Read Fore Epesasi 3 Bible Online

Epesasi 3 - Fore bible

Epesasi 3

¹Pigoya, naeba Porona mima, to marisa kina tigeka Karaisiti Isu nkigaꞌna yagarawantana puma mintuwe.

²We, tigeti: Mono yuga poma, Koti unatama, awagaenawa namemintanaga tigeba agobaya abewema, napiyuwe.

³Piya, Koti kakama waintintanaba uma aborama namoga, pi kamana aronkanto paipa kaema urimintuwe.

⁴Piya, Karaisititi kakanti kamanaꞌamaba napiyenanepipa arawaye. Pipa aisuma abiyo.

⁵Pi kamanaꞌama nkagowapa paipa wasana mirite kananta kinaꞌmiti kampa aborantiye. Ibasa yagaba Awamusaꞌama aota aposorowape poropetewape uwaimegini, aborama uramewe.

⁶Pi kakanti kamanaꞌama nkagoba mayama waintiye: To marisa kina, tigebe taebe ka tu, ka auꞌena puma mimagi, Karaisiti Isu ntugarasa Koti utaratantintanama nkauꞌwapa kaga maemagi mikune.

⁷Pigoya, pi aogi mono kamana uwaimoma, unatantine. Piya, Koti awagaenawapa aboranamimagina, mono yugawata unatama, pika esegiyenawapa namintemine.

⁸Piya, aꞌyaꞌma Kotiti atokaeya kinaꞌmi tu amentapinti mintuwagana, Kotiba awagaenawapa aboranamima: To marisa kinaꞌmiti wama Karaisiti nkaogiyenawaka uwaimoma, unatantine. Piya, pi Karaisiti nkaogiyenawampaba atupe awamobe kampa uma aꞌya wantaꞌenawe. Pika uwaimoma, unatantine.

⁹Eya, Koti paipa aꞌyaꞌwaemaena pumarantana, napiyenawapa aegaꞌma, ainti pukenaena kakantemi, ibaba pi kamanaꞌwapa aꞌyaꞌma kinaꞌmiti aborama uwaimoma, naba punatantine.

¹⁰Piya, Kotiba mantari paitanta kinape esegima mpiye kinape, aogi napiyenawapa iyakikenaga monota aiꞌaru pompe kinaꞌmite abakatepi aeꞌenawapa ibaba aogima aboraye.

¹¹Pika paitakaꞌya Kotiba napima, Waꞌegare Karaisiti Isu, ae yuga piya pukiyema, otama aborantiye.

¹²Piya, aeba Kotiti ikena kitene. Taeba aeti tamatiti potama, tanipa kampa puma, Koti nkaobi aborakenaga taekuruba kampa pukune.

¹³Piya, pika napima abiyo. Nauki nakiyenanempaka aꞌyugu tintawama arusasanaga, pipa kampaye. Tigetaka ataena punatapa, pipa tiyoꞌmaekenaenawe. Poroba Epesasi kinaka nunamu untiye

¹⁴Pigoya, mantarake marake aꞌyaꞌma kina tamata tamata Koti aboraratantiye. Aboraratantemi tabati narakabima, tige aogima mikibeka nunamubisa maya yuwe:

¹⁶Koti tabe eꞌwasaenawatasa Awamusaꞌwapa tintabaipinti pumaeritama esegima asiritanema, nunamu yuwe.

¹⁷Piya, timatiti pigina, Karaisiti tigupi miyaba miyeno. Abuꞌama mabi esegi potagina, esegi pisa puma agu kaoꞌenawapinti esegi piyo.

¹⁸Piya puntiri, aꞌyaꞌma Kotiti atokaenta kinaꞌmige kaga Karaisiti nkagu kaoꞌenawapa tabe, eꞌero, inatibe, mabintibe, agasiyema nunamu yuwe.

¹⁹Piya, agu kaoꞌenawapa wasana abikenaenaba igasima waima waintiye. Piya puma, Kotiti agu pumaema wainti, piꞌna pumaema wairitano, pabiyama tigeka nunamu yuwe.

²⁰Pigoya, Koti nkesegiyenawampa tantabaipinti yogaba piye. Ae esegiyenawatasa aꞌyaꞌma esukenaenarepe napiyenarepe asu agasima, tabena pukena yagara mintiye.

²¹Piya, aꞌyaꞌma monota aiꞌaru pompe kinaꞌmitaba Karaisiti Isuti atokaema mirite kanama, aꞌyaꞌma yagaba Koti nkage asagayuyaba miyeno. Tagane.