Read Fore Epesasi 4 Bible Online

Epesasi 4 - Fore bible

Epesasi 4

¹Pigoya, naeba Waꞌegawama ntugara igaꞌna yagaramana, maya urimuwe: Koti monota utaritama tibabunti, pika napima aogima miyiyo.

²Piya, tige tumima pasema mima, tigaꞌnagi agoya puwaitama, kuntaenawaipa atama agu kaoꞌena puwaitaiyo.

³Awamusaꞌama maema paru puma asaerataika, pika napima kaꞌena puma miyiyo.

⁴Mayaenaba, taeba ka tauꞌena puma, ka Awamusa maema mima, kaꞌenaga agawa puma mintakana Kotiba tababeno.

⁵Piya, Waꞌegaba kaꞌenawe. Tamatitiꞌenaba kaꞌenawe. Monota paitaratakenaenaba kaꞌenawe.

⁶Koti ae kaꞌanto aꞌyaꞌma kinaꞌmite tabarempawe. Aeba aꞌyaꞌma kina asuragasima mima, aꞌyaꞌma kinaꞌmite abakatepi mima, yogawa aꞌyaꞌma kinaꞌmite tayara puma miye.

⁷Piya, Karaisiti napimagina aꞌyaꞌma kinaꞌmitepa tayapisaena abikenaena ka ka tamoga, pika awagaenaba maentune.

⁸Pika mono isaꞌamaba maya iye:Aeba inati intipa, uwoma igaꞌna kina akariyobaꞌma paitawaitama ibabute ima, wasana aꞌmuntanaba imintiye, iye.

⁹Pigoya, pi kamana: Aeba inati intipa, pipa nanaga untiye. Piya, inati abiwapa kampa intana, aeba marupa mabintirakaꞌya tumintemine.

¹⁰Piya, mabinti tumintemi ntagarama, to ae manta abobori ima asugasima, aꞌyaꞌmaena pumaema miyenema intine.

¹¹Pigoya, aeba pabiyaki taya pukenaena aꞌmuntanawa tamintiye. Piya, kaꞌisa kinapa aposoro yugara uwaitantana, kaꞌisa kinapa poropete yugara uwaitantana, kaꞌisa ke iꞌma uwaimikena yugara uwaitantana, to kaꞌisaba pasitorowa, tisawa, suma uwaitantiye.

¹²Piya, Kotiti atokaeyompe kinapa taoꞌmaema, mono yugawapa puma, Karaisiti nkauꞌamaba taepa esegi purataka, Karaisitiba pi aꞌmuntanawapa aboraramintine.

¹³Piya, pi ntugamaba wairite kanama aꞌyaꞌma taeba kanarasama ka tamatiti puma, Koti ntagaragaba kaga aogima ntapima, monoti anosakana, Karaisiti nkesegiyena pumaerataka ae kanta puma mikunompeka aꞌmuntanawa tamintemine.

¹⁴Piya, monota aꞌyugu inamu kanta puma mikune. Piya, kaꞌisa kinaꞌmiba igebinkaobi puma tonarona kamanaꞌwaitasa uma agoꞌena puratakena pewe. Aꞌyugu inamu kanta puma mima kamanaꞌwai abima, esibawama yoni nkaosa aibarara purite nasisa, piyaba aꞌyugu pukune.

¹⁵Pipa kampaye. Agu kaoꞌena puwaitama taga kamanapa yeno. We, Karaisiti aeba aiꞌnerene. Monota anosama esegi puma aeti atokaeyano.

¹⁶Aeti atokaeyokana aki puratagi, ae auꞌwa mpiyokana kabirataye. Piya, taeba aꞌyaꞌma auꞌama nkaukaꞌiba mima, agu kaoꞌena puma utaratanta yugaba aogi pokana, auꞌama anosama aogima asiyune. Mono abe kinaꞌmiba kasa kina miyewe

¹⁷Pigoya, Waꞌegawama nkawamutasa ageꞌma kamana esegima uma aborarimuwe: Piya, tigeba to marisa kampa abinta kina pesapa a-piyo. Igeba kampa aogima napima,

¹⁸abikenaenawaipa airarikaegasawe. Piya, igeba Kotiti igupa akumpaꞌmagini kampa napinta aiboꞌena puma Kotige mikenaenaba ikaꞌintaesi potama,

¹⁹inintanaba kampa punta kupiyona puta nasimagini, iꞌnintanabinti ubaiꞌma aꞌyaꞌma tonarona kamparagaenaba pewe.

²⁰We, tigeba Karaisitintanagaba kampa abima piyaba pewe. Kampaye.

²¹Naeba ago abuwe. Isuti tagantanaba waintikaba, aogima pi kamanapa urimuguri, tigeba ago abintawe.

²²Piya, tigeba paisa timawama ntugaba kasiyo. Paipa tiyobi airarikaema ataenaga abugama, pintanama maema ata puritantiye. Piya, pi paisaenaba kasiyo.

²³Piya, napiyenarimpaba kasaꞌena pekiri,

²⁴tigeba kasa kina aboraiyo. Piya, tigeba Koti ae aoga pumaranti kina aota arupu puma taga kasa kina aboraiyo.

²⁵Pigoya, tigeba kumpariꞌenaba kasimagiri tiyoꞌmige asi nasi taga kamana uma miyiyo. We, taeba ka tau mintune.

²⁶Piya, timoꞌena puntiripa aogima kabiyiyo. Aꞌyugu aguntaena pukibewe. Aꞌyugu timoꞌena uwa waintakana papa tupasikiye.

²⁷Aꞌyugu kewama kabi aꞌwaikibewe.

²⁸Kuntana piꞌnaba to kakema kuntanaba a-peno. Kampaye. Ibaba aewa nkayapisa aogi yuga puma, kaꞌisaena kampa wainta kinapa iyoꞌmaeyano.

²⁹Tiwamupisaba ata kamana aꞌnkaborano. Kampaye. Wasana iyoꞌmaekena kamanaꞌamana nkaborano. Piya puma, kamanatitasa abe kinaꞌmiti awagaenamana nkaborama iyoꞌmaeyano.

³⁰Tigeba Koti Nkaota Awamusaꞌamapa kuntaenaba a-nkamiyo. Piya, aeba arupu puritakena yagagaba araꞌena puritantiye. Kuntaenaba a-nkamiyo.

³¹Piya, tigeba aꞌyaꞌmaena tinta tikikenaenabe, ka ibirakenaenabe, timoꞌenabe, tabera ata kamana ukenaenabe, kamana uma akaya ukenaenabe, aꞌyaꞌma to ataenabe, kasiyo.

³²Kasimagiri, tiyoꞌmipa kayone puwaitamagiri, agu kaoꞌena puwaitaiyo. Eya, Karaisititi atokaeyaka Kotiba aguntaenaripa asuꞌa purigasisa puma, tiyoꞌmipa pabiya puwaigasiyo.