Read Fore Korosi 1 Bible Online

Korosi 1 - Fore bible

Korosi 1

¹Nae Porona: Karaisiti Isu nkaposorogawe, Koti abogana unatantemine. Piya, naene taoꞌyagara Timotibe mimagira,

²Korosi kumatasa Kotiti atokaema Karaisiti nkawamu wasiye kina, ma nkisapa tigeti kaeyuse. Tabarempa Koti aetisa awagaenabe paruyenabe tigeti waiyeno. Korosi kina Koti aegarantawe

³Tigekaba nunamu yome ntaga, Waꞌega Isu Karaisiti ae aba Kotiti tasiꞌmu potause.

⁴Piya, mantabinti asu mikenaga puritanti, pika tigeba Karaisiti Isuti timatiti pumagiri, aꞌyaꞌma Kotiti atokaenta kinapa agu kaoꞌena puwaitawe. Pi nkawaga kamanatipa ago abuse. Tigeba aogi taga mono kamanapa pai urimogiri, pi mantabinti asu mikenaga abima agawa puntawe.

⁶Pi aogi kamana aꞌyaꞌma kinaꞌmiti kanama, aꞌwa aborama anosamagina, tigeti pabiyaena aboraye. Piya, Kotitisa taga awagaena awaga kamana maru abinta ntaga, tigeti wairite kanama ampa tabe piye.

⁷Pi aogi kamanapa tasibugai tasiyo yagara Epaparasi urimintiye. Aeba Karaisiti nkawamu wasima kayokaya yagara, ka yugare puma kabiritamine.

⁸Piya, tigeba agu kaoꞌenaba Aota Awamusatasa aboragana, urasimegira Kotiti tasiꞌmu potause. Mono aꞌwa aborakenaga nunamu untiye

⁹Piya pegira, tasigeba abintome ntaga kampa tigasima, agobima tigeka mayama nunamu yuse: Awamusaꞌama napiyenaripe abikenaenaripe timekana anosama tabe pukiye. Piya pekiri inatisa abemintana abibebe pukibeka, nunamu yuse.

¹⁰Piya, Waꞌegawama aogi puritakiri, mikenaenarimpa nkagowapa uma arakana tigakana kanarasakiye. Piya pumagiri, mono yuga pigina, aꞌwapa aborakiri Koti nkagowapa abibebe pigina anosakiye.

¹¹Piya aogi esegiyenawatasa tabera esegi puritakiri, asima aꞌyaꞌma kuntuyenaripa aisagaꞌma, tintawama kampa pami pumagiri,

¹²tabarempati tiꞌmu potama, tikaenabi mikibeka nunamu yuse. Piya, tabarempa utaratama, eꞌwasaenabi Kotiti atokaenta kinake kaga mikenaga tababuntiye.

¹³Aeba tununtanama nkesegiyenabisa aꞌyobatatama, yagarawampa kabiratakenabi tababuratantiye. Pi abugai ntagarawapa

¹⁴ago ika puratama aguntaenarepa asuꞌa pugasakiri, aogima mikibeka nunamu yuse. Karaisiti ntugawane

¹⁵Pigoya, kampa agaompe Kotipa yagarawampa ae aoga aboraye. Aꞌyaꞌwaemaena Koti pumarantemi, paitama aiꞌne aewe.

¹⁶Piya, Koti otaogana, aeba mantabinti waintintanabe mabi waintintanabe, pi agaompentanabe kampa agaompentanabe, pi aꞌyaꞌwaemaena ae aborantiye. Pabi amani kinaꞌmi waꞌega kinape, kamana ukena kinape, paitanta kinape, kabikena kinape, aeꞌwantana aborama asu igasima mintiye.

¹⁷Aeba aꞌyaꞌwaemaenamapa paitama mintegini, aꞌyaꞌwaemaena ae esegiyenarasa marunkaipa mirite kanama mintawe.

¹⁸Piya, monota aiꞌaru pe kinaꞌmi auꞌwa mintokana, aeba aiꞌnerene. Aeba agorepa mintana, ae agobima purintapisa asima, paitaratama aꞌyaꞌmaenaba aeba asuragasima mintiye.

¹⁹Piya, Kotiba ae abemika, aꞌyaꞌma aumawapa pi ntagarawampati pumaema amintiye.

²⁰Piya, yagarawampa ntugarasa aꞌyaꞌma marasabe mantarasabe, Koti aewati kaga asaeratama, maripo kurankatasa paruyena aborama, piya puratantiye.

²¹Paipa tigeba Koti tikaꞌintaesi potama, napiyenarimpaba kama potama aguntaena puma mintantawe.

²²Piya puma mintuguna, Karaisiti puꞌmagina, auꞌwatasa Kotike asaema ka kinaꞌena puritantiye. Piya, tigeba aota mima, aobipa ataena kampa puma, kamana kampa uritakibi kina mikibeka, tibabuma Koti nkaobi mutatitakena piye.

²³Pigoya, aꞌyugu kaꞌenama tibaibekiri, aogi kamanati atokaentaꞌena kaisanaga, tigeba timatitiꞌenaripa aebebe puma, kibasa atama, esegi puma miyiyo. Piya mikibeka, Koti nkaobi mutatitakiye. Pi aogi kamana mampabisa aꞌyaꞌma wayaꞌwa mite aborantine. Pi kamana kayokaya yagara Porona mintuwe. Poro auꞌwatasa mono kina iyoꞌmaentiye

²⁴Pigoya, nauki nakiyenabisa kuntaenaripa aesagaꞌma tiyoꞌmaeyoka naꞌmu puwe. Piya, Karaisiti auki nakiyena aboramintanaba kaꞌisa naeba ae auka aesagabuwe. Pi nkaupa monota aiꞌaru pe kinane.

²⁵Pi aegara kina tigeti Koti kamana maema aborawaeyoma unatantegi, tige kayokaya yagara mima piya puwe.

²⁶Piya, Koti kamana agowapa pai aꞌyaꞌma yaga kakama waintanti, Kotiti atokaenta kinaꞌmiti ibaba aboraye.

²⁷Piya, Koti ae abemika, ae aokinaꞌmiti kakanta kamana agoba aborawaimiye. Pi aogi eꞌwasa kamanapa to marisa kinaꞌmitibe kaga aborawaimiye. Pi kakanta kamanaꞌama nkagoba mayama waintiye: Karaisiti tigupi mintika eꞌwasa kumati asu mikibewe.

²⁸Pigoya, Karaisiti nkagoba uma aborama aꞌyaꞌma kinaꞌmiti uwaimima, obisuma, igu aogantasikena kamana aꞌyaꞌma kina uwaimune. Piya, aꞌyaꞌma kina Karaisiti nkauꞌwantana pigina Kotiti ibabusanaga nabiye.

²⁹Pika agasiyaena popa, tabe esegiyenawatasa asinatagi, piya puwe.