Read Fore Korosi 4 Bible Online

Korosi 4 - Fore bible

Korosi 4

¹Tabe kinaꞌmitaba, kayokaya kinatipa arupuyena puma aogi puwaitaiyo. Pabiyama tabe yagararipa mantari mintemika, napima aogi puwaitaiyo. Nunamu uma arupu kiꞌi waiyo

²Tigeba asi nasi nunamu uma, a-tiyekita pumagiri Kotiti tiꞌmu potaiyo.

³Pigoya, taekega nunamu yiyo. Yigina, Kotiba mono kipa tayakeka, Karaisititisa pi kakanti kamana uma aborakune. Pi kamanataka igaꞌnabi nataugu miyuwe.

⁴Piya, Koti yogawa namegi, aeꞌwa kamanapa aogima uma aboraoka, nunamu yiyo.

⁵Pigoya, aꞌyaꞌma yagaba a-tiyekita puma, kamana kampa abinta kinaꞌmi nkiyobi asi nasi arupu puma miyiyo.

⁶Aꞌyaꞌma antota kamana aꞌwae puma aogima uwaimikibeka, aꞌyaꞌma yagaba kamanatipa kayo asigi yigina, iga peno. Tikikasige Onisimasige kamana maete wantase

⁷Pigoya, Tikikasi kamanaꞌnepa urimikiye. Aeba tabugai taoꞌyagara mima, ka yugare piye. Aeba Waꞌegawamati kayokayaꞌena puma awamu aogima wasiye.

⁸Tae mikenaenarempa urimima, tige tigu esegi puritanema, tigeti otaogana waye.

⁹Piya, aogi tagaꞌnaba Onisimasi, tige kumatasa yagara, monopa aogima wasiyemika, otaogana Tikikasige wase. Isigeba mataꞌi aboramintanagaba urimiwaekibese. Korosi kinaꞌmiti Poro: Aya pewe, untiye

¹⁰Arisitakasi, aeba naege igaꞌna punti ntagaramaba: Aya pewe, iye. Maka, aeba Panabasi nkababa, aegeba: Aya pewe, iye. Aeka pi kamanapa abimagiri, tigeti kanakiripa ababiyo.

¹¹Isu Yasitasi aegeba: Aya pewe, iye. Pigoya, Koti kabiratakenaga unti ntugarapa kaꞌisa kina naoꞌmaeyawe. Piya, pi kakaga igeba ibinto Yuta kinane. Igeba naoꞌmaegawe.

¹²Pigoya, tige kumatasa yagara Epaparasi, aegeba: Aya pewe, iye. Aeba Karaisiti Isu kayokaya yagara mimagina, tigeka asi nasi nunamuwatasa esegi puritaye. Koti nkabemintanara asima aebebe puma abiyema, tigeka nunamu iye.

¹³Naeba agowapa agantuwe. Aeba tigebe, Areyotisiya kumatasa kinape, Iraporisi kumatasa kinape, tigekaba mono yuga agasiyama pegi agauwe.

¹⁴Aruku aeba tabugai tusa yagarabe, Timasibe isigeba: Aya pewe, yese.

¹⁵Pigoya, Areyotisiya kumatasa mono kinape, Nimpage, ae namapi monota aiꞌaru pe kinape, igekaba: Poro, aya pewe iyema, uwaimiyo.

¹⁶Pigoya, tigeba ma nkisapa aisuma abigaiteba, ataigina Areyotisiya kumatasa monota aiꞌaru pe kinaꞌmiti wano. Areyotisiya kinaꞌmi nkisake kayogana wamipa, maema aisuma abiyo.

¹⁷Pigoya, Akipasipa maya omiyo: Waꞌegawama ugatanti mono yuga puma aogima aꞌaiyoma, omiyo.

¹⁸Naeba Poronawe. Naeba: Aya pewema, naeꞌne ntayapisa kaeyuwe. Igaꞌnabi miyoka, naeka napi napi piyo. Awagaena tigeti waima waiyeno.Poro piya isa kaentiye.