Read Fore 2 Tesaronaika 1 Bible Online

2 Tesaronaika 1 - Fore bible

2 Tesaronaika 1

¹Poronawa, Sairasiwa, Timotiwa, sumagita esa kaeyune. Tesaronaika kumata monota aiꞌaru pe kina, tabarempa Koti, Waꞌega Isu Karaisiti, isigeti atokaenta kina, tigeti ma nkisapa kaeyune.

²Tabarempa Kotige, Waꞌega Isu Karaisitige, isigetisa awagaenabe paruyenabe tigeti waima waiyeno. Poro Kotipa aꞌmu potantiye

³Taoꞌmitaba, taeba tigeka aꞌyaꞌma yaga Kotiti taꞌmu potaompepa, pipa kanarane. Aꞌyugu kampa piyaba pukune. Timatitiꞌenamaba ampa anosama esegi pegiri, aꞌyaꞌma ka kapa agu kaoꞌenaripa tiyoꞌmipa puwaitagana, anosagi agama taꞌmu potaune.

⁴We, tigepa karana puritagiri tiki nakiyenabi mima, kuntaenaba aesagaꞌma miyegana, timatitiꞌenamaba esegi piye. Pika Koti nkaegaranta kinaꞌmi nkaruyenabi tigeri maete iyune. Koti antota kamanane

⁵Pigoya, tigeba pintana pekaba, Koti arupu antotaꞌenawapa aborawaekenamana puma tayakiye. Piya, Koti kabiratakena kumata ampikibeka, tige tigupa ago yokege puta waye. Pi kabiratakenaenaraka tiki nakiyenaba aesagabewe.

⁶Pigoya, tiki nakiyena purita kinaꞌmipa Kotiba kanara antota iki nakiyenaba aborawaimikiye.

⁷Piya aborawaimimagina, tiki nakiyena maeya kina tigepe taepe kaga maeragasima migarakenaenaba tamikiye. Pi ntagaba Waꞌega Isu esegi enisore kinaꞌwantaga, tabe yaku nkabu eꞌwasaenayaga, tumpa aboramagina,

⁸Kotika kampa ibuma, Isu Waꞌegarempa nkaogi mono kamanaꞌwa kampa wasiye kina, igepa kamparaga ika antota meru imikiye.

⁹Piya, pi ntagaba igeba Koti nkantotaꞌenaba maeyigina kaiwaitakini, Waꞌegawama nkaowari kampa wanta, esegiyenawampa nkeꞌwasaenaba kampa asu agakibewe.

¹⁰Pi tumikibi ntagaba, Kotiti atokaenta kinaꞌwampiba ae agegaꞌeba asagayuma, aꞌyaꞌwaema imatiti pota kinaꞌmiba aeka tabera iꞌmu potakibewe. Pabiyama tigeba tae kamanapa abima timatiti puntapa, pabiyama tabera iꞌmu potakibewe. Pi kinaꞌmi esegi piyema Poro nunamu untiye

¹¹Taeba pika napima, asi nasi tigeka Kotirempati nunamu maya yune: Tige utaritantiꞌna aogima aegaꞌma mimagiri, aogiyena pukena puntiripa, timatiti yuga pigina, Kotirempa, aeꞌwa nkesegiyenarasa auꞌwa aborarimenoma, nunamu yune.

¹²Pi pukibentanaga, Waꞌegare Isu nkagegaꞌe asagayuyekana, aeba pabiyama tigegaꞌeba asagayukiye. Piya puma, Kotirempa Waꞌega Isu Karaisiti, awagaenawaisitasa pabiya puritase.