Read Fore 2 Korinti 8 Bible Online

2 Korinti 8 - Fore bible

2 Korinti 8

¹We, naoꞌmitaba, Masetoniya marisa monota aiꞌaruyenabipa Koti nkawagaena aboranti, pika urimikena pune.

²Piya, tabe iki nakiyenaba igeti aborama imiyo puwaitagini, igeba pugararakaꞌya mintantawe. Mimagini, igeba monotaka iꞌmuntana puma asugasima tabera pumagini, igeꞌwai kupisa uwaena aki puma iyokinapa iyoꞌmaentawe.

³Piya, igeꞌwai ntapiyenarasa aegaꞌma kana moneba imintawe. Eya, igeba waintemintana kanara napima atamagini, piꞌnapa piꞌnapa agasima to kake atantawe. Naeba pika ago abigaite awagaba urimuwe.

⁴Piya, igeba taeka tabera esurataugu: Tigege kaga Kotiti atokaema ataenabi mpintaꞌnagipa iyoꞌmaeyanema, tabigantawe.

⁵Piyama tabigaugu, taeba: Kaꞌisa atakibewema, napintompene. We, piyama kampa puntawe. Kampaye. Maruꞌenaba igeꞌwai nkigupa Waꞌega amigaitegini, Koti nkabomeka aegaꞌma igupa taepa kaga tamima napiyenarepa asugasima tabera puntawe.

⁶Igeba piya pumeka, taeba Taitasi otakana tigeti wanomawe. Piya, aeba pi nkasoya yuga agobintisa puma, tigeti ampa nagarigasanema, otaune.

⁷Piya, tigeba aꞌyaꞌmaenaba aogiyena mana pewe. Eya, tigeba Kotiti timatiti pumagiri, kamanatipa aogima aboramagiri, uwaena napiyenarintagakiri, Koti ntugaba esegima pumagiri, tigeba agu kaoꞌena aogima puratawe. We, pabiyamagiri iba ma nkiyoꞌmaekena asoya yuga kaga asugasima piyo.

⁸We, pika naeba kampa esegima uritauwe. Kampaye. Kaꞌisa kinaꞌmiba aogi yuga puma iyoꞌmaeyaga urimuwa, abima piyaenaga napiyigina kaga agu kaoꞌenarimpaba tagantana peno.

⁹We, tigeba ago Waꞌegarempa Isu Karaisiti nkawagaenawapa abintawe. Aeba uwaenaena waintaga mima, atate pugara puma ampintantiye. Eya, pugara puma mintantipisa tigeba uwaena maekibewemawe.

¹⁰Pigoya, ibaba nae napiyenanepa mayama urimuwe: Ma ntugagaba marusa kabuba tigeba agobima puntawe. Eya, marupa kina yuga pusanagaba tibugaogiri puntakiri, ibanto nagariyiyomawe.

¹¹Eya, paipa agarosama pi ntugagaba tibogiri puntakiri, piyama ibageba agarosama auꞌwapa aborama, tigetintana waintintanaritasa nagariyiyo.

¹²Piya, kaꞌwaina amikenaenaga abugakibipa, pi ntagaramati waintintanagaba Kotiba napiyegina kanarasaye. Kampa waintintanagaba kampa napiye.

¹³We, tigeba imimagiripa ataenabi mpiyigini igeba aogiyenara miyiyemaba, kampa yuwe. Kampaye.

¹⁴Naeba tigegeba kaꞌmasa puma miyiyoma, yuwe. Piya, ibaba ma kanarapa tigeba kampa waintiꞌnagipa uwaenaenaritasaba kanara iyoꞌmaeyiyo. Piya pigini, tigeba kaꞌisaenagaba aisagakibepa, igeba uwaenaenawaitasaba kanara tiyoꞌmaeyiyemawe. Piya pukibepa, igege tigegeba kaꞌmasa puma mikibewe.

¹⁵Piya, mono isaꞌamaba untamisa puma maya piye: Kaꞌwaina mana naninta uwaena maentiꞌnaba kampa asugaintiye. To kaꞌwaina taranto maentiꞌnaba, aeba kampa kusiba puntiye, iye. Taitasibe aoꞌyagararabe Korinti kumati wakena puntawe

¹⁶Naeba Kotipa naꞌmu potauwe. Aeba Taitasi nkanta maema asitagina, aeba tae napiyompesa puma tiyoꞌmaekenagaba napima abugaye.

¹⁷Piya, aeba tae otaompe kamana aegaraye. We, tae kamana abiwanane. Aekeba pi ntuga pusanaga abegina, aeꞌwa ntapiyenabisa tigetiba waye.

¹⁸Piya, taeba ka mono yagara otakana aegeba wakiye. Kana mono yagara, aeba aꞌyaꞌma monota aiꞌaruyenabipa aogi mono ukena agigaꞌe wainta yagarawe.

¹⁹Pi abiwanane. Monota aiꞌaru pe kinaꞌmiba aepa otagana, taege nasima pi Yerusaremi kina iyoꞌmaekena agoya yugare taoꞌmaeye. Piya, taeba Waꞌegawama nkage asagayuma aogima tiyoꞌenaba puritama aborarimune.

²⁰Piya, tabera aki pompe ntabapa kabikena pompekaba ata kamana usanaga, taeba pi taoꞌyagara otakana Taitasige wakiye.

²¹Piya, taeba aogiyena manapa pusanaga tabugaye. Eya, Waꞌegawama nkaobinkamana wane. Wasanami nkiyobipeba kaga aogiyena pusanaga tabugaye.

²²Piya, taeba to ka mono yagara otakana, isigegeba wakiye. Taeba uwaena yaga toma toma ntugaba amompepa, aeba esegima yogaba pegi agawaeyune. Piya, ibaba tigeba aogiyenamana pewema, napima pi ntugaba to kakema esegima piye.

²³Pigoya, Taitasipa mayama agaiyo: Aeba naoꞌyagaragana, naege kabo puma ka yuga puma tiyoꞌmaekena piye. Piya, tara mono yagararamisipa tigeba mayama abiyo: Isigeba monota aiꞌaru pe kinaꞌmi ntuga puma Karaisiti nkeꞌwasaenaba maema aboramene.

²⁴Pika tigeba aꞌyaꞌma monota aiꞌaru pe kinaꞌmi nkiyobi ma kakaga kinaꞌmiti agu kaoꞌenaripa aborawaimima, tigeka kamana uwaimompe nkauꞌwapa aboraiyo.