Read Fore Karesiya 2 Bible Online

Karesiya 2 - Fore bible

Karesiya 2

¹Pigoya, nagisarisa tarawa tarawaki tumpaema kabu aꞌya poga, naeba to aꞌwae puma Yerusaremi kumati intuwe. Piya, Panabasiba nababoga, Taitasi ababute kaga intune.

²Piya, Kotiba kamana uma aboranamegi abite imagi, to marisa kina uwaimo mpono kamanapa naeba uma aborawaitantuwe. Eya, ige wainta kiye kinaꞌamana uwaimima, pai punto ntugabe iba po ntuganepe aꞌyugu pusanaga uma aborawaimintuwe.

³Pigoya, Taitasiba naege inti, aeba Kariki yagarawe. We: Pika au kasama Yuta kinaꞌmi nkaraꞌena potaomaba, kampa unatantine. Kampaye.

⁴Piya, kaꞌisa kumpari kina, mono kina kanta puma miye kina, igeba kakama kanama ampa paiꞌmagini: Au kasao, untawe. Igeba ampa paiꞌma Karaisiti Isu agoyaena tamomentana kunki agama, paisa ago kamanaꞌama amentapinti tatama igaꞌna puratakena puntawe.

⁵Piya pugu, taeba ka yaganto kamanaꞌwaipa kampa aegaꞌma abuntune. Kampaye. Piya, mono kamanaꞌama nkago kamparaga pusanaga tigeti waiyenema, taeba ige kamanapa kampa aegaꞌma abintune.

⁶Pigoya, mono kiye igi wainta kinaꞌmiba, igeba kamana kasaꞌenagaba kampa amato puma unamintane. We, ige waintika kampa naekuruba puntuwe. Piya, wasana intapera tumintapera Koti nkaobi ka kanara mintawe.

⁷Eya, igeba kasaꞌenagaba kampa unamintawe. Piya, Kotiba Pita: Yuta kinaꞌmiti wama mono uwaimoma, otantisa puma: Namuꞌisa kinaꞌmiti wama monopa aborawaimoma, unataogini agantawe.

⁸Piya, Pita Yuta kinaꞌmi nkibakapi aposoro yugara otanti ntagaramaba pabiyama naeka namuꞌisa kinaꞌmiti wama aposoro yugara unatantine.

⁹Pigoya, tabe igi wainta kina Yemisiwa, Pitawa, Yoniwa suma, igeba Koti awagaena namima yogara unatantintanaba agamagini, igeba Panabasike naeke iya tasimima ka tantabarima, tasigepa: To marisa kinaꞌmiti wama yoga pisoma, urasitama, igewaika: Taeba Yuta kinaꞌmiti yoga pukune, untawe.

¹⁰Pigoya, igeba mayama to ka kamana untawe: Tigeba kusi kinaꞌmikaba aogima ntapima iyoꞌmaeyiyoma, urataugu, naeba pintanagaba nabugaoga, esegima yogaba puntuwe. Pita nkaiboꞌena Poro aborantiye

¹¹Pigoya, aintiba Pita kanama Antiyoki kumati aborama ata poga, naeba ae aobi kamanaꞌwa akayuntuwe.

¹²Piya, paipa Yemisi nkaokinaꞌmiba kampa aborauguna, aeba to marisa kinaꞌmiti atokaema naninta naogini, aborauguna aeba Yuta kinaꞌmikaba aekuru pumagina, igepa itate abira mintantiye.

¹³Piya pogini, to kaꞌisa Yuta kinaꞌmiba aeti atokaema kaga kumpariyena puguna, Panabasiba aewape kumpari napiyenawaipa maema kaga puntiye.

¹⁴Piya pugu, naeba agauwapa, igeba taga mpono kamanakaba kampa arupu puma nasugu, igategi, ige iyobi Pitapa mayama omintuwe: We, kaeba Yuta yagaramaga to kinaꞌmintana iyegaꞌma mima Yuta kina kantaba kampa pempeka, ayamabaya kaeba to marisa kinapa: Yuta kinaꞌmi pesantanaba piyoma, esegima uwaimene, a, uma abigantuwe. Yuta kinape to marisa kinape imatiti piginaba iꞌikiye

¹⁵Pigoya, taeba to marisa agunta kinapisaba kampaye. Taeba Yuta tupisarawe.

¹⁶Pigoya, taeba abintune: Ago kamana aegaramiꞌnakaba: Arupu kinanemaba, Kotiba kampa otanta, Karaisiti Isuti amatiti pukibiꞌnaka: Arupu kinanema, otaye. Pipa abintune. Piya, ago kamana aegarakena yugawanane. Taegeba Karaisititi tamatiti pompentanaraka arupu kina aborakenaga Karaisiti Isupa aegarantune. We, ago kamana aegarakena yugarasaba arupu yagaraba kapa kampa aborakiye. Kampaye.

¹⁷Pigoya, taeba Karaisititi tamatiti puma arupu kina aborakenaga, taguꞌamaba to marisa agunta kina kanta puma miyompenema abompeka, taeba: Karaisitiba to aguntaena aboranti ntagarawema, ukuna, a. Pipa kampaye.

¹⁸We, naeba kaitantontanaba to kakeba ituru pukubopa, pipa taga kamana akayukena yagara torebata aborakuwe.

¹⁹Piya, ago kamanaꞌamaba agonepa aboraoga, pi kamanaꞌamati puꞌwantoka Kotiti atokaema miyekanaba toba igaꞌnaba kampa punatakiye.

²⁰Eya, naeba maripora Karaisitige itanataugu purintuwe. Piya puma, ibaba naenepa kampa agauwe. Kampaye. Karaisiti aeba nagupinti eꞌwasaenayaga mintiye. Piya, ibaba aꞌyaꞌma mabi nasikenaenanepa namatitiꞌena manane. Eya, Koti Ntagarawamaba agu kaoꞌena punatama naeka aumawapa kaintegi, ibaba aeti namatiti puma mintuwe.

²¹Piya, naeba Koti nkawagaenawapa kampa kasuwe. Kampaye. We, ago kamanaꞌamaba kanara arupu kina aboraratasinta, Karaisitiba uwa purintesine.