Read Fore Karesiya 1 Bible Online

Karesiya 1 - Fore bible

Karesiya 1

¹Naeba Poro, aposoronawe. Piya, aposoro yugara wasanamiba kampa unatauguna, to ka yagaramaba kampa yuga aboranamintine. Kampaye. Isu Karaisiti aebe, purintapisa asitanti ntagara Koti tababe, isigeba unatantamene.

²Naebe aꞌyaꞌma naege miye mono kinaꞌmiba ma nkisapa kaeyokana, Karesiya mari monota aiꞌaru pe kinaꞌmiti tigeti waye.

³Taba Kotige, Waꞌegare Isu Karaisitige, isigetisa awagaenabe paruyenabe tigeti waima waiyeno.

⁴Piya, Karaisiti aeba tabarempa Koti nkabemintana aegaꞌma aguntaenaretaka aumawapa kasima, kamparagaena mampabi ibanto waintintanabisa akariyobatataye.

⁵Piya pika, taeba Koti nkagegaꞌe uma asagayuyaba miyeno. Tagane. Aogi kamanapa kaꞌanto waintiye

⁶We, tigeka naeba pami puwe. Karaisiti nkawagaenawataka Kotiba tigegaꞌe uma tiba pegiri, tigeba karuꞌena agaite aogi kamanapa toma aegaraga, naeba abite tabe pami puwe.

⁷Piya, to ka aogi kamanapa kampa waintiye. Kampaye. Kaꞌisa kinaꞌmiba napiyenaripa paibukena puma Karaisitintana aogi kamanapa maema aꞌwae ubewe.

⁸Piya, taeba uma taga kamana aborarimintompene. Pigoya, taewo, mantarasa enisorewamawo, akayuma kasa mono kamana urimikibipa, piya ukibiꞌnaba aꞌabibinti aesawano.

⁹Eya, paipa taeba kamanapa ago urimintompeka ibaba to kake yuwe: Kaꞌwaina aeba kasa mono kamana urimima, pai tige maenta kamana akayikibiꞌnaba, aꞌabibinti aesawano.

¹⁰Ma kamanaꞌnekaba ayama napiyewe. Ibasa kamanapa naeba wasanami nkiyobipera Koti nkaobi yuwe, a. Wasanami asoyaena punatataka yuwa, a. We, wasana asoyaena puwaitaosinta, pipa Karaisiti kayokaya yagaraba kampa miyosine. Poro aposoro aborantemi kamanane

¹¹We, naoꞌmitaba, naeba urimekiri aogima abiyo: Naeba aogi kamana pai aborarimintopa, pipa wasanami wanane.

¹²Pipa ka yagaramaba kampa aboranamintine. Ka yagaramaba kampa nayakintine. Pipa kampaye. Isu Karaisiti aewa aboranamintine.

¹³Pigoya, naeba pai Yuta kinaꞌmintana aegarantopa, tigeba ago abintawe. Piya, pi ntagaba naeba Koti mponota aiꞌaru pume kina agasiya kama puwaitamagi, pi mpono maegaikenaraka puntone.

¹⁴Piya, naeba nayabama kamanapa esegima aegaꞌma agasiyaena puntuwe. Eya, Yuta kinaꞌmintana aegaꞌma Yuta kinaꞌmi nkibakapi naeba ka kananepa igasimagi agasiyaena puntuwe. Pipa ago abintawe.

¹⁵Pigoya, paipa nanonempaba kampa yakari punatantogana, pi ntagaba Kotiba aewa ntapima awagaenawatasa kegaꞌe uma: Aota miyoma, unatantine.

¹⁶Eya, aeba: To marisa kinaꞌmiti uma yagaranempantana aborawaimomagina, abemintana aegaꞌma yagarawampa nkagoba aboranamintiye. Aboranamintika, naeba wasanamiti ige kamanapa kampa wama abimagi,

¹⁷Yerusaremi kumatiba kampa ima aposoro paitanatanta kinaꞌmi kamanapa kampa abimagi, naeba Arebiya mari wama umimagi, ainti aꞌwae puma Tamasiko kumata irosantuwe.

¹⁸Aibumagi, aintiba kakaga kabu wagasaga naeba Yerusaremi kumati ima, Pita asu agama nagisa kaꞌamu yaga aege mintantone.

¹⁹Piya, pi ntaga naeba aꞌyaꞌma aposoro kinaꞌmi wanane. Yemisi, Waꞌegawama nkaꞌnantoba, abiwapa agantone.

²⁰We, ma kaeyo kamanapa Koti nkaobipa kumpari kamanapa kampa kaema urimuwe.

²¹Pigoya, aintiba naeba Siriya maribe Sirisiya maribe wantone.

²²Piya, pi ntagaba Yutiya marisa Karaisiti mponota aiꞌaru pume kinaꞌmiba igeba naowarapa kampa nagantini,

²³igeba mayama nawaga kamanaꞌamana abintane: Pai kama puratamagina tamatitiꞌena aegukena puntiꞌnaba, ibaba pi kamanapa aborayema, abintane.

²⁴Piyama nawaga kamana abimagini, pika igeba Koti nkageba asagayuntawe.