Read Fore Karesiya 3 Bible Online

Karesiya 3 - Fore bible

Karesiya 3

¹We, Karesiya kinaꞌmitaba, tigeba aibo kinane. Piya, paipa Isu Karaisitipa wasanami nkiyobi maripora itaꞌatanta kamanapa urimuwagiri, tigeba tiyobisa agasu puntane. We, ibaba kiyoꞌena ke puritagina tiyoba atikaeye, a.

²Pigoya, naeba kaꞌenamanaka mayama tibigakiri unamiyo: Tigeba ago kamana wasima tiyapisa yuga puntiri Awamusapa mayabera, aogi kamana abima timatiti puntiri maeyawe.

³We, tigeba aibo kinatawa, a. Maru agobima Awamusaꞌama ntuga puntiri, ibaba tigeba arirasaenarasa nagarikena pewa, a.

⁴Piya, marupa tigeba aota kina aborama kuntaena aesagabintapa, pipa uwawa, a. Nae napiyopa uwaba kampaye.

⁵Piya, Koti Awamusapa timimagina abakatipi esegiyenawapa aboraye. We, tigeba ago kamana wasima tiyapisa yuga peka aborabera, aogi kamana abima timatiti peka aboraye.

⁶Piya, Abaraꞌamuka mono isaꞌama maya iye: Abaraꞌamu aeba Kotiti amatiti puntika, Kotiba: Arupu yagarawe, otantiye, iye.

⁷Piya puma, imatiti peꞌnagiba igeba taga Abaraꞌamu ntagarawema, ago abintawe.

⁸Piya, to marisa kinaꞌmiba imatiti puma arupu kina aborakibewema, Kotiba abimagina, pi nkaogi kamanapa Abaraꞌamupa omintiye. Piya, mono isaꞌamaba maya iye: Abaraꞌamu, kaepisa aꞌyaꞌma kinaꞌmitiba aꞌmuntanaba aborawaimukuwe, Kotiba omintiye, iye.

⁹Piya, Abaraꞌamuba amatiti puntegini, aꞌyaꞌma imatiti peꞌnagiba aege kaga Koti nkaꞌmuntanabi pasewe.

¹⁰Pigoya, aꞌyaꞌma iꞌikenaga ago kamana wasiye kinaꞌmiti aꞌabibi nkaesakibe kamanapa waintiye. Pika mono isaꞌamaba maya iye: Aꞌyaꞌma ago kamana isapi kaentantanaba kampa wasiye kinaꞌmiba aꞌabibi nkaesawaewakibewe, iye.

¹¹Pigoya, mono isaꞌamaba to maya iye: Kaꞌwaina Kotiti amatiti pekanaba: Arupu yagarawe, omekana eꞌwasaenabi mpikiye, iye. Piya, to kaꞌwaina ago kamanaꞌama kipa aegarantanaba, Koti nkaobipa arupu yagara kampa mikiyemaba, ago abune.

¹²Piya, ago kamanaꞌamaba amatitiꞌenaba kampaye. Pika mono isaꞌamaba maya iye: Kaꞌwaina ago kamana wasikibipa, pitasa eꞌwasaenaba maeyano, iye.

¹³Pigoya, ago kamanaꞌamaba aꞌabibi nkaesawaiyoma, uratantegina, Karaisitiba taoꞌmaema aeꞌwa nkautasa pi nkantota maema ika puratantiye. Pika mono isaꞌamaba maya iye: Aꞌyaꞌma yara itaꞌitanta kinaꞌmiba aꞌabibi nkaesakena kinane, iye.

¹⁴Piya puntagini, to marisa kinaꞌmiba Karaisiti Isuti atokaeyigini, igeba Abaraꞌamu aboraminti nkaꞌmuntanabi ubasikibeka puntiye. Eya, taeba tamatiti puma pai Koti uraminti Nkawamusa maekubompeka, Karaisiti piya puntiye. Ago kamanaꞌamaba maru utaratanti kamanapa kampa maegaikiye

¹⁵We, naoꞌmitaba, naeba meto kamanapa urimekiri abiyo: Taeba piyaena pune: Piya, kaꞌwainaba puꞌwakenaenawakaba napima esegi kamanaꞌwa segipa, taeba pi ntagarama kamanapa kampa akayumagi, to kaꞌisa kamana kampa amato pune. Kampaye.

