Read Fore Piripai 2 Bible Online

Piripai 2 - Fore bible

Piripai 2

¹We, tintabaipinti Karaisititisa esegiyenawapa maemagiri, agu kaoꞌena puma tutusuritagiri, Awamusaꞌamati atokaemagiri, to kinaꞌmikaba agu kaoꞌena puma tintaraꞌena puwaitawe. Pintanaba kanarasaye.

²Piya pepa, tigeba ka tintabarimagiri, agu kaoꞌena kaga pumagiri, kaꞌmasa puma mima, ka tintabarima miyiyo. Tigeba piya pukibepa, naꞌmuntananempaba pumaewakiye.

³Piya, tigeba tigeꞌena manakaba a-ntapimagiri, tipa a-mpaete iyiyo. Pipa kampaye. Tigeba tipa maete tumima to kinaꞌmikaba: Tagasawema, napiyiyo.

⁴Tigeꞌenaena manatipa a-kabiyiyo. Pipa kampaye. To kinaꞌmintanarapeba kaga kabiwaitama iyoꞌmaeyiyo. Karaisiti ntapiyenara aegaraiyo

⁵Pigoya, Karaisiti Isu napiyisa puma, tigeba kaꞌmasa puma napiyiyo.

⁶Napiyenawapa mayamawe: Piya, aeba Kotirakaꞌya mintemipa, Kotige kaꞌmasa puma mikenaenagaba kampa antageꞌenaba puma ageba maete tumiye.

⁷Aeba mikenaenawapa kaitegina, wasana aborama kayokaya kinaꞌmi nkiyoga puntiye.

⁸Piya puma aborama, aeba wasanarakaꞌyantana puntiye. Piya puma aeꞌwa nkaupa maete tumima, Koti nkawamu wasirite wamagina purometa uma nagarintiye. Eya, awamu wasima maripo yara purintiye.

⁹Pika Kotiba inata asitama, ae ageba aꞌyaꞌma kinaꞌmi nkigeba asu agasima to agi omintiye.

¹⁰Pi nkagi omintipa, pipa aꞌyaꞌma mantarisa kinape mabisa kinape mawama amentapintisa kinape, igeba kaga Isuti irakabima mima, ae agegaꞌe uma asagayukibewe.

¹¹Piyama aꞌyaꞌma kinaꞌmi nkiwamupisaba: Isu Karaisitiba Waꞌegawe, ukibewe. Piya ukibepa Koti taba nkagegaꞌeba asagayukibewe. Tigeba wasanami nkikapi eꞌwasaena puwaitaiyo

¹²We, nabugai kinaꞌmitaba, paipa tigeba aꞌyaꞌma yaga nae nawamu wasintasa puma ibage pabiyama piyo. Pai mintanto ntaga abiwanane. Ibaba kampa tigege mintakubo ntagageba kakema tabera wasimagiri, tigeba tiyekuru puma tabaraba puma Koti tiꞌikenaenama nkauꞌwaka napima esegima aboraiyo.

¹³Piya, ae aꞌmuntanaga tibekiri, yoga pukibeka Koti tikapinti yoga puma tutusuritaye.

¹⁴Piya, aꞌyaꞌmaena puntiripa, a-tiyekita puma kamanapa a-nkakayuyiyo.

¹⁵Tigeba pabiya pukibepa, parutu kina miyigina Koti nkaobi kamanatipa kampa waikiye. Piya puma mima, tigeba Koti ntagara kanta puma mima, kampa aogima napima antage pe kinaꞌmi nkikapi mima, e kanta puma eꞌwasaba puwaitaiyo.

¹⁶Eya, miyabaꞌenama kamanapa uwaimimagiri eꞌwasa puwaitaiyo. Piya pigipa, Karaisiti kanabipa naꞌmu puma mayama napikuwe: Tigeka naeba uwa yugaba kampa puma esegiyenanepa kampa uwaba maebugasuwema, napima naꞌmu pukuwe.

¹⁷We, timatitiꞌenari tabera puma Kotiti titipa muta atawe. Pigoya, naeguyigina korantepa tumima tigeꞌenage kaga Kotiti muta atakiye. Pipa kanarane. Pika naeba nanta asoyaena puma tigege naꞌmu pukuwe.

¹⁸Piyama, tigegeba tinta asoyaena puma naege kaga taꞌmu peno. Timoti kamanane

¹⁹Pigoya, Waꞌega Isu abekana kanarasakapa, uwaena yaganto Timotipa otakana tigeti wakiye. Aeba wama tigategina to aꞌwae puma kanama tigekaba ampa unamekana, nantawamaba aꞌmuntanaba pikiye.

²⁰Eya, Timoti aeba asi nasiba tigeka napima aumarasa esegi puritakena piye. To kapa ae kanta yagaraba naegeba kampa mintiye.

²¹Piya, aꞌyaꞌma to kaꞌisa kinaꞌmiba igewaintanara amana kabintini, Isu Karaisiti ntugarapa kampa aogima kabiyewe.

²²Piya, Timoti aeba mono kamanataka, yagara abawampa aoꞌmaeyisa puma naoꞌmaema yogaba piye. Pi nkagowapa tigeba abintawe. Aeba aogi yagarawe.

²³Pigoya, naeba marupa naeti aboramintanaba ago agagaitegintema karuꞌena aepa tigeti agarubakana wakiyema, napiyuwe.

²⁴Piya, naeba Waꞌegawama ntapiyenaga nabegina, ke iremika naegeba aro ntaganto ampa tigasanagaba nabiye. Epaparotaitasi kamanane

²⁵Pigoya, naoꞌyagara Epaparotaitasiba, pai tigeba agarubauguna naeti kanama tigegaꞌerapa naoꞌmaenti ntagara, aeba naege ka yuga puma, kama kinaꞌne kanta yagara mintiye. Aepa ago agarubakana tigeti wanema napiyopa, to kipa kampaye.

²⁶Piya, yoni nkabogiri awaga kamana abuguna tintaraꞌena abuma kunta piye. Piya puma, aseyonabisa uma tigakena piye.

²⁷Tagane. Paipa aeba yoni nkabuma purikena pogana, Koti antara potama aoꞌmaentiye. Piya, Kotiba ae abiwa antara potantiyanane. Kampaye. Aeba naeke antarapa punatantine. Aeba tabe kuntuyenama nairarikaesanagaba kampa abogana naoꞌmaentiye.

²⁸Piyama nae nabugamika otakana wakiri, tigeba agama tiꞌmu pigina, kuntaenanekeba maete tumenomawe.

²⁹Piyama tigeba tiꞌmu puma Waꞌegawama nkageraka aepa aba piyo. We, tigeba piya kinaꞌmi nkigegaꞌeba asagayuyiyo.

³⁰Piya, aeba yogaripa naeti ampa aboramagina, aogama misanagaba aeba kampa napiye. Kampaye. Kampa napimagina, aeba Karaisiti ntugaraka purikena puntiye. We, piya kinaꞌmi nkigeba asagayuyiyo.