Read Fore Piripai 4 Bible Online

Piripai 4 - Fore bible

Piripai 4

¹We naoꞌmitaba, naeba agu kaoꞌena puritaogana, naguꞌamaba tigeka abugaye. Tigeba naꞌmuntana antotaꞌenane mpintawe. We, nabuga kinapa, tigeba piyama Waꞌegawamati atokaema esegima miyiyo.

²Pigoya, Yuwotiyawa, Sintikiwa suma, tisigeba Waꞌegawamati atokaema ka napiyena piso.

³We, ka yuga pome taga naoꞌyagaraba, naeba mayama ugamuwe: Kaeba pi tara wae taraba isiyoꞌmaeyo. Isigeba naebe, Keremenibe, to kaꞌisa igewaipa miyaba isapi wainti kinaꞌmibe, isigeba kabo puma mima mono kamana yugaba pese. Pi tara wae tara isiyoꞌmaeyo.

⁴Tigeba Waꞌegawamati atokaema tiꞌmu puyaba miyiyo. Naeba to kakeba yuwe: Tigeba tiꞌmu piyo.

⁵Pigoya, Waꞌega aborakenaenamaba agarosaye. Tigeba paruyena puma miyigina aꞌyaꞌma kinaꞌmiba tigaiyo.

⁶Tigeba tonaronagaba a-tiyekuruba piyo. Pipa kampaye. Tigeba aꞌyaꞌmaena pintanagaba Kotiti tiꞌmu puma nunamurasa esotaiyo.

⁷Piyama esotaiginaba, Karaisiti Isu ntugarasa Koti nkanta paruyenamaba tintarape napiyenaritape aogima kabikiye. Pi anta paruyenamaba aꞌyaꞌma kinaꞌmi ntapiyenaba igasaye.

⁸We naoꞌmitaba, ma kamanapa piya uma nagarikena puwe: Aꞌyaꞌma tagantanabe, aogi napiyenabe, arupuyenabe, apuyapukenaenabe, tikaenabe, aogi agigaꞌe ukenaenabe, aꞌyaꞌmaenama asugaikenaenabe asagayukenaenabe waintika, piyaenagaba tigeba napiyiyo.

⁹Piya, nae uriminto kamanapa abima aegaꞌmagiri, agonepa agama abewe. Pintanaba wasima miyiyo. Piya piginaba, agoya Koti tigege mikiye. Poro paenabisa Piripai kinaꞌmiti aꞌmuntana imintiye

¹⁰Pigoya, ibaba tigeba naeka to napiyenaripa aboragi, agama naeba Waꞌegamatiba tabera naꞌmu puwe. Piya, tigeba asi nasiba naekaba napintapa, naoꞌmaekena kitipa kampa waintantiye.

¹¹We, naeba kaꞌisaenaga kusi puwe, piyaba kampa yuwe. Pipa kampaye. Naeba mayama ago abuwe: Tonarona naeti aboragina, nantawamaba Kotiti paru pegina aꞌyaꞌmaenaba kanara piye.

¹²Piya, nagenepa kampa asagayukibepa, kanarane. Asagayukibepa, pipa kanarane. Piya, nagaꞌena nabukenaenabe nagaꞌe pakenaenabe, uwaenaena maekenaenabe iꞌmikenaenabe, aꞌyaꞌma yagaba aꞌyaꞌma aukaꞌiba, naeba Koti paruyenabi mikenaenama nkagoba agantuwe.

¹³Eya, esegi punatami ntagaramaba esegi punatagi, aꞌyaꞌmaenaba aogi puma miyuwe.

¹⁴Pigoya, tigeba kanara kayone punatama, kuntaenanepa aesagabewe.

¹⁵Piripai kinaꞌmitaba, tigeri piyama abewe: Paipa naeba agobima aogi kamanapa tigeti aboramagi, Masetoniya maba atate kanauwagana, pi ntagaba to kaꞌisa monota aiꞌaru pe kinaꞌmiba kampa naeti atokaema, ankami ankamiyenaba kampa puntane. Kampaye. Tigemana piya puntane.

¹⁶Eya, naeba Tesaronaika mintuwagiripa tigeba ka yaga yabatitasa naoꞌmaemagiri, ti kakema aintiba naoꞌmaentawe.

¹⁷We, naoꞌmaekibentanagaba kampa kegaꞌeba yuwe. Kampaye. Nae nabemika monotipa auꞌwa aborakana tigegaꞌe waiyenema yuwe.

¹⁸We, ibaba uwomantana namiwaema namegana pumaewaye. Piya, tigeba tiꞌmuntanaba atagana Epaparotaitasi nkayata kanagi maeyuwe. Pi tiꞌmuntanaba Kotiti muta atagana, aogi aguntaenaba Koti pigama aꞌmu pegina antawamaba kanara piye.

¹⁹Pigoya, Kotinempati aꞌyaꞌma aogiyenaba pumaema waintika, tigeti aꞌyaꞌmaema kampa waintintanaba aeba Karaisiti Isu ntugarasa aborarimikiye.

²⁰We, tae tabarempa Koti, ae agegaꞌeba asagayuyaba miyeno. Tagane. To kaꞌisa kamanane

²¹Pigoya, aꞌyaꞌma Karaisiti Isuti atokaeya kinaꞌmikaba, Poroba: Aya pewe iyema, uwaimiyo. Piya, mono kina naege miye kinaꞌmiba kaga: Aya pewe, yewe.

²²Aꞌyaꞌma Kotiti atokaeya kinaꞌmiba: Aya pewe, yewe. We, Sisa ntamapi yoga pe mono kinaꞌmi igeba esegima: Aya pewe, yewe.

²³Pigoya, Waꞌega Isu Karaisiti nkawagaenama tintabaipi waima waiyeno.Poro piya isa kaentiye.