Read Fore 2 Korinti 9 Bible Online

2 Korinti 9 - Fore bible

2 Korinti 9

¹Tigeba Kotiti atokaeya kinaꞌmiti muta atama iyoꞌmaekenaenaba agantaka, naeba pikaba eꞌero kamanapa kampa kaekuwe.

²Eya, tintawamaba pi ntuga pikenagaba aogi puntiyemaba, agantuwe. Piya, naeba Masetoniya kinaꞌmi nkiyobipa tigeripa asagayuma, tigekaba maya uwaimuwe: Abetasa kaburapa Akaiya kinaꞌmiba pi ntuga pikenaba ago yokege puntawema, uwaimuwe. Piya, esegi punta ntugarimpa nkawaga kamanaꞌamaba tutusuwaitaye.

³Pigoya, ma kamanapa uwa kamana pusuma tigegaꞌe asagayusu pusanagaba kampa nabiye. Kampaye. Piya, nae uwaimosa puma tigeba yokege puma miyiyemaba, naoꞌmipa uwaitaogini tigetiba wawe.

⁴Piya, aꞌyugu tigeba kampa yokege puntigini, kaꞌisa Masetoniya kinaꞌmiba naege wamagini uma tigaigiri, taeba tani pusanaga yokege piyo. We, tigegeba kaga tini pusanaga yokege piyo. Piya, tige pentanagaba esegi kamana uwaimune.

⁵Piya pumagi, naeba naoꞌmipa uwaitakini paitama wama tigetiba wakibewema, kanara napiyuwe. Piya, tigeti wamagini, tige atakena muta marupa yokege puma miyigi kanano. Piya, tipi pigaurisanaga kana yabapa tiꞌmuntanabisa ibaba aki piyo.

⁶Piya, yo kamanaꞌama nkagoba mayamawe: Kaꞌwainaba taranto aintana pemiꞌnaba pi ntugabisaba taranto maekiye. To kaꞌwainaba uwaena aintana pemiꞌnaba, aeba pi ntugabisa uwaenaba maekiye.

⁷Piya, tigeba ka ka tintabintiba aogima napigaitegiri, pi ntapiyena aegaꞌma uwaenaba imiyo. Aꞌyugu kaꞌwainaba antabinti aukintaꞌyaga imisanagawo, wasanami tutusunatawe usanagaba tiꞌmuntanabisa imiyo. Eya, Kotiba aeba wasanama aꞌmuntanabisa amisanagaba abugaye.

⁸We, Kotiba aꞌyaꞌma aꞌmuntanaba asugasima timikena piye. Piya pekini, tigeba kanara maewaemagiri, aꞌyaꞌma toma toma aogi yuga pikenaga tiꞌmuntana pumaewaintapisa aborama kampa aisagawe.

⁹Pika mono isaꞌamaba maya iye:Kotiti atokaeyami ntagaramaba aeꞌenawatasa aibarase puma pugara kinapa imiye, iye.Piya, arupuyenawampaba pipa waiyaba mikiye, iye.

¹⁰Piya, Koti aeba aintana pukena kinapa a imimagina, nanintaba aborama wasanapa imiye. Piya, aeba pabiyama aintanaripa tabera aborarimima, arupuyenarimpa nkauꞌwapa uwaenaba aborakiye.

¹¹Piya, tigeba uwaenaena aborama imikibepa, tigetiba uwaenaenaba to kakema aborakiye. We, tiꞌmuntanaripa maete wama imekiniba, tigeka igeba Kotiti tabera iꞌmu potakibewe.

¹²Piya, tigeba piya yugarasa Kotiti atokaeya kinapa iyoꞌmaekena pepa, aguyosaꞌma kampa waintintanaba maema aborawaeyawe. Piyaena mana nane. Pi pentanaraka Kotiti tabera aꞌmuntanaba kaga aborawaeye.

¹³Pi nkiyoꞌmaekena yuga pepa, tige pentanama nkauꞌwapa aborakibewe. Eya, tigeba Karaisiti mpono kamanapa abima wasimagiri Koti nkagegaꞌeba asagayukibewe. Eya, igebe to aꞌyaꞌma kinaꞌmibe tigamagini: Tabera iꞌmuntanaba tamewe, umagini Koti nkage asagayukibewe.

¹⁴Piya, igeba Koti nkawagaenamaba tigeti asugasima waintakini tigakibewe. Tigamagini, pika igeba tigege kaga mikenaga umagini Kotiti nunamu uritakibewe.

¹⁵We, Koti aꞌmuntanawapa tamipa, pikaba taꞌmu potano. Pika kamanatepa kampa uma nagarikune.