagina, tintawamaba naeka kubeꞌena pegiri, nae nage asagayuyewema, unamintiye. Piya, pi kamana unamintikaba tabera naꞌmu puritantuwe.

⁸Naeba paipa ka isa kaema timima, tinta tiki nakiyena maema aborarimintopa, pika abima nantarapa kampa puwe. We, paipa nantawamaba kunta puntikana, ibaba kampaye. Piya, esaꞌnempa aro ntaganto tinta tiki nakiyenaba aborarimintegina, aꞌya wayema, abuwe.

⁹Piyamaba nantawamaba aogi piye. Pipa tinta tikintika wanane. Tigeba tintaraꞌena puma tigu aꞌwae puntika nantawamaba aogi piye. Eya, Koti nkabintanaga tinta tiki nakiyenaba puguna, kamanatempaba kampa ata yugaba puritantine.

¹⁰Piya, wasanamaba Koti nkabintanaga anta auki nakiyena puntanaba, ago aꞌwae pekana Kotiba auꞌima ababekana, pikaba kampa napima ata pikiye. We, wasanamaba mampabisaenaraka anta auki nakiyena pekanaba, piꞌna nkauꞌwapa purikenaenawe.

¹¹We, abiyo. Tigeba Koti nkabintanaga tintaraꞌena puguna, piꞌna nkauꞌwapa aogiyenaba tigupinti atama tutusuritaogiri abintane. Piyama tutusuritaogiri, tigeba asima kamanatipa uma arupu pumagiri, pi ntagarama nkaguntaenaraka pami pumagiri, Kotika tiyekuruba puntawe. Eya, pi ataena pemiꞌnapa arupu potakenaga tigeba tabera napima esegi puma kamanaꞌwapa karuꞌena uma aogi puma antotaꞌenawapa amintawe. Aꞌyaꞌma yuga puntapa, pipa aogi pumagiri, Koti nkaobipa kampa kamanatipa uwa waintantiye.

¹²Piya, pai isa kaema timintopa, pipa aruꞌena puntiꞌna aekawemaba kampaye. Ataena potantiꞌna aekawemaba kaga kampaye. Piya kamana urimuwagiri, tawamupa wasikenaenaripa Koti nkaobi aboranema, pika kaema timintone.

¹³Piya, pintanarimpaba tantawamapa agoyaena potawe. Piya, tanta manapa agoya puntika wanane. Tigeba Taitasi nkanta agoya potantaka aꞌmu puma kanama ampa uramoga, taeba tabera taꞌmupa puntune.

¹⁴Piya, paipa naeba tige tige asagayuma Taitasipa omintone. Pi kamanaꞌama nkauꞌwantaga aborawaeyugu kampa nanipa puntuwe. Piya, paipa tigepa kamana urimintopa, pipa taga auꞌwa aborantaisa puma, tige asagayuma Taitasipa kamanati omintopa, pikeba auꞌwantagaꞌena aborantiye.

¹⁵We, Taitasiba tigeti waogiripa tigeba ababuma tiyekuru puma pami ntami puma awamuꞌwapa wasintawe. Pika aeba napintana agupa tigeti uwaenara abugantiye.

¹⁶Piya, antageꞌena pusanaga tigekaba tara nagiba kampa napinta, pikaba naꞌmu puritauwe.