Read Fore Epesasi 6 Bible Online

Epesasi 6 - Fore bible

Epesasi 6

¹Araga yagara, tigeba Waꞌegawamaka napima tino tibagi kamana abima wasiyiyo. Pipa arupuyenawe.

²Piya, mono isaꞌamaba maya iye: Kaeba kano kaba kamanapa aegarao, iye. Pigoya, pi nkakumparanta kamanapa aeba marupa aogi antotaꞌena wantagane.

³Pi nkantotaꞌenaba mayamawe: Piyama aegarakibempepa, kaeba aogima mintanapa mampara eꞌerota mikibene, iye.

⁴Ibagitaba, araga yagararipa imoꞌena pusanaga tigobipa a-puwaitamagiri, Waꞌegawamantana abima wasikenaenaga kabiwaitaigina anosaiyo. Yoga kinaꞌmike kiya kinaꞌmike kamanane

⁵Kayokaya, tigeba mabisa tabe kinatimpi nkiwamupisa kamanapa wasiyiyo. Tigeba tiyekuru puma aogi arupu puma mima, Karaisititi yoga piyo.

⁶Aꞌyugu sepena puma wasanami nkiyora tabe yuga pusanaga aogima kabima mimagiri, Karaisiti kayokayaꞌena puma Koti nkabemintanaba tigutasa aegaꞌma miyiyo.

⁷Piya, yoga puma wasanamiti wanane. Tigeba aogi tintabarima Waꞌegawamati aogi piyo.

⁸Eya, tigeba ago abintawe. Wasanamaba aꞌyaꞌmaenaba aogiyenamana pukibipa, pabiya puma Waꞌegawamaba antotaꞌenaba aogiyena amikiye. Kayokaya kinape uwa kinape kaꞌmasa nkika imikiye.

⁹Tabe kinaꞌmitaba, tigeba pabiya puma kayokaya kinatimpi nkiyekuru pukenaena a-puwaitama kayone puwaitaiyo. Tigeba aogima abiyo. Tigebe igebe kaga Waꞌegaripa mantabinti mintiye. Piya, aeba tabe agi wainta kinape uwa kinape kaga antotaꞌena imikiye. Karaisitiba iregutene

¹⁰Pigoya, ka kamana amato puma ukuwe: Tigeba Waꞌegawamati atokaema esegi puma miyigina, agasiya esegiyenawapa pumaeritano.

¹¹Piya, tigeba aꞌyaꞌma Koti tamemi mpaꞌena kairipa maema piyo. Piya pukibepa, tigeba kanara asima esegi puma, kewama nkagoꞌenawapa aibasanakibewe.

¹²Eya, wasana ibimanapa kampa kamaenaba pune. Kampaye. Amani paitanta kinaꞌmige, esegiyena pe kinaꞌmige, mampabi tununtanara kabintemi kinaꞌmige, aꞌyaꞌma mantarasa agunta pe kinaꞌmigeba kamaba peno.

¹³Piya puma, aꞌyaꞌma maꞌena kairi Koti timemipa maema puma, agunta aborakibi ntagaba kanara asima esegi puma pi kinaꞌmigeba kamaena aogima pukibewe. Piya, nagarima asu igaikibeka maꞌena kairipa maema piyo.

¹⁴Eya, tigeba asimagiri, tikapi tagantana maema amimagiri, arupuyenama nkiꞌana tibira atamagiri,

¹⁵Koti nkaogi paru kamana uma aborawaimikena tigisa anapa maema pumagiri,

¹⁶asi nasi timatitiꞌena iregutipa maema arakaebiyo. Piya, kewamanta yaku tanta iriyamaba pi iregutapa ampa pagonkosaꞌnama tuꞌma wakiye.

¹⁷Koti tauꞌikenaenarasa maꞌena taminokuꞌena maema pumagiri, Awamusaꞌamanta paroya ntoginkapa maema uriyo. Pi paroya ntoginkapa Koti kamanane.

¹⁸Piya, asi nasi nunamuba yiyo. Awamusaꞌama nkabemintana aegaꞌma Kotiti esotama nunamu yiyo. Aꞌyaꞌma yagaba tiyogama tiyekita pusanaga aogima kabima mimagiri, aꞌyaꞌma Kotiti atokaeya kinaꞌmikaba esotaiyo.

¹⁹Tigeba naekegaba nunamu yiyo. Piya, Kotiba naekuruyenanepa kasima nawamupa aerarayeka, ae aogi kakanti kamanapa uma aborakenaga naeka nunamu piyama yiyo.

²⁰Naeba aogi agoya kamanaꞌwa ukena yagaranaga, naeba pika igaꞌnabipa mintuwe. Piyama nunamuba Kotiti unataigi, naekuruyenanepa kasimagi kamanaꞌwapa uma aogima aborano. Uma nagarikena kamanane

²¹Pigoya, mikenaenanekabe pukenaenanekabe agowapa Tikikasiba urimikiye. Aeba tabugai taoꞌyagara, Waꞌegawama nkawamu wasima kayokaya yagara, aeba naekaba aꞌyaꞌma urimikiye.

²²Pika naeba ataogana tigeti waye. Piya, taekaba ayama mintawema umagiri napiyiyoma, tinta esegi puritakenaga tigeti waye.

²³Pigoya, Koti tabage, Waꞌega Isu Karaisitige, isigebisa paruyenabe agu kaoꞌenabe mono kinaꞌmititi waiyekana, timatitiꞌenaba kaga aborarimeno.

²⁴Piya, aꞌyaꞌma Waꞌegare Isu Karaisiti kampa tikabitanta tibugai kina, tigeti awagaenawapa waima waiyeno.Poro piya isa kaentiye.