¹⁶Pigoya, Kotiba kamanaꞌwapa Abaraꞌamupe yagarawampape esegima uwaisimintiye. Aeba uwaena yagarawakaba kampa untiye. Aeba ka yagarantowaka untipa, pipa Karaisitiwe.

¹⁷Piya, kamanaꞌnempa nkagoba mayamawe: Kotiba marupa kamanapa esegima otantogana, aintiba 430 kabu aꞌya wagasoganaba, Koti ago kamanapa aborantiye. Aboraogana, pipa pai esegima potanti kamanapa kampa akayuma maegaintiye. Kampaye.

¹⁸Piya, taeba ago kamanapa wasikena yugarasa aboraramikibintanaba maeyompesinta, utarantanti nkawaga kamanawatasaba kampa maeyompesine. We, Kotiba: Uwa kamukuwema, Abaraꞌamupa otantine.

¹⁹Pigoya, nanaraka Kotiba ago kamanaꞌwapa aborantiye, a. Piya, wasanami akayukenaenawaitaka aborantiye. Aborataogana wairite kanamagina, otanti ntagaraba aborakanaba nagarikiyema, untiye. Piya, enisore kinaꞌmiba akapisa yagaramatasa ago kamanaꞌwapa aboraramintiye.

²⁰Piya, akapisa yagara atarawaisitakena yugaba piye. We, Kotiba Abaraꞌamupa kamanapa omintipa, akapisa yagara wanane. Ae abintoba omintine. Ago kamanaꞌama tamatitiꞌenaraka yokege purataye

²¹Pigoya, Koti nkago kamanape utaratanti kamanape kamaena pesa, a. Pipa kampaye. Piya, ago kamanaꞌamaba eꞌwasaenaba aboraramisinta, pi nkago kamanatasaba arupu kinapa aboraompesine.

²²We, paisa mono isaꞌamaba aꞌyaꞌma kinaꞌmitekaba: Agunta kinatawe, urataye. Piya pegini, aꞌwae puma Isu Karaisititi imatiti peꞌnagipa Koti otantintanaba imiye. Eya, aegaraompe kinaꞌmitepa tamiye.

²³Pigoya, paipa tamatitiꞌenaba kampa aborantogana, ago kamanaꞌamaba igaꞌna puratantiye. Eya, tamatitiꞌena aborakibi ntagaga igaꞌna puratantiye.

²⁴Piya, ago kamanaꞌamaba kabiratakena wairite kanaogana Karaisiti aboraogana yogawapa nagarintiye. Eya, Karaisititi tamatitiꞌena puma arupu kina aboraiyoma, kabiratantiye.

²⁵Pigoya, ibaba tamatitiꞌenaba aboragi, taeba ago kamanaꞌama nkamentapintiba kampa mintune. Tamatitiꞌenarasa Koti ntagaraenaba pune

²⁶Piya, tigeba Karaisiti Isuti atokaemagiri, aꞌyaꞌma kinaꞌmitaba timatitiꞌenarasa Koti ntagaraenaba pewe.

²⁷Eya, aꞌyaꞌma Karaisititi atokaema paitanta kinaꞌmitaba, tigeba Karaisitige ka kanta puma miyewe.

²⁸Pigoya, ae aobi pako pukenaenaba kampaye. Yuta kinano, Kariki kinano, kagane. Kayokaya kinano, uwa miye kinano, kagane. Wawo, wayano, kagane. Eya, aꞌyaꞌma Karaisiti Isuti atokaeya kinaꞌmiba ka kinaꞌena puma miyewe.

²⁹Piya, tigeba Karaisititi atokaeyapa, tigeba Abaraꞌamu tu mpimagiri, tigeba pai Koti otantintana maekena kinatawe.