Read Fore 1 Tesaronaika 1 Bible Online

1 Tesaronaika 1 - Fore bible

1 Tesaronaika 1

¹Poronawa, Sairasiwa, Timotiwa, sumagita esa kaeyune. Tesaronaika kumata monota aiꞌaru pe kina, tabarempa Koti, Waꞌega Isu Karaisiti, isigeti atokaenta kina, tigeti ma nkisapa kaeyune. Awagaenabe paruyenabe tigeti waima waiyeno. Igeba aegaꞌma arupu puma mintantawe

²Asi nasi tigeka Kotipa taꞌmu potama, aꞌyaꞌma yaga nunamu yompepa, tigekega esuritaune.

³Piya, timatitiꞌenaritaka auꞌwapa aboraye. Agu kaoꞌenarika esegi yuga pewe. Waꞌegare Isu Karaisititi atokaekenaga napima agasiyaena puma miyewe. Pika tabarempa Koti ae aobi napima esuritama taꞌmu potaune.

⁴Taoꞌmitaba, tigekaba Koti agu kaoꞌena puritama utaritagi agaune.

⁵Piya, aogi kamana tigeti maete kanaompepa, uwa kamanapa kampaye. Pipa aogima abompe kamanapa Aota Awamusaꞌama esegima urimogiri, aꞌwae puma aegarantawe. Ti tikapi tiyoꞌmaeyompe agowapa tige ago abintawe.

⁶Piya, tae taegaꞌmagiri Waꞌegamape kaga aegarantawe. Tigeba Kotitisa kamana maeyuguna, uwaena tiki nakiyena tigeti aboraogana, Aota Awamusaꞌama asiritaogiri aeka tiꞌmu puntawe.

⁷Piyama tigeba mintumeꞌnagiba, tige agoripa aogima agantawe. Piya, tigetisa Waꞌegawama kamanaꞌama kanarasama, Masetoniya maribe Akaiya maribe aboraogini abintawe. Ibintowaipa kampaye. Kotiti timatiti pe kamanapa aꞌyaꞌma marisaba abewe. Igeba agoripa ago abintaka, to urimikenaenaba kampaye.

⁹Pi ntuga pokana, aboramintanagaba igewai uramewe. Taeba tigeti kanauwakiri, ama kotintana pumarantaꞌena tikabitategiri aꞌwae puma Kotiti kanamagiri, pi taga miyaba Koti kayokaya kinaꞌwa aborama mintantawe.

¹⁰Piya puma, yagarawa Isu purintapisa asitantegina, mantarisa tumikibintanaga agawa puma mintawe, uramewe. Pi Isu, aeba Koti nkamoꞌenawa maete tumikibemitasa, tumpa aꞌyigitatamagina tababikiye.