Read Fore Piripai 3 Bible Online

Piripai 3 - Fore bible

Piripai 3

¹We naoꞌmitaba, naeba maya kamana uma aꞌya pukena puwe: Tigeba Waꞌegawamaka tiꞌmu piyo. Naeba to kakema kaema timikenaga kampa kuntaba nabegi esegi puritakena puwe.

²Pigoya, ata yuga pe kinaꞌmiba, igeba kabu kara kanta puma mima, wasanami nkipa kasama araꞌenaba uwa puwaitawe. Pi kinaꞌmikaba aogima kabima miyiyo.

³We, Koti Nkawamusaꞌama taoꞌmaeyagi, Karaisiti Isu nkageba asagayuma tautepa kampa maete iyompe kinaꞌmitaba, taeba taga araꞌenawapa maeyune.

⁴We, naegeba nauꞌnepa maete iyosinta, wasanami nkiyobi kanara maete iyosine. Piya, to kaꞌwaina au maete iyekapa, naeba asugaikuwe.

⁵Piya, naeba aborama mintuwagana, papa tonaentisa kakaga umaeyogana naupa kasanta, naeba Isureyo yagaranawe. Naeba Penisameni pi tuntawe. Yuta kinaꞌmi maꞌnatanta, Yuta ago yagaranawe. Naeba Koti nkago kamana aegarao, Parasi yagaranawe.

⁶Naeba Koti ntuga puwema napima, asagarare puma Isu mponota aiꞌaru pume kinapa karana puwaitamagi, Yuta yagara aogima mintantuwe. Piya, mono ago kamanaꞌama nkarupuyenaraka naeti kamanapa kampa aborantine.

⁷Pigoya, aꞌyaꞌma pintanarasa tabe nagiba maentopa, pipa anagiyenawe. Karaisititi atokaekenaenama asugasayema abuwe.

⁸We, aꞌyaꞌma tonaba anagiyenawema napiyuwe. Piya, Waꞌegane Karaisiti Isu ae agoba abibebe pukenaenanaba aꞌyaꞌma tonamapa asugasaye. Piya, aeka aꞌyaꞌmaenanekaba iꞌnintanawema napimagi kaintone. Eya, naeba Karaisiti nkarakuꞌma upebe puma,

⁹aeti atokaekenaga tabe naginepa kaintone. We, naeba ago kamanapa aegaꞌma arupu nagiba kampa maeyuwe. Kampaye. Naeba Karaisititi namatiti pogana, pi ntamatitiꞌenagaba Koti aewapa: Arupu yagaragawe, unataye.

¹⁰We, naeba Karaisiti nkagoba aogima abibebe pukena puwe. Piya, ae asikena esegiyenawapa naeti aborasanaga nabiye. Piya, ae auki nakiyena abuntisa puma naepa pabiyama nabeka, ae purinti nkagoba aogima abima kaꞌmasa pusanaga nabiye.

¹¹Piya, naeba purintapisa asima aota kina misanaga nabiye. Poro esegima ntasima aogi antotaꞌena maekena puntiye

¹²Pigoya, naeba purintapisa asinti nkeꞌwasa kampa ago maema, kasa mima aota kina kanta naeba kampa puma mintuwe. Pipa kampaye. We, aota misanaga nabiye. Piya, Karaisiti Isuba naba puma: Naeꞌenawe, unatantika, naeba ae aobi aota kina abora misanaga esegima ntasuwe.

¹³We naoꞌmitaba, naeba piyamapa kampa aborauwe. Pigoya, naetiba ka napiyena waintiye: Piya, naeba pai putontanaba nakaꞌi kaitegi, naeba ainti aborakibintanaga esegima karusuwe.

¹⁴Piya, naeba kampa migarama esegima karusuma aꞌimarantaꞌenari wama, Karaisiti Isu nkaꞌmuntanawapa mantabinti maekena puwe. Pintanaraka Kotiba uta marantine.

¹⁵Piya, aogima ntapiyena wainta kinaꞌmitaba, pi aota kiꞌiba aegarano. We, tigepisa kaꞌwaina to ka napiyenaba aborakibipa, Kotiba agowapa aogima urimima arupu puritakiye.

¹⁶Piya, ka kita kanantompe, pabiyama wano.

¹⁷We naoꞌmitaba, paitaritakiri nagamagiri nae posa piyo. Piya, tae miyompesa puma miye kinapa igama iyegaraiyo.

¹⁸We, paipa uwoma ntagaba tigepa kaꞌisa kinaꞌmikaba kamana urimima, to kake naoꞌnu pagegi urimuwe. Piya, uwaena kinapa Karaisiti mparipowamapa kamaena potama mintawe.

¹⁹Igeba iꞌama ntapiyena aegaꞌma kotiwai kantaba pewe. Igeba inintanawaimpa asagayuma iꞌmu pewe. Igeba mabisaenaga napiyewe. We, pi kinaꞌmiba purikena kiꞌi wawe.

²⁰Pigoya, manta ago kinatawe. Taeba kabintakana, Waꞌega Isu Karaisiti mantaba kaite tumpa tauꞌima taba pukibika, agawa puma mintune.

²¹Piya, aeba pi ntagaba iꞌninkamana tauꞌamaba aeꞌwa nkauꞌama pisa puma aꞌwae puma kaga eꞌwasa pukiye. Aeba piyama aꞌyaꞌwaemaena kabiratakena esegiyenarasa eꞌwasa puratakiye.