Read Fore 2 Timoti 1 Bible Online

2 Timoti 1 - Fore bible

2 Timoti 1

¹Nae Porona: Karaisiti Isu nkaposorogawe, Koti abogana unatantemine. Piya, taeba Karaisiti Isuti atokaema utaratanti nkeꞌwasaenabi ubasikenaraka aposoro unatantine.

²Timoti, kaeba nabugai ntagaranempakati ma nkisapa kaeyuwe. Koti tabage, Waꞌegare Karaisiti Isuge, isigepisa awagaenabe, isintaraꞌenabe, paruyenabe, kaeti waima waiyeno. Aogi kamanakaba tanipa kampa pukune

³Nayabamagiba Koti aegarantasa puma naegeba pabiyama aegaꞌma kayokayaꞌena potaogana, ae aobipa napiyenanempaba nare ntare piye. Aibegina, naeba asi nasiba asekape arape nunamu uma kaeka napima Kotiti naꞌmu potauwe.

⁴Piya, naeba kaoꞌnu pageka napimagi, nabemika kagate tabera naꞌmu pusanaga nabiye.

⁵Naeba kamatitiꞌena waigatantika napiyuwe. Pipa tagantanawe. Piya, maru paitama arogampa Arowisiba amatiti puntiye. Piