Read Fore Karesiya 6 Bible Online

Karesiya 6 - Fore bible

Karesiya 6

¹We, naoꞌmitaba, ka yagarama aiboꞌena pikibipa, Awamusa waintiꞌnagita, tigeba paebuma kabima mima pi ntagaraba to asitaiyo. Tigeke timiyo pusanaga kaga kabiyiyo.

²Tigeba tiyoꞌmi kuntaenawaipa aesaga piyo. Piya pikibepa, tigeba Karaisiti nkago kamanaꞌama nkauꞌwapa aogima aborakibewe.

³We, ka yagarama aewaka napima: Nageba waintiyema, yipa, ageba kampa waintipa, aeba amiyoꞌena puma aeꞌwa nkaoba airari kaeye.

⁴Eya, aꞌyaꞌma ka ka kinaꞌmiba igeꞌwai ntuga aogiyenawo, kamparagaenawoma, napiyiyo. Piya pukibiꞌnaba aeba aewaka aꞌmu pumagina, au maete ikenaenaba aoꞌmi nkiyobipa kampa pukiye.

⁵Piya, aꞌyaꞌma ka ka kinaꞌmitaba aesaga pikena kuntaenarepa waintakapa, tageba a-mpaete iyeno.

⁶Piya, mono kamana abe kinaꞌmiba igeba uwaimima iyakinta kinapa aogi kutankaipisa antotaꞌenaba imiyo.

⁷Pigoya, tigeba timiyoꞌenaba tiyoba a-nkairari kaeyiyo. Piya, kaꞌwainaba Koti kamanapa kampa akaya sukiye. Kampaye. Piya, wasanama aintana pipa, pabiyaenaba aeti aborakiye.

⁸Piya, kaꞌwainaba aeꞌwa nkau maete ima aintana pipa, aintiba aeꞌwa nkaupisa abararakenaenaba aboramikiye. To kaꞌwainaba Awamusaꞌamati atokaema aintana pipa, aintiba Awamusaꞌamapisa eꞌwasaenaba maema miyabaꞌmikiye.

⁹Piya puma, taeba aogi yuga pikenaga tayampu peno. Taekita kampa pukubompepa, aeꞌwa ntagaba auꞌwapa aboraramikiye.

¹⁰Piya, kete waintakapa, taeba aꞌyaꞌma kinaꞌmiti aogi yuga aborano. We, imatiti pe kinaꞌmika napima aogi yuga tabera aborano. Poroba maripo yugaraka aꞌmu puntiye

¹¹Pigoya, tabe awaꞌena naene nayapisa kaeyopa aogima agaiyo.

¹²Pigoya, iꞌwaipa wasanami nkiyobi maete ikena kinaꞌmiba igeba ti kasakenaraka uritawe. Piya, igeba mayama napiyewe: Ita araꞌena pukubompepa, Karaisiti mparipora ukubompe kamanatekaba kampa kamaena puratakibewema, napiyewe.

¹³We, pi nkaraꞌena maeya kinaꞌmiba igegeba kampa ago kamanapa aogima wasintawe. Kampaye. Igeba ti kasakibetasa tabe igi maekenaga pewe.

¹⁴We, tonaga wanane. Naeba Waꞌegare Isu Karaisiti mparipo yugara amanaka naꞌmu pukuwe. Piya, pi ntugaraka mampabisaenaba naeka itaꞌataogana puꞌwantiye. Eya, naekeba mampabisaenaga itaꞌnataoga puꞌwantuwe.

¹⁵Piya, tau kasakenawo, kampa kasakenawo, pipa uwaenawe. Eya, aoso kinaꞌamana aborakenaba pipa auꞌwane.

¹⁶Piya, aꞌyaꞌma ma ntapiyena wasiye kinaꞌmiba, igeba taga Isureyo kinane. Pigoya, Koti taga Isureyo kinane. Pigoya, Koti taga Isureyo kinaꞌmiti paruyenabe antaraꞌenawape tigeti waiyeno.

¹⁷Pigoya, kaꞌwainaba to ka kuntaenaba a-nkaboranameno. Kampaye. Isuka naegunta, pi nkaraꞌenaba nauta waintiye.

¹⁸Naoꞌmitaba, Waꞌegare Isu Karaisiti nkawagaena tigutimapi waiyeno. Tagane.Poro piya isa kaentiye.