Read Fore Karesiya 5 Bible Online

Karesiya 5 - Fore bible

Karesiya 5

¹Pigoya, igaꞌna kampa pusanaga Karaisiti aeba akariyobatatantiye. Pika tigeba asima esegi puma igaꞌna ubutitakenaenama nkametapintiba toba kakeba a-mpiyiyo.

²Pigoya, nae Porona, urimekiri abiyo: Tigeba ago kamana wasima araꞌenawapa titipa maekibepa, Karaisiti ntugaba kampa tiyoꞌmaekiye. Kampaye.

³Piya, aꞌyaꞌma ti kasakena araꞌena maeya kinaꞌmitaba, naeba to kakema urimekiri abiyo: Piya, ka akayukibepa ago kamanaꞌama kampa kanara tiyoꞌmaekiye, urimuwe.

⁴Piya, tigeba ago kamanaꞌama ntugarasa arupuyena aguyosaga kinaꞌmitipa, Karaisititi aꞌyigititantine. Eya, Koti nkawagaenabisa wareꞌna wantane.

⁵Piya, taeba Awamusaꞌama nkesegiyenarasa tamatiti puma Koti arupu puratakenaenagaba aobi pune.

⁶Piya, Karaisiti Isuti atokaeyompepa tau kasakenaenawo, kampa kasakenaenawo, pipa uwaenawe. Piya, aeti agu kaoꞌena puma tamatitiꞌenamaba auꞌwapa aborama tagantana piye.

⁷Pigoya, tigeba mono kita agobima aogima nasintawe. Taga wasikenaenarapa ke akutitagiri tikabitawe, a.

⁸We, tiba puritantiꞌnaba pi ntapiyenaba kampa aborarimiye. Kampaye.

⁹Piya, uwaenanto abararamipa aꞌyaꞌma abararawaewaye.

¹⁰Pigoya, Waꞌegawama tiyoꞌmaeyamikaba naeba namatiti pekiri, nae napiyenaba tigeba aegaꞌmagiri, to ka napiyenaba kampa aegarakibewema, napiyuwe. We, tibaibemi ntagarama nkagegaꞌeba kampa abokana, Kotiba antotaꞌenaba amikiye.

¹¹We, naoꞌmitaba, naeba au kasakena araꞌenaba maeyiyo, yosinta, ayama kamaenaba punatayaba miyesine. Piya, naeba piya kamanapa yosinta, maripo ya aibasanakenaenamaba aꞌya wasine.

¹²Pigoya, i kasama araꞌena puma napiyenari paibukena kinaꞌmiba, igeꞌwai nkipa kasama maebugaikibepa, kanarane.

¹³We, naoꞌmitaba, Kotiba igaꞌnabisa tiba puritantina, iyobatitanta kina kanta puma miyiyo. Pigoya, aiyobatitanti ntanaba a-nkaꞌyugu puma arirasaenaba a-piyo. Tigeba tiyoꞌmipa agu kaoꞌena puwaitama kayokayaꞌenaba puwaitaiyo.

¹⁴Piya, aꞌyaꞌma ago kamanaꞌama nkagoba mayama untiye: Kaeka kauka kabitampesa puma kagora miye kinaꞌmipa pabiyama agu kaoꞌena puwaitao, untiye, iye.

¹⁵We, yaga kanta pumagiri ankabana abana pumagiri, aꞌyugu aesawae wakibewe. Pika kabiyiyo. Arirasa kipi kasima Awamusa aegaꞌma miyeno

¹⁶Pigoya, kamanaꞌnepa mayamawe: Piya, Awamusaꞌama nkesegiyenara nasiyo. Tigeba tiꞌama nkabugakibintanaba a-nkaboraiyo.

¹⁷Piya, tiꞌama nkabugaintanamaba Awamusapa maema nagintakena pegina, Awamusaꞌamaba tiꞌamantanaba nagintakena piye. Piya, taramisi kamaena pementanama napiyenaripa aꞌyugu puritagiri aupa kampa aborawe.

¹⁸Pigoya, Awamusaꞌama paitaritagiri aegarapa, tigeba ago kamanaꞌama nkamentapintiba kampa miyewe.

¹⁹Piya, tiꞌama ntugaba mayamawe: Kumiyenawa, iꞌnintanawa, tinta pami pentanawa,

²⁰ama koti nkaegarakenaenawa, kiyoꞌenawa, kamaenawa, maꞌenawa, agobi pukenaenawa, amoꞌenawa, kota mpaema agintanawa, atataraenawa, mono kina pakobikenaenawa,

²¹to waina mparuta mikenaenawa, esegi wani ntama aiboꞌena pikenaenawa, uwaena ataena pikenaenawa, aꞌyaꞌmaena to auga to augaꞌenawa, sumaba, pipa tiꞌama ntugawe. Pika pai naeba urimintosa puma, ibaba to kake esegima urimuwe: Piya pe kinaꞌmiba Koti kabiratakenaenabi kampa ubasikibewema, yuwe.

²²Pigoya, Awamusaꞌama nkauꞌwapa mayama aboraye: Agu kaoꞌena pukenaenawa, aꞌmuntanawa, paruyenawa, paebuma mikenaenawa, aoꞌena pikenaenawa, aogiyenawa, arupu puma mikenaenawa,

²³pasema kabikenaenawa, aupa nagintakenaenawa, suma, igetiba ka ago kamanaꞌamaba aupi pima kamanapa otakenaenaba kampa waintiye. Kampaye.

²⁴Piya, Karaisiti Isuti atokaeya kinaꞌmiba iꞌwaipa maripo yara itaꞌitama, iꞌama nkiꞌnintanawaipe ibugaintanabe ago kaintawe.

²⁵Pigoya, Awamusaꞌamaba eꞌwasaena tamegi, taeba Awamusaꞌama kepa tayakeka naseno.

²⁶Piya, taete tageba a-nkasagayuyeno. Taeba taoꞌmi nkintabaipa tutupa a-suwaitano. Taeba taoꞌmi mparupa a-mpaeyano.