Read Fore Epesasi 5 Bible Online

Epesasi 5 - Fore bible

Epesasi 5

¹Pigoya, tigeba Koti nkabugai ntakarantontowampitaba, ae pemisa puma miyiyo.

²Karaisitiba agu kaoꞌena puratasa puma, tigeba wasana agu kaoꞌena puwaitama miyiyo. Piya, taeka aeꞌwa nkaumawapa meru kasima, Kotiti muta atama iga agunta asu abasantiye.

³Piya, Kotiti atokaeya kinaꞌmitaba, tigeba kumiyenabe, aꞌyaꞌma iꞌnintanabe, to wainantanaga abugakenaenabe, tikabitaiyo. Aꞌyugu pika kamanapa aborakiye.

⁴Piya, aꞌyugu tigeba iꞌni kamanape, aibo kamanape, karana kamanape usanaga, aogima kabima mima Kotiti tiꞌmu potaigina kanarasano.

⁵We, tigeba ago abintawe. Kumiyena pe kinape, iꞌnintana pe kinape, to wainantanaga abugai kina igeba ama koti nkaegara kinape, igeba Karaisitige Kotige kabiratakenaenawaisipi kampa ubasikibewe.

⁶Aꞌyugu wasana ampa esiba kamana uma iga puritaigiri aegarakibewe. Pika aogima kabiyiyo. Pika kamana akayuye kinaꞌmiti Koti amoꞌenawapa antota aborawaimikiye.

⁷Piya, igegeba agaya agayaba a-piyo.

⁸Eya, paipa tununtanabi mintantawe. Ibaba tigeba aꞌwae puma Waꞌegawamati atokaema eꞌwasaenawata miyewe. Piya, eꞌwasa kina kanta puma nasiyo.

⁹Piya, aꞌyaꞌma aogiyenabe arupuyenabe tagantanabe, pipa eꞌwasaenama nkaꞌwane.

¹⁰Piya, tigeba aogima nasima, Waꞌegawama nkabugaintanama nkaꞌwapa aboraiyo.

¹¹Pigoya, tununtana pe kinaꞌmi ntugaba a kampa aema yugawe. Piya, igegeba kaga pi ntugaba a-pumagiri arantaꞌenara agowaipa aborawaitaiyo.

¹²We, kakama uma pugasantanama nkawaga kamana usanagaba nani ntabiye.

¹³Pigoya, eꞌwasaenamaba aꞌyaꞌmaenama nkagoba aboramagina age atakenaenawe. Aborama age atakana eꞌwasa pukiye.

¹⁴Pika mono isapi Kotiba maya iye:Ibanto waitamintampe ntagara, karuꞌena kaogama purintapisa asiyegana, Karaisitiba eꞌwasaena kameno, iye.

¹⁵Piya, nasikenaenaripa aogima kabima nasiyo. Napiyena kampa wainta kinaꞌmi ntasisuba a-puma, abinta kina kanta puma nasiyo.

¹⁶Piya, ibasa yagaba aguntaenaba pumaema waiyegiri, aogima kabima mima Kotintanaba maema piyo.

¹⁷Piyama tigeba a-nkaiboꞌnabo puma mimagiri, Waꞌegawama nkabugaintanaba abima aegaraiyo.

¹⁸Tigeba uwaena waini wanipa a-ntama aiboꞌnabopa a-a-piyo. Kampaye. Pintanamaba ata puritaya, tigeba Kotitisa Awamusa maeyigina, aeba pumaeritano.

¹⁹Piya, tigeba tiyoꞌmige mono kamana uma, mono inibe, ibasa inibe, kasa inibe tiyoꞌmige uma, tigupi Waꞌegawamati ini uma, tiꞌmu potaiyo.

²⁰Eya, aꞌyaꞌma yagaba tigeba aꞌyaꞌmaenagaba tabarempa Kotiti tiꞌmu potamagiri, Waꞌegare Isu Karaisiti nkagera uma esegi potaiyo. Waya waena pe kinaꞌmi kamanane

²¹Tigeba Karaisiti nkagegaꞌe asagaꞌyuma tiyoꞌmi nkimentanti miyiyo.

²²Wayapa, tiwaegi kamana wasima miyiyo. Piya pukibepa Waꞌegawama kamanapa wasima mikibewe.

²³Piya, monota aiꞌaru pompe kinapa Karaisiti nkauꞌwa mintokana, aeba tauꞌikena yagara mintiye. Piya, Karaisitiba mono kinaꞌmi nkaiꞌnewai mintisa puma, waba wayaꞌmi nkaiꞌnewaine.

²⁴Piya, monota aiꞌaru pe kinaꞌmiba Karaisiti nkawamu wasiyesa puma, wayaꞌmitaba, aꞌyaꞌma tiwaegi kamanapa wasiyiyo.

²⁵Waba, tigeba wayatipa agu kaoꞌena puwaitaiyo. Karaisitiba monota aiꞌaru pompe kinakaba aeꞌwa nkaumawapa meru kasima, agu kaoꞌena puratantisa puma, wayatipa agu kaoꞌena puwaitaiyo.

²⁶Piya, Karaisiti aeba piya puma mono kinaꞌwapa aeyoba tagasogana wani pasisu puma kamanaꞌamabeba kaꞌmasa pumagina, aota kinaꞌwantana puratantiye.

²⁷Piya, monota aiꞌaru pompe kinaꞌmitepa ae aoriba eꞌwasaenaba aboraratamagina, monoꞌamaba iꞌnintanabe aowapisipasiyenabe to kanaenabeba kampa waima, aota waima kampa ataba penema aboraratama, aeꞌwa mputa nataiyoma puratantine.

²⁸Piya, Karaisiti kabiratasa puma, wamitaba wayatipa agu kaoꞌena puwaitaiyo. Titi kabiyesa pumagiri wayatipa kabiwaitaiyo.

²⁹Piya, kaꞌwainaba aeꞌwa nkaupa kamaba kampa potaye. Kampaye. We, taeba Karaisiti nkaupa mintokana, mono kinaꞌwata kabirataisa puma wasanaba aeꞌwa nkaupa nakena amima aogima kabitaye. Piya pemisa puma wayatipa kabiwaitaiyo.

³¹Pikaba mono isaꞌamaba maya iye: Wasanama ano aba atate wayake wage kabobuma isigeba ka isiꞌena pese, iye.

³²Pi esegi kamanapa nae napiyopa mayamawe: Isigeba ka isiꞌena pemesa puma, Karaisitibe monota aiꞌaru pompe kinaꞌmitabe ka tauꞌena puma mikune.

³³Pigoya, tigeba ka ka maya piyo: Tigeba titi kabiyesa puma wayatipa agu kaoꞌena puwaitaiyo. Piya pigiripa, wayaꞌmitaba, tiwaegi nkigegaꞌe asagaꞌyuyiyo.