Read Fore 1 Tesaronaika 4 Bible Online

1 Tesaronaika 4 - Fore bible

1 Tesaronaika 4

¹Pabigoya, taoꞌmitaba, tigekaba esuritama esegi kamana urimekiri, Waꞌega Isuka napima abiyo: Tiyakompentana Koti ntapiyenara aegaꞌma aogima nasiyo. Piya pesa puma, amato puma aogima miyiyo.

²Tigeba ago abintawe. Waꞌega Isu, ae awamu mima kamanapa urimintune.

³Piya, tigeba aota misanaga Koti nkabemika maya iye: Kumiyenaba tigeba aꞌwae puma miyiyo.

⁴Tigeba waya maekenaenaba, aogima napimagiri aota mikenaenama aegaꞌmagiri, aogi puma wayapa maeyiyo.

⁵Tiguꞌamaba a-tika pekiri, to marisa kina, Koti kampa aegara kinaꞌmi pesapa a-piyo.

⁶Aiboꞌenaba a-puma tiyoꞌmi nkwaepa a-paibuma, pintanagaba kumparipa a-nkuwaigasiyo. Piya, Waꞌegawama aꞌyaꞌma kinaꞌmi kuntaenawaipa antota imiwaekiye. Taeba pi kamanapa pai uma aborama esegima urimintompene.

⁷Piya, tagu iꞌnintanayaga miyiyoma taba puratanti nane. Pipa kampaye. Koti aegaꞌma aota miyiyo, uma taba puratantine.

⁸Pigoya, pi kamanaka kaꞌwaina akaꞌi ntaesi potakibipa, wasanama nane. Kotipa akaꞌi ntaesi potaye. Piya pemikaba, kampa aeba napiye. Kotiba Aota Awamusaꞌwapa tamima: Aota miyiyo, uma taba puratantine.

⁹Agu kaoꞌena mono kina puwaitakenaenagaba ago abintawe. Pika naeba kampa esapa kaema timukuwe. Kotiba aewa agutasa kaoꞌena agowapa puriyakintekiri tiyoꞌena aogima pewe.

¹⁰Piya, tigeba aꞌyaꞌma Masetoniya mari minta Isu nkaegaranta mono kinaꞌmipa, agu kaoꞌena puwaitawe. Pipa tagane. Pigoya, taoꞌmitaba abiyo. Tigeka maya uma esegi puritaune: Tigeba pintanaba to kake pumagiri,

¹¹esegima napima paebuma mimagiri, to kinaꞌmi mikibentanagaba a-ntapima tigeꞌenarika aogima kabima mima, tiyapisa yogaenaripa puma maeyiyo. Piyama pai urimintompesa puma piyo.

¹²Piya pumagiri, mono kampa abinta kinaꞌmi nkiyori aogima mima, inamukantaba a-piyo. Waꞌegawama irosaꞌma tumpa asiratakiye

¹³We, taoꞌmitaba, Isu nkaegaꞌma puꞌwanta kinaꞌmikaba aibosapo pisiwe. Piya puma to kinaꞌmi Kotiti atokaekenaga kampa napima uwa intara pesa puma, aꞌyugu tintawama kubeꞌena pusanaga, pi kamanapa yune.

¹⁴Piya, taeba Isu puꞌma asinti kamana abibebe puma abene. Piya puma, Isu nkaegaꞌma puꞌwanta kina Koti iba pekini, Isuge kaga irosakibewe. Pika abiyo.

¹⁵Pigoya, Waꞌegawama kamana urimompepa mayamawe: Ainti Waꞌegawama tumikibi ntagaba, taogama mintompe kinaꞌmitaba purinta kinaꞌmipa kampa uma paitawaitakune.

¹⁶Toganaba Kotiba esegima kegaꞌe yekana, marusa enisorewama kegaꞌe yekana, pikuriyama aga yekana, Waꞌegawama mantaba kaitegina tumikiye. Tumimagina, Isuti atokaema puꞌwanta kinaꞌmipa paitama asiwaitama,

¹⁷taogama mintompe kinapa ibinapinti tumpa taba purite, pi kinake Waꞌegawamati mesurataka, Waꞌegawamage kaga miyaba mikune.

¹⁸Piya, pi kamana abima, tiyoꞌmi nkigu imapa esegi puwaitaiyo.