Read Fore 2 Tesaronaika 3 Bible Online

2 Tesaronaika 3 - Fore bible

2 Tesaronaika 3

¹We, taoꞌmitaba, to ka kamanapa waintiye. Abiyo. Taeka nunamu yigina, tigeti aboraompesa puma Waꞌegawama kamanaꞌama uwaesama auꞌwapa aborano.

²Piya, nunamu yigina, kampa aogima napinta aguntaena pe kinaꞌmi nkiyapisa ipatatano. Tigeba ago agantawe. Uwoma kinaꞌmi Kotitiba taga imatitiba kampa pewe.

³Pigoya, Waꞌegawamaba tagantanamana piye. Aeba esegi puritama kabiritakana, aguntaena pemi ntagaramaba kampa tibaebukiye.

⁴Piya, Waꞌegawama napiyena tamegi, tigekaba mayama napima abune: Aꞌyaꞌmaena piyoma yompentana kanara pewe. Piya, aintiba pabiya pukibekaba, ago abune.

⁵Pigoya, tae tabemika, Waꞌegawama tigutipa maema arupu puma, Koti nkagu kaoꞌenawapipe Karaisiti kunta aesagaꞌma esegiyenawapipe uwaesaiyo. Aꞌyaꞌma kinaka yoga kamana waintiye

⁶Pigoya, taoꞌmitaba, Waꞌegare Isu Karaisiti ae awamuta urimekiri aogima abiyo. Kaꞌwaina aeba yogaga aekita puma uwa miyaba yagarama, esegima urimintompe kamana kampa aegaranta uwa miyekiripa, aeꞌwataiyo.

⁷Tigeripa ago abintawe. Tae pompentanaba aegaraiyo. Paipa tigege mintantompepa, yogaga kampa taekita puma mintantompene.

⁸Piya, taeba tiyapisa kaꞌisa nakenaba kampa uwaba maema nantompene. Tige kuntaena puritasanaga arape asekape esegima araga ntuga puyaba mima, ikantanaretasa maema nantompene.

⁹Piya, taeba tigetisa naninta uwa maeyompesinta kanara pesine. Pipa kampaye. Taeba taeꞌenaena aegaraiyoma tayapisa puma tiyakune.

¹⁰Paipa tigege mintapa kamana mayama esegima urimuwakiri, ago abintawe: Yoga kampa pukibiꞌnaba iꞌmiyenoma, urimintompene.

¹¹Piyamaba, tigetisa kamana mayama kanagi abune: Kaꞌisa kinaꞌmi yogawai iyekita puma atate uwa mima, kamana kiki uta nasepa, abune.

¹²Pigoya, piya kinaꞌmika, Waꞌega Isu Karaisiti nkawamuta mayama esegima urimigiri abibebe piyo: Pasema mima yogari pumagiri, tigeti ntugarasa nakenaripa maeyiyo.

¹³Piya, taoꞌmitaba, iyoꞌmaekena yugaba tiyekitaba a-puma uwa piyo.

¹⁴Pigoya, ma nkisapi kaemaraompe kamanapa kaꞌwaina kampa aegarakibipa, ae agoba aogima agamagiri, aegeba a-mpima abira ataigina mima, pika ani peno.

¹⁵Piya, pukibemika kamaena a-potaiyo. Pipa kampaye. Tiyoꞌena puma arupu napiyena amiyo. To kaꞌisa kamanane

¹⁶Waꞌega, aeba paruyenama nkagowama, aꞌyaꞌwaemaenabi miyigina asi nasi aewa paruyena aborarimeno. Piya, pi Waꞌegaba aꞌyaꞌma kinaꞌmititi miyeno.

¹⁷Naeba Poronawe. Naeba: Aya pewema, naeꞌne ntayapisa kaeyuwe. Piya, aꞌyaꞌma isaꞌnempa araꞌenane kaeyuwa, agama naepisa aogima abiyo.

¹⁸Pigoya, Waꞌegare Isu Karaisiti nkawagaenawampaba aꞌyaꞌma tigeti waima waiyeno.Poro piya isa kaentiye.