Read Fore 1 Timoti 5 Bible Online

1 Timoti 5 - Fore bible

1 Timoti 5

¹Kaeba karuꞌenaba kamana omikena puntanapa, esegima a-nkomo. Kabagampa kanta puma pasema omo. Piyamagina masimabi kinapa kaꞌnatabara kanta puma uwaimo.

²Kaeba aentaba kanogampa kanta puma uwaimima, kasa waeꞌiyaba apuyaena puwaitama kae kamana kanta puma uwaimo. Abeya waeꞌmi kamanane

³Pigoya, abeya wae abiwa mintakanapa, kayonena puwaitao.

⁴Pigoya, ka abeya waeꞌma ntagarawo, agaꞌnugiwo mintini, aoꞌmaeyiyo. Eya, igeba marupa mono abibebe puma auꞌwapa aokinaꞌmiti aboraiyo. Piya, igeba anasa kinaꞌwaimpipa antotaꞌena puwaitaigina, Kotiba abekana kanarasano.

⁵Piya, ka abeya waeꞌma ae abintowa mimagina arape asekape Kotika kegaꞌe uma nunamu yemipa, aeba Kotiti atokaekenaga aobi piye.

⁶We, to ka abeya waeꞌmaba aeꞌwa nkauꞌama ntapiyena aegarakibipa, aeba puꞌwaisa puma miye.

⁷Kaeba pikaba uwaimegini, igeba wasiyigina kamanaꞌwaipa kampa waiyeno.

⁸Piya, kaꞌwaina aeba aokinapa, we, aotumpipa kampa iyoꞌmaeyamipa, aeba amatitiꞌenawapa akabitama kasima, mono kampa abinta kinapa asu igasima kamparagaena piye.

⁹Pigoya, abeya waeꞌmapa mono yugaraka agewapa kaekibempepa, kaeba mayama napiyo: Piya, aeba waba ka maentegina, kabowapa 60-wa kabu aꞌya wagina,

¹⁰yogawapa kanara puntakaba aogi agigaꞌe waiya, pika napima kaeyo. Eya, aeba paipa yagarawapa aogima kabitantemino. Aeba to marisa kinapa kayonena puwaitantino. Kotiti atokaeya kinapa aogi puwaitantino. Ikinakiyenabi mintanta kinapa iyoꞌmaeyuguna paru ibuntiyo. Aeba aꞌyaꞌma aogi yugaba puyaba mintipera kampaye. Pika napima igepa ibabo.

¹¹Pigoya, kasa abeya waeꞌmi nkigegaꞌeba a-kaeyo. Piya, igeba to wa maekenaga napikibepa, Karaisiti akabitama:

¹²Ae yugara mikune, unta kamanapa akayuyigina, kamanapa igeti waikiye.

¹³Piya, igeba tonageba mayama pewe: Igeba iyampuyena kampa punta, namaka namaka wama uwasuwa puma miyewe. We, iyampuyena kampa punta uwa nasimagini, to waina kamanapa maete mare-u me-u puta nasima tonarona aꞌyugu kamanapa aborawe.

¹⁴Piya peka nae nabemika, kasa abeya waeꞌmiba igeba to ka wa maema, yagaraena puma namatapa kabiyigina, kama kinatempiba akayasuratakena kikaba aguyosagano.

¹⁵We, kaeba abintane. Kaꞌisa abeya waeꞌmiba aogi kipa kasima Satani kipa aegarawe.

¹⁶Pigoya, ka mono aegarami nkwaeꞌmaba ae tupisa abeya waepa kabiyeno. Eya, monota aiꞌaru pe kinaꞌmi nkiyobipa kampa kunta pekana kabiyekini, igeba abiwa miyemi waepa kabitakibewe. Kiya kinaꞌmi kamanane

¹⁷Pigoya, monota aogi yuga puma kabiye kinaꞌmi nkigiba maete ima, to maete iyiyo. Eya, mono kamana uma puwaiyakikena araga ntuga pe kinaꞌmi nkigegaꞌeba inata maete iyiyo.

¹⁸Piya, mono isaꞌamaba maya iye: Purumakankama witi apa aerapakanapa, naninta na siyemaba awamupa a-nkakuno, iye. Eya, yoga kinaꞌmaba ikankapa maeyagina kanarasaye, iye. Pika napima monota kabiye kinaꞌmi nkigiba maete ima kabiwaitaiyo.

¹⁹Pigoya, kaꞌwainaba pi kabiyemi ntagaraga kamana otakanapa, kaeba a-nkabo. Piya, tara kinano, kakaga kinaꞌmi piya yiginapa, kanara abo.

²⁰We, kabiyemi ntagarama aguntaena pekiripa, tigeba aꞌyaꞌma kinaꞌmi nkiyobi arupu potaigini, to kaꞌisamiba agama iyekuru piyo.

²¹Pigoya, Koti nkaobipe, Karaisiti Isu nkaobipe, Koti aba punti nkenisore kinaꞌmi nkiyobipe, ma kamanapa wasiyoma, ugatauwe. Eya, igebi nkiyobi kamanapa a-suma, wasana intapera tumintapera ka kana puwaitamagina, ma kamanapa wasiyoma, ugatauwe.

²²Kaeba wasana mono yugaraka kayapa aꞌnota karuꞌenaba a-mpenkatao. To kinaꞌmi nkaguntaenabipa a-nkubaso. Kae kagupa nare ntare potao.

²³We, kaeba waninkamanapa a-ntao. Kanta kaukikibintanagabe to kaꞌisa yonintanagabe wainiba uwaenantoba nagana kaoꞌmaeyano.

²⁴Pigoya, kaꞌisa kinaꞌmi nkaguntaenamaba wasanami nkiyobi aboragi, taeba karuꞌena aꞌyiginkitaune. Piya, to kaꞌisa kinaꞌmi nkaguntaenama kakama waima ainti uma aborakiye.

²⁵We, pabiyamagina, kaꞌisa kinaꞌmi aogiyena pentanaba taobi aborawaeye. Piya, to kaꞌisa kampa agaompe nkaogiyena pentanaba agorapa kampa kakawaye.