Read Fore Epesasi 2 Bible Online

Epesasi 2 - Fore bible

Epesasi 2

¹Pigoya, paipa tigeba aiboꞌena puma aguntaena pumagiri, tigupa Kotiti puꞌwantiye.

²Piya, paipa tigeba agasiyaena puma mampabisa kinatagiri, ke kinaꞌmi nkwaꞌega aegaꞌma mintantawe. Piya, ibasa yagaba pi kewamaba Koti kamana akayuma minta kinaꞌmi nkintabaipinti yoga piye.

³We, aꞌyaꞌma taeba paipa pi kinaꞌmige kaga mimagi, paisa tagu iꞌnintanabi mpima napiyenarempape tauꞌamape abugaomentana aegarantompene. Taere piyama mima aꞌyaꞌma to kinaꞌmi pesa puma mima, Koti antota amoꞌena puratakena kina mintantompene.

⁴Tagane. Tae aiboꞌenarempa taeguyoga, puꞌwanta kina kanta puma mintuwakana, Koti nkantaraꞌenawampa pumaewaogana, taeka abugaogana agu kaoꞌena tabera puratama, Karaisitike kaga asiratantine. Eya, Kotiba awagaena puritama tiꞌiye.

⁶Piya, aeba taepa Karaisiti Isuti atokaeratamagina, kaga mantara mikenaga taba puratantine.

⁷Piya, aꞌyaꞌma yaga Koti asugainta awagaenawapa aborawaekibemika, kayonena puratama Karaisiti Isuti atokaetama taba puratantine.

⁸Abewo. Koti awagaena puritama, timatitiꞌenarika tiꞌiye. Tigerinane. Pipa Koti aeꞌwa ntapiyenarasa timiye.

⁹Piya, tiyapisaenaba kampaye. Aꞌyugu ka yagarama au maete isanaga, pipa Koti uwa tamiye.

¹⁰Koti aewa aboraratamagina, Karaisiti Isuti atokaema kasa kina mima tayapisa aogiyena puma mikubompeka, aboraratantine. Piya, pi tayapisa aogiyena pukubompeka Koti paipa utaratantine. Karaisiti ka kinaꞌena puratantiye

¹¹Tigeba abiyo. Yuta kinaꞌmiba igewai nkiyapisa ipa kasawe. Pi kinaꞌmiba tigekaba: To marisa kina kampa ipa kasama kampa abinta kinane, uritawe. Piya, paipa tigeba mono kampa abinta namu kina mimagiri,

¹²pabi ntaga Karaisitipa pagasara atama mintantawe. Tigeba Isureyo kinaꞌmiti abeꞌi mintiri, Koti aborawaekibintanaga uwaimogiripa tigeba kampa abintawe. Piya, Koti tamikenaenagaba kampa napima agawa pumagiri, mampabi uwa mima Kotitiba kampa atokaentawe.

¹³Piya, tigeba paipa pagasara mintiri, ibaba Karaisiti Isuti atokaeyagana, korankatasa ika puma tibabegiri, kanama Koti nkagora miyewe.

¹⁴Piya, Karaisiti aeba agore mimagina, tanta paruyena puma miye. Paipa Yuta kinaꞌmige to marisa kinaꞌmige kamaena puma mintantompekana, ibaba Karaisitiba tupurepa uwa airataye. Piya puma, tara kinapa maema ka kinaꞌena puratantiye.

¹⁵Piya, Karaisiti aewa ntuga pumagina, Yuta kinaꞌmi nkago kamanape aegaranta ariwape maegaintemine. Piya puma, aeba tara kinaꞌmi kamaenarepa kasima, ka kinaꞌena puma paruyena puratantiye.

¹⁶Piya, maripora puꞌmagina, kamaena aꞌya kasima, tara kinapa maema aki puma Kotiti ka auꞌena puratantiye.

¹⁷Pigoya, Karaisiti irosaꞌmagina pagasara mintanta kinape, Koti nkagora mintantompe kinape, paru kamana uramintiye.

¹⁸Piya, Karaisiti ntugarasa ka Awamusaꞌama kaꞌena puratama, tabarempati ikena ki aboraratantiye. Koti nkaegaranta kina aeꞌwa ntamane

¹⁹Pigoya, tigeba ibanto namuꞌisa aꞌyo kana kina kampa mintawe. Tigeba Kotiti atokaenta kinake ka kinaꞌena pumagiri, Kotiti ka tuntana puma Koti ntama kanta puma miyewe.

²⁰Aposoro kinape poropete kinape Koti igepa marukanta puwaitama, Karaisiti Isu aepa waꞌega aetamagina, taepa maema aeꞌwa ntama kanta puratantine.

²¹Piya, aꞌyaꞌma pi ntamankama nkayampu Karaisitita uma asaeratagina, Waꞌegawama nkaota mono nama anosama waikena piye.

²²Pabiyama Karaisitita Awamusaꞌama tigegepa asaeritagiri, Koti mikena namanka aborawe.