Read Fore Korosi 2 Bible Online

Korosi 2 - Fore bible

Korosi 2

¹Naeba urimekiri abiyo. Tigege, Areyotisiya kumatasa kinape, nae naowara kampa aga kinape, tige tiyoꞌmaekena nunamu agasiyama yuwe.

²Piya, tigutasa maema agu kaoꞌena puma atokaema esegi piyo. Piya puma, tigeba aogi napiyenaba maema, Koti kakanta kamanaꞌama nkagowapa Karaisititi napima, tagantanaba abibebe puma abiyoma, pika nunamu yuwe.

³Pigoya, aꞌyaꞌma aogi abikenaenabe napikenaenabe Karaisititi kakantanabi pumaeyagina, taeti ago aboraye.

⁴Piya, kaꞌwaina iga kamanatasa kumpari urigasima tige kakaꞌisanaga, ma kamanapa yuwe.

⁵Pigoya, naeba naupa pagasara mima, nagutasa tigege miyuwe. Piya, tigeba kaga arabama, Karaisiti esegima aegaraga, tigaogana nantawama kanara piye. Isuti wama eꞌwasaena maekune

⁶Pigoya, tigeba Karaisiti Isu aegaꞌma: Waꞌegarene, otantawe. Pabiya puma ae aguta nasiyo.

⁷Tibupa aeti uma aema, ubuꞌma esegi pumagiri, urimintana napima timatitiꞌenaba esegi piyo. Piya puma Kotiti tabera tiꞌmu potaiyo.

⁸Pigoya, tigeba aogima kabiyiyo. Aꞌyugu kaꞌwaina wasanami ntapiyenabisa esiba kamanaꞌama iga puritamagina, tigupa maerite wagasanaga, tiyota tiyota piyo. Piꞌnaba ayabamagi kamanapisabe amani kinaꞌmi kamanapisabe iye. Pipa Karaisiti kamanaꞌnane. Mampabisa kamanane.

⁹Tigeba ago abintawe. Koti nkagoba Karaisiti nkautasa aborawaeye.

¹⁰Piya, aeba aꞌyaꞌmaena paitantaꞌenamape esegiyenamape aiꞌnewane. Aeti atokaentaka eꞌwasaenaba pumaeritaye.

¹¹Tigeba tiyatasa auta araꞌena pikenaenawanane. Ariritasaenaba maegasima, Karaisiti tigupi araꞌena puritaye.

¹²Piya puma, mono wani paititama, ae purintapi kaga kairitantawe. Pigoya, Koti aeba esegiyenawatasa Karaisiti purintapisa asintiye. Pabiyama, pi nkesegiyenawaka timatiti puguna, kaga asima atokaeritantiye.

¹³Paipa tigeba ti kasama araꞌenaba kampa punta, aiboꞌena puma puꞌwanta kina kanta mintantawe. Mintiri, timatiti puguna Kotiba aꞌyaꞌma aiboꞌenaripa asuꞌa purigasima, Karaisitike kaga asiritama eꞌwasaenawapa timintiye.

¹⁴Piya, agunta puwakana, paisa ago kamanapa esegi puma, kamana uratama tapirintakena puntiye. Piya pogana, pi paisaenaba Karaisiti ntugarasa maripo yara itaꞌatama kaintiye.

¹⁵Piya puma, amani kinaꞌmi waꞌega kinape kamana ukena kinape, ige esegiyenawaipa aꞌyaꞌma kinaꞌmi nkiyobi mae igasimagina, maripora agowapa aogima aborantegi agaune. Karaisitige puꞌwantaka uwa napiyenaba aꞌnkaegaraiyo

¹⁶Tigeba Isu aegarawe. Pigoya, tabe yagabe, kasa utape, sabatirano aki puma mikenabe, kaꞌisa naninta wani nakenabe, pikaba kaꞌwaina uwa kamana tipi mpaꞌma yekiripa: Kumparina, kaso, omiyo.

¹⁷Pintana amankane. Ae akaꞌi auꞌwapa, Karaisiti, ago aborantiye.

¹⁸Piya, kaꞌwaina: Naeba kasaꞌenaba agaopa, tabe yagaranawe yemiꞌnaba, kamana uritakiripa, kumparina, a-nkabiyo. Pi ntagaraba: Tipa maete tumima, enisore kina aegaraiyo, iye. Pi ntagara aeꞌwa nkau maema amantana puma tabe piye. A-nkuwa ataigina piyaba peno.

¹⁹Pi ntagara Karaisititi kampa atokaeye. Karaisiti aeba aiꞌnerene. Aegaraompe kina taeba auꞌwane. Piya, agaꞌnabe agisa aya nkaope amato puratama atokaeye. Piya puma, mono naninta tamima Koti nkesegiyenawatasa iꞌma anosarataye.

²⁰Tigeba Karaisitige kaga puꞌwama, mabisaenaba tikaꞌintaesi puntawe. Nanaga mabisa kina nasisuba pewe. Nanaga pi kamana amentantiba miyewe.

²¹Pi kamanapa mayamawe: Ma nanintaba a-mpaeyo. Pipa a-ntao. Maropa a-nkaigayabo.

²²We, nanintaba uwa nagaikenaenawe. A-ntao kamanapa wasanama ntapiyenawe.

²³Pi kamanakaba, monotapa esegi puma, tanta aꞌwa puratama, tauꞌamapa aeguma arupu puma, wasanami nkiyobi aogi piye. Piya, akumpaꞌma mintintanama wasanami nkiyobipa uwa aogi pegina, piꞌnaba ata napiyenarempa kampa aogi pumagina, tagupa kampa taoꞌmaeye. Piya, wasanami ntapiyenaba aꞌnkaegaraiyo.