Read Fore Piripai 1 Bible Online

Piripai 1 - Fore bible

Piripai 1

¹Poronage Timotige, Karaisiti Isu kayokaya yagarara mimagira, tasigeba ma nkisapa kaeyuse. Piripai kumatasa pasitori kinape, tikeni kinape, aꞌyaꞌma Karaisiti Isuti atokaeya kinape, tigeti ma nkisapa kaeyuse.

²Pigoya, tabarempa Koti, Waꞌega Isu Karaisiti, isigetisa awagaenabe paruyenabe tigeti waiyeno. Poro igaꞌna namapi mpima pi kinaꞌmika nunamu untiye

³Pigoya, aꞌyaꞌma tigeka napiyo ntagaba naeba Kotinempati naꞌmu potauwe.

⁴Aꞌyaꞌma yaga tiyoꞌmaekenaga nunamu yopa, naeba naꞌmuntanabisa nunamuba yuwe.

⁵Tigeba marusa yaga kamana abima, taege ampa atokaemagiri, aꞌyaꞌma yaga aogi kamana uwaimikena yugara miyekaba, naeba naꞌmu puwe.

⁶Piya, naeba ago abintuwe. Aogi yuga tigeti agobinti ntagara Koti, aeba tabubasanata iyabaꞌmima ainti Isu Karaisiti kanabi, pi ntugawama nkauꞌwapa aogima aborakiye.

⁷Owe, naeba piyamaba aꞌyaꞌma tigeka naꞌmu puritakenaenaba, pipa aogi piye. Piya, paipa mono kamanaꞌama nkagoba esegima aborauwagiri tigeba naoꞌmaemagiri, awagaenawapa naege kaga maeyawe. Piya puma ibaba naeba igaꞌna namapi mintogiripa, tigeba awagaenawapa naege kaga maeyawe. Pika naeba nantabaipintiba tirakuꞌma upebe puma naꞌmu puritakenaenaba aogi piye.

⁸Piya, Koti abintegi, naeba taga kamana yuwe. Karaisiti Isu nkagu kaoꞌenawampa tutusunatagina tigeka nabugaye.

⁹Pigoya, naeba piyama nunamu yuwe: Tigeba aogi abikenaenabe uwaena napiyenabe maeyigina, agu kaoꞌenarimpaba anosaurite wagana pikiyema, nunamu yuwe.

¹⁰Piya, aogi napiyenaba maentiripa aꞌyaꞌmaenaripa aꞌyigimpa, arupuyenagaba owe uma mikibewe. Piyama mikibepa, tigeba Karaisiti aborakibi ntagaba kampa iꞌni kina miyigina, Koti nkaobipa kampa kamanatipa waikiye.

¹¹Piya puma, arupuyenama nkauꞌwapa Isu Karaisititisa tigeti pumaeritakiri, Kotiti tiꞌmu potama ae ageba asagayukibewe. Poro igaꞌna namapi mintogana mono kamana wagana puntiye

¹²We naoꞌmitaba, tigeba aogima abiyo: Naeti aboraintanamaba mono kamanapa kampa akuniye. Kampaye. Pipa uwa aoꞌmaerite waye.

¹³Piya, naeba Karaisiti nkagegaꞌeraka igaꞌna namapipa mintuwe. Pipa aꞌyaꞌma kiya yagarama ntamata kabiye irebu kinaꞌmiba aꞌyaꞌma to kinape, igeba abintawe.

¹⁴Piya, naeba igaꞌna namapi mintogini, pika uwaena mono kinaꞌmiba napima Waꞌegawamatisa to esegiyenaba maema, iyekuruyenaba kasima, Koti kamanapa esegima uma aborawe.

¹⁵Tagane, kaꞌisamiba nae nageba maete tumimagini igewai nkige maete ikenaga, Karaisiti kamana uma aborawe. Piya pegini, to kaꞌisamiba aogi napiyenawaitasa Karaisiti kamanapa uma aborawe.

¹⁶We, ma mima mono kamanaꞌama nkagoba aboraoma unatantika, pi aogi kinaꞌmiba abima, agu kaoꞌena punatama kamanapa uma aborawe.

¹⁷Piya, to kaꞌisamiba kampa arupu puma igewai tabe igigaꞌe uma aboramagini Karaisiti kamanapa uma aborama, igaꞌnanepi to kaꞌisa kuntuyena punatakena pewe.

¹⁸Pipa aerawane. Anagiꞌena napiyewo, tagantana napiyewo, Karaisiti kamanaꞌama nkagoba uma aborakena peka naꞌmu puwe. Eya, naꞌmu puyabaꞌmima mikuwe. Poro mikenaenawapa Karaisititi atokaekenaenawe

¹⁹Pigoya, naeba ago abuwe. Tigeba nunamu uma naoꞌmaeyakana, Isu Karaisiti nkawamusaꞌama esegi punatakana, ibaba aboranamemintanamaba kampa ataba punatama uwa naoꞌmaekiye.

²⁰Piya, to aboranamikibintanaga aobi puma kabima mimagi, ago napiyopa aintiba uwaenantoba kampa nanipa pukuwe. Kampaye. Naeba aꞌyaꞌma yaga posa puma, aintiba kampa naekuru pekana, naogama misuwo, puꞌwasuwo, nauꞌnempaba Karaisiti tabe agegaꞌeba asagayukiyema, napiyuwe.

²¹Eya, naeba abuwe. Mikubopa, Karaisititi atokaekenaenaba mikenaenanene. Puꞌwakubopa, aogiyenaba maekuwe.

²²Piya, naeba mampabi uwa mikubopa, yoganempaba aꞌwapa aekiye. Piya, puꞌwasuwo, uwa misuwo, naeba ayabaya pukuwe. Naeba kampa abintuwe.

²³Naeba pi taraenagaba aogi nanta paruwe. Pikaba naeba maba atate Karaisitige umisanaga nabiye. Pipa asugasaye.

²⁴Pigoya naeba abopa, mampabi naeba mintapa, aogima tiyoꞌmaeyakana kanarasakiye.

²⁵Pika naeba esegima abibebe puwe. Naeba uwa mima tikapi yoga puma kanarasaritakiri, timatitiꞌenabe tiꞌmuntanabe to kake aborakibewe.

²⁶Piya, naeba to kake tigeti uma irosakuwe. Pika tigeba tiꞌmu punatama, Karaisiti Isu nkage asagaꞌyuyeno. Monota esegima mpiyiyo

²⁷Pigoya, ke nasentanarimpaba arupu pekiri, Karaisiti nkaobi aogi kamanawapa aegaꞌma miyiyo. Eya, kampa tigasuwo, uma tigasuwo, ka tintabarima misanaga nabiye: Tigeba kaga esegima mimagiri ka napiyena puma ankaoꞌmae ankaoꞌmae puma aogi kamanata imatiti pusanaga yogaba esegi puntiri,

²⁸kama kinatimpika tiyekuruba a-piyo. Pika abisanaga nabiye. Eya, kampa tiyekuru pentanaba pipa Kotitisa awameꞌenawe. Piya, pipa tigeti ima ige iyeguma kaikena awameꞌenawe.

²⁹Piya, Kotiba Karaisiti ntugaraka timatitiꞌena potakenaena manapa kampa timiye. Kampaye. Aeba timatitiꞌenabe tikinakiyenabe kaga timima ae yugawa piyoma timiye.

³⁰Piya, paipa kunta yuganepa agantakiri, to ibaba pabiyamagiri nawaga kamanapa abewe. Pi ntugaba tigeba pabiyama kaga pewe.