Read Fore 1 Tesaronaika 2 Bible Online

1 Tesaronaika 2 - Fore bible

1 Tesaronaika 2

¹Taoꞌmitaba, tigeti irosaꞌma yoga puwakana, auꞌwantagaꞌena aborawaeyogiri tigeri ago agantawe.

²Piya, Piripai kumata marupa aerari kaeratama, tauki nakiyena purataumepa ago agantawe. Pipa aerawane. Kotirempatisa to esegiyena maema, kumatiti wasanami to tabera ata puratakaba kampa taekuruba puma, Kotitisa aogi mono kamana uma aborarimintune.

³Taeba kamana urimompepa, pipa aibo kamanapa kampa urimima, iꞌnintanabe agoꞌenabe kampa puritaune.

⁴Kampaye. Kotiba tagagina kanarasagi, aogi kamanaꞌwapa yune. Wasanami nkiyobinane. Koti tagu agakenama, ae aobi abekana kanarasanoma ka yune.

⁵Tigeba abintawe. Tigebinkaobi kamanapa kampa urimintune. Pipa kampaye. Kotiba tagantoga, pi ntugaba puma abugakenaenagaba ka kampa ampa puntompene.

⁶Taeba pi ntuga puma, wasanami tabe igi maekenaba pipa tigetisaba kampaye. To kinaꞌmitisabe kampaye. Taeba Karaisiti nkaposoro mima, piya puma taeba tabe pukenaba kanarane.

⁷Piya, taeba paipa tigege pasema mima, mayama wayaꞌma yagarawa aogima kabiyisa puma, tigege mintantompene.

⁸Piya, Koti nkaogi kamana urimikena, abiba kampaye. Tae taguke kaga aborarimikena yune. Pipa nanagawe. Taeba tigekaba tabugagi, tagutepa timiwaema timune.

⁹Taoꞌmitaba, tigetiba araga ntuga puntompepa, ago tagantawe. Piya, nanintaripe arisarontanaripe paibukenaenaba kampaye. Taeba arape asenabipe agasiya yuga puma, Kotitisa aogi kamanapa uwa urimintompene.

¹⁰Tigeba ago tagantagana, Kotigeba ago tagantiye. Taeba Isu nkaegaranta kinaꞌmiti abakatipi mimagi, aota parutu puma mima, Koti nkaobi kampa kamanate abakatipi miyuwakiri tagantawe.

¹¹Piya, abawampa yagarawa kabiyisa puma, pabiyama taeba tiyoꞌmaema, ka ka asiritama, tigu tiꞌamapa uma esegi puritama urimuwakiri abintawe.

¹²Piya, tigeba Koti kabiratakena eꞌwasaenawapi ago utaritamika, ae aobi aogima nasiyo. Pika uma esegi puritama urimintompene. Mono abintini maya puntawe

¹³Pigoya, Koti kamana urimuwakiripa abimagiri, wasanami kamana abisuba kampa puntawe. Pipa taga Koti kamananema abintawe. Piya puguna, pi kamanaꞌamaba aegaranta kinaꞌmiti tigupipa esegi puntemine. Pika asi nasi Kotiti taꞌmu potaune.

¹⁴We, taoꞌmitaba, Yutiya marisa Koti mponota aiꞌaru pume kinaꞌmi Karaisiti Isuti atokaeyuguni, iyokinaꞌmi iyeguntawe. Iyeguntasa puma, tigepa tiyokinaꞌmi tiyeguntawe.

¹⁵Pi Yuta kinaꞌmi poropete kinapa iyeguta iyeguta iyuguna, Waꞌega Isu ampa aboraogini aeguma kaintawe. Kaitamagini taekeba tagarubakasima, Koti nkabugaomentanamapa kama tuꞌatama, aꞌyaꞌwaema kinapa akunkitantawe.

¹⁶Piya, taeka: To marisa kina uwaimigina, iꞌima aogi pusanaga, akutatakena puntawe. Piyama aguntaenawaipa maema anosama ago tabe puntaka, Koti nkamoꞌenawampa igeti ankwaintiye. Poro to kake igasanaga abuntiye

¹⁷We, taoꞌmitaba, tagarubaugu wauwakana, tagu taumawamaba tigeti waintantiye. Piya poga, taeba arontaganto to auꞌi mima kampa tigamagi, kinta yagara kanta puma mimagi, esegima ke kuꞌena puma, tige tiyowarapa tigakenaga puntune. Pipa kampaye.

¹⁸Piyamagi, taeba uma tigakena puntune. Naeba Porona, uwoma ntaga tigeti wakena pugate atauwe. Pipa kampaye. Sataniba ke akutagasaye.

¹⁹Pigoya, ainti Waꞌegare Isu tumikibi ntaga, nanaraka ae aobi asikune. Nanaraka tantawama aogi peka, taꞌmupa pukune. Pipa tigerine.

²⁰Eya, pabi ntaga aege mikibeka eꞌwasaenarepa taꞌmuntanawe.