Read Fore 1 Timoti 6 Bible Online

1 Timoti 6 - Fore bible

1 Timoti 6

¹Aꞌyaꞌma wasanami nkimentanti miye kayokaya kinaꞌmitaba, igeba kabiwaita kinaꞌmikaba: Tabe kina miyeka igegaꞌeba asagayukune, yiyo. Eya, wasanamiba Koti nkagegaꞌebe kamanaꞌwape maete tumisanaga kabima mima piyama yiyo.

²We, tabe kinaꞌwaimpiba Isu nkaegarami ntagara miyegana, aꞌyugu aeka: Tao mono yagarama, iyemagini kamanaꞌwapa akayuyewe. Pipa kampaye. Igeba mayama napiyiyo: Tabugai mpono yagarama ntuga potamagi, taeba asugasima aogi yugaba penoma, napiyiyo. Pigoya, kaeba pi kamanapa uwaimiwaeyagini abima aogi yugaba piyo. Tabe mone maekenaenagaba a-ntapi napi piyo

³Piya, kaꞌwaina aeba Waꞌegare Isu Karaisiti arupu kamanape Koti kanta puma mikena kamanape akayuma aꞌwae puma to kamana wasana uwaimikibipa, aeka maya yiyo:

⁴Aeba age maete iyokana anosagina, napiyenawapa kampa waintiye. Aeba kamparagaenagaba wasana ibigama, kamana akayukena maꞌena puta nasima ankagasi agasiyenaga abiye. Piya pegina, pi ntugawatasa mayama aboraye: To waina mparuta mikenaenabe, wasana pako puma atarakenaenabe, kamana akayukenaenabe, iyoꞌmikaba ata kamana uwaitakenaenabe, piyama aboraye.

⁵Eya, piya kinaꞌmi ntapiyenawaipa kamparaga pegini taga kamanapa kampa upebe puma, aꞌyaꞌma yagaba maka uta nasewe. We, piya kinaꞌmiba piya puta nasimagini, igeba Koti ntugarasa tabe kuta mpaekenaenawe, yewe.

⁶Tagane. Kaꞌwaina aeꞌenawaka napima: Kanarane, uma Koti kanta puma miyemipa, ae aguꞌama kutapa uwaena maeye.

⁷Eya, yakari purata ntagaba kaꞌena kampa maerite aboraune. Aintiba mampa kaikubompe ntagaba taeba kaꞌenaba kampa maete wakune.

⁸Piya, nakenarepe kairepe wairatantika napima: Kanara miyune, ukune.

⁹We, uwaena kuta mpaekena peꞌnagiba, igepa imiyoꞌena pigina wareꞌnakibewe. Eya, igeba ko uma paigina uwaena ibugaintanamaba ata puwaitakini aiboꞌnabo pigina kamparaga puwaitama igaikiye.

¹⁰Piya, yabaka abugaintanaba aeba aꞌyaꞌma ataenama nkagowe. Eya, kaꞌisa kinaꞌmiba piyama ibugagini, igeba imatitiꞌenaba kasagana tabe iki nakiyenamaba igupi wanta aeye. Kaeba eꞌwasaenara miyaba miyo

¹¹We, Koti nkaoꞌyagaramagaba, kaeba pintanaba kakabitama naso. Piya, kaeba kekapa iꞌma arupu puma, Koti kanta puma mima, kamatiti potama, wasana agu kaoꞌena puwaitama, esegima asima, agoya puwaitao.

¹²Kaeba kamatitiꞌenama araga ntugaba puma agaso. Piya, pai kaeba kamanapa abima uwaena kinaꞌmi nkiyobi aogi kamatitiꞌenagapa uma aboragasima, Koti nkugatanti nkeꞌwasaba maentane. Pi waiyaba eꞌwasaenaba arakuꞌma auꞌwapa aogima aborao.

¹³Pigoya, Kotiba aꞌyaꞌmaenama nkimaba imegi, ae aobi ma kamanapa ugamuwe. Piya, Karaisiti Isu aeba Pontiyasi Pairati nkaora agowapa uma amatitiꞌenawapa aogima aboranti, ae aobi kaga ma kamanapa ugamuwe.

¹⁴Piya, kaeba Koti unti kamanapa aogima wasiyegana, iꞌnintanamaba kekapa kampa ataba pugatakana, wasanamaba kamanapa kampa ugatano. Kaeba piya puta kanagana Waꞌegare Isu Karaisiti irosanoma, esegima ugamuwe.

¹⁵Piya, Kotiba aewa ntaga, otanti ntagaba taora Karaisitipa aborakiye. We, pi eꞌwasa Koti abintowa kabiratakenama nkagowe. Aeba waꞌega kinaꞌmi Nkwaꞌegawe. Aeba tabe kinaꞌmi Tabewaine.

¹⁶Ae abintowa kampa purinta, eꞌwasaenara miyika, taeba agorapa kampa uma airokaekune. Kaꞌwainaba kampa agantikana, to kaꞌwainaba kampa agakiye. We, ae agigaꞌeba asagayuyekana, esegiyenawantaga miyaba miyeno. Tagane. Uwaena kutantaga kinaꞌmi kamanane

¹⁷Pigoya, mampabi uwaena kutantaga kinaꞌmika uwaimegini, igeba igebigoꞌenaba a-puma, nagarikena kutankaitiba imatitiba a-piyo. We, Koti aeba aꞌyaꞌmaenaba tamiwaeyagi maema taꞌmu potaune. Piya, igeba aeti imatiti potama aobi piyo.

¹⁸Eya, igeba aogi yuga puma, aogiyenawaipa uwaena aborama puma, kotankaipa a-nkupebe puma mima, iyoꞌmaekenaga napiyiyo.

¹⁹Igeba piya puntiniba, aintisa maruntana puma, ibaba miyaba eꞌwasaenayaga arakuꞌma upebe piyo. Timoti ntugawatasa kamanane

²⁰We, Timoti, kaeba Koti ugatantemi ntugaba aogima kabiyo. We, kaꞌisamiba igeꞌwai kamanakaba: Aogi napiyenawe, yepa, pipa kumparine. Pi kamanapa uwa iꞌni kamana, atarakena kamanana, pipa kakabitao.

²¹Piya, kaꞌisa kinaꞌmiba pi kumanati atokaeyapa, imatitiꞌenawaipa paga pagasawe. Pigoya, awagaenaba tigeti waima waiyeno.Poro piya isa kaentiye.