Read Fore 2 Tesaronaika 2 Bible Online

2 Tesaronaika 2 - Fore bible

2 Tesaronaika 2

¹Pigoya, taoꞌmitaba, Waꞌegare Isu Karaisiti aborakibi ntaga aege uma aki pukubompeka urimekiri abiyo.

²Pipa kaꞌisa kinaꞌmi: Amonta agaune, ukibipera: Aoso taga kamanapa yunema, ukibipera, taeka: Ige esa kaeyaga maeyune, umagina: Waꞌega aborakena yagaba aborawaeyema yigiripa, a-pami puma karuꞌenaba a-nkiyegaraiyo.

³Pigoya, ka yagara a-nkuwa ataigina amiyo kamana urimeno. Piya, Waꞌegawama kanaꞌwapa arosakena pekana, mono akayuma akabitakena yagarama maru aborakiye. Piya, aꞌabibinti tumikena yagara ae maru aborama nagarikiye.

⁴Piya, wasanami kotiwaipe aegarantanawaipe kamaena potama aꞌyaꞌwaemaenaba agisabi kasima, aewa nkagegaꞌe asagayuma, Koti mpono namapi asu paiꞌma maraꞌmima kamana uma aborama: Naeba Kotinawe, piya ukiye.

⁵Napiyenari ago kasapera aya pewe. Pintanaga paipa tigege minta ago urimintone.

⁶Pi ntagarama ki akunikenaenaba ago abintawe. Piyama, Koti otantemi ntagaba aborakiye.

⁷Piya, ibaba kamana akayukenaenamaba kakama mima yoga pegina, toganaba keꞌwa akunintemiꞌnaba aeꞌwatakana wakiye.

⁸Pigoya, pi ntagaba pi kamana akayukena yagaraba aborakiye. Piya pekana, Waꞌega Isu nkawamupisa aumawampa aegumagina, pi ntaga ae tumpa aborakibi nkesegiyenawampa agora pubasana kaikiye.

⁹Pigoya, kamana akayukena yagara aeba Satani ntugarasa aborakiye. Aborama, uwoma nkesegiyenabe awameꞌenabe kasaꞌenabe kumpariꞌena aborawaekiye.

¹⁰Piya, kaꞌisa kinaꞌmi taga kamanakaba kampa ibika, mantari kampa ikibewe. Pigoya, pi ataenabi tumikibi kinapa kana kewama aꞌyaꞌma ata amiyo kamana uwaigasima iyobi airarikaekiye.

¹¹Piya puma, Koti iyorikaekena agoꞌena otakana igeti tumekini, pi kumpari kamanapa aegarakibewe.

¹²Piya, taga kamana kampa aegaꞌma ataenawaimpaka iꞌmu pe kina, pi aꞌyaꞌma kinapa ata ika maekibewe. Kotiba tibabikena uritantiye

¹³We, taoꞌmitaba, Waꞌegawama tigekaba abugaye. Taeba tigeka aꞌyaꞌma yaga Kotiti taꞌmu potaompepa, pipa kanarane. Piya, Kotiba tiꞌikenagaba paitakaꞌya utaritaogana, Aota Awamusaꞌama tibabuma Kotiti aota titaogiri, taga kamana aegarantawe. Pintanaraka Koti tibabegi taꞌmu puritaune.

¹⁴Pintanaraka Koti abogana, Waꞌegare Isu Karaisiti nkeꞌwasaena maekenaga, aogi urimompe mono kamanatasa utaritaogiri aegarantawe.

¹⁵Pigoya, taoꞌmitaba, esegima asima mima, taga kamana tawamupisabe esapisabe urimintompepa arakuꞌma aegaraiyo.

¹⁶Pigoya, Waꞌegare Isu Karaisiti aewape tabarempa Kotibe esegi puritaiso. Piya, aeba agu kaoꞌena puratama, tagu taumapa esegi puratayaba mima, aeti atokaekenaenaga napiyokana awagaenawatasa aogima taoꞌmaeye.

¹⁷Piya, aeba tigupa maema esegi puritama, aꞌyaꞌma aogi kamanape aogiyenabe tonkiya tiyoꞌmaeyano.