Read Fore 1 Tesaronaika 5 Bible Online

1 Tesaronaika 5 - Fore bible

1 Tesaronaika 5

¹We, taoꞌmitaba, kanaꞌwa aborakibintanaga ayantagabayawema, kampa esa kaema urimukune. Pipa kampaye.

²Tigeripa ago abintawe. Waꞌegawama antotaꞌena tamikena yagaba, ku kinaꞌmi aseka ampa aboraisa puma aborakiye. Pipa ago abintawe.

³Piya: Paruyenabi mima aogima miyune, piya yiginaba, pabi ntaga, wayaꞌma yagaraena pukena yagaba auki nakiyenawapa aboramisa puma, ige ataena puwaitakenaena karuꞌena ampa aborakiye. Piyamagina kampa igaikiye.

⁴We, naoꞌmitaba, pabi ntaga ampa aborarimekiripa, ku kina kanagiri pami pesapa kampa pami pukibewe. Tigeba tununtanabi miye kinapa kampaye.

⁵Tigeba eꞌwasaena maema ara miye kina mintawe. We, tigebe taebe asekasa kinape tununtanabisa kinape kampa mintune.

⁶Piya puma, Kotika kampa kabinta aꞌyugu tauwaima, to kinaꞌmi pesa pusanaga, taoba aꞌwaintakana napiyenarempaba kanara peno.

⁷Taeba agantune. Iwaikena kinaꞌmiba aseka iwaiyewe. Wani nakena kinaꞌmiba aseka nama aiboꞌenaba pewe.

⁸Pigoya, taeba arasa kinatawe. Piya, napiyenarepa kanara peno. Irebu kinaꞌmi maꞌena iꞌana pesa puma, tamatitiꞌenarepe agu kaoꞌenarepe peno. Maꞌena taminoku atasa puma, Kotiba tauꞌiyeka taeba tagu esegi peno.

⁹Piya, Kotiba amoꞌenaba puratakenaba kampa uratantine. Pipa kampaye. Aeba Isu Karaisiti Waꞌegarepa aegarakana taba puma tauꞌiyenema uratantine.

¹⁰Ainti taogama mintakubompepe, puꞌma mintakubompepe, Waꞌegare taeka pai puꞌma eꞌwasaena tamintika aege mikune.

¹¹Pika tiyoꞌmi uwaimima, iba pesa puma amato puma iyoꞌmaema esegi puwaitaiyo. Wasana maema asaekena kamanane

¹²Pigoya, taoꞌmitaba, taeba urimekiri abiyo: Tige tikapi, yoga puma napiyenaripa arupu puma esegi purita kinaꞌmi nkige asagayuyiyo. Pipa Waꞌegawama kiya kinati uwaitakiri,

¹³yogawaitaka agu kaoꞌena puwaitama abiwaitaigina iyeno. Piya, paruyena puma miyiyo.

¹⁴We, taoꞌmitaba, kamana to esegima urimekiri abiyo: Aꞌyaꞌma yugaga iyekita pe kinapa arupu pumagiri, tara tara igi napiye kinapa esegi puwaitamagiri, anu kinapa iyoꞌmaemagiri, aꞌyaꞌma kinaꞌmipa pasema paru puwaitaiyo.

¹⁵Wasanami ataena puritaigiri, aꞌyugu antotaꞌena ataena puwaitasanaga kabiyiyo. Asi nasi tiyokinape aꞌyaꞌma to kinape aogi puwaitakenaenaga napiyiyo.

¹⁶Asi nasi Kotiti tiꞌmu potaiyo.

¹⁷Asi nasi nunamu uma miyiyo.

¹⁸Aꞌyaꞌmaena aborarimekiripa, pipa Kotiti tiꞌmu potaiyo. Karaisiti Isu aegaꞌma piya pukibeka Kotipa abiye.

¹⁹Pigoya, Aota Awamusaꞌama ntaku a-nkatuꞌmaiyo.

²⁰Wasanami: Koti nkawamupisa kamanapa yunema, urimigiripa, tikaꞌi ntaesi uwaba a-pumagiri,

²¹aꞌyaꞌwaemaenama nkagowapa marupa uma aborama napiyiyo. Piya puma aogiyenaba upebe puma,

²²aꞌyaꞌma aguntaenaba kasiyo.

²³Pigoya, Koti aeba anta paruyenama nkago, aewa mpaema aota puwaerigasima, Waꞌegare Isu Karaisiti tumikibi ntagagaba aꞌyaꞌma aogima miyigina kamanatipa kampa waisanaga, timatape tigutape titape Kotiba kabiritano.

²⁴Piya: Aota miyiyo, uma tibaburi ntagara, tagantana puma, kabiritama aota titakiye.

²⁵Pigoya, taoꞌmitaba, taeka nunamu yiyo.

²⁶Aꞌyaꞌma mono kinapa aogima tiyapa imiyo.

²⁷Pigoya, ma nkisapa aꞌyaꞌma mono kinaꞌmitaba aisuma uwaimiyoma, Waꞌegawama nkagegaꞌeraka urimuwe.

²⁸Waꞌegare Isu Karaisiti nkawagaena tigeti waima waiyeno.Poro piya isa kaentiye.