Read Fore Korosi 3 Bible Online

Korosi 3 - Fore bible

Korosi 3

¹Pigoya, Kotiba Karaisiti asitaogana, inati ayatakanti mintiye. Piya, aege kaga asiritami kina tige inatisaenaga napiyiyo.

²Mampabisaenagaba a-ntapimagiri, inatisaenaga napiyiyo.

³Tigeba purinta kina kanta puma miye kinaꞌmitaba, mampabisaenagaba a-ntapiyiyo. Piya, mikenaenari Karaisitige Kotiti kakama waintiye.

⁴Piya, Karaisiti aeba mikenaenarempa nkagowe. Ae aborakibi ntaga tigege kaga eꞌwasaenawatapa aborakibewe. Piyama inatisaenaga napiyiyo. Paisaena kasiyo

⁵Pigoya, asiratami kina mintiri, mampabisaenaripa kaigasiyo. Piya, kumiyenaba a-piyo. Kumiyenagaba a-ntapiyiyo. Tigu iꞌnintanaripa kasiyo. Ataenaga tintabinti pami pepa kasiyo. To wainantanagaba a-ntapimagiri waꞌegari kantaba a-piyo.

⁶Piya, piya pe kinapa Koti amoꞌenaba imikiye.

⁷Paipa tigeba mampabisaena aegaꞌma piya puntawe. Piya, ibaba kaigasiyo.

⁸Ibaba ataenaripa asarosuma kasiyo. Piya, timoꞌenabe, kabirakenaenabe, ata puwaitakenaenabe, akaya kamanatipe, tiwamupisa iꞌni kamanatipe, asarosuma kasiyo.

⁹Piya, tigaꞌnagipa kumpari kamanapa a-nkuwaigasiyo. Tigeba paisa timawama ntugaba ago kaitegiri,

¹⁰tigeba kasa kina aborama mintawe. Mintagana, kasa aborariti ntagara, Koti, asi nasi napiyenaba kasa timima, aeꞌwa aoga kina pabiyama aboraritama mintiye.

¹¹Piya ae aobi Yuta kinape to kinape pako pikena araꞌenaba kampa waintiye. I kasanta kinape kampa kasanta kinape pako pikena araꞌenaba kampa waintiye. Namuꞌisa kinape, kabu kinape, kayokaya kinape, uwa kinape, Koti nkaobi pako pikena araꞌenaba kampa waintiye. Karaisiti aeba aꞌyaꞌwaemaenama nkagoba ka mima, aꞌyaꞌma aokinaꞌmi nkigupi aborama miye. Tinta paruyenabi miyiyo

¹²Pigoya, Koti utaritanti kina, aota tibabuma agu kaoꞌena puritantiye. Piya puritantika kaꞌmasa puma, wasana iyoꞌmaema, tipa mara maete tumima, agoya puwaitaiyo. Wasanami ata puritaigiripa uwa ataiyo.

¹³Tigetipa a-mpaete ima tiyo kabiwaitaiyo. Abakatipi kamana aborakiripa timoꞌenaba ataiyo. Waꞌegawama antotaꞌenaripa asuꞌa purigaintika, tigeba aꞌwae puma to kinaꞌmipa pabiya puwaitaiyo.

¹⁴Pigoya, agu kaoꞌena maema miyiginaba aꞌyaꞌwaemaenaba asu igasano. Piya pukibepa ka kinaꞌena puma mikibewe.

¹⁵Piya, Karaisiti paruyenawampa tigupi pumaeyakana kabiritano. Ka tiꞌena puma mikibeka tibabuntine. Pika tiꞌmu potaiyo.

¹⁶Pigoya, kamana aogima napima, toma toma uwaimima ankomi ankomi puma miyiyo. Paisa mono inibe, ibasa inibe, kasa inibe, Kotiti umagiri, tigupinti tiꞌmu potaiyo. Piya pigina, Karaisiti kamanaꞌama tintabaipinti pumaewama aogi napiyena timeno.

¹⁷Piya, tiwamupisa ukenaenabe, tiyatasa pukenaenabe, Waꞌega Isuti napima aꞌyaꞌmaenaba ae pemisa puma, pi ntugaba puma, agegaꞌewataka tabarempa Kotipa tiꞌmu potaiyo. Waꞌegawama nkaobi aogima miyiyo

¹⁸Wayapa, tigeba tiwaegi kamana wasima miyiyo. Piya pigina, Waꞌegawama nkaobi kanara pikiye.

¹⁹Waba, tigeba wayatipa agu kaoꞌena puwaitama, intawaipa ataba a-puwaitaiyo.

²⁰Araga yagara, tigeba tinogi tibagi kamana abima aꞌyaꞌmaenaba wasima miyiyo. Piya pigina, Waꞌegawama abekanaba kanarasakiye.

²¹Ibagitaba, araga yagararipa imoꞌena pusanaga, asi nasi tigobipa a-puwaitaiyo.

²²Kayokaya, tigeba mabisa tabe kinatimpi nkiwamupisa kamanapa aꞌyaꞌma wasiyiyo. Aꞌyugu sepena puma wasanami nkiyora tabe yuga pusanaga, Waꞌegawamati paruyena puma, ae aobi arupu puma mima, tabe kinatimpi ntuga aogi piyo.

²³Piya, aꞌyaꞌwaema yuga puma wasanamiti wanane. Tigeba tiꞌmu puma Waꞌegawamati aogi pigina,

²⁴Waꞌegawama utaritanti nkeꞌwasa antota timikiye. Pipa tigeba ago abintawe. Tigeba Waꞌega Karaisiti, ae kayokaya mintawe. Pika napiyiyo.

²⁵Piya, Koti aeba ataena pikibe kina, tabe agi wainta kinape uwa kinape, kaga antotaꞌena imikiye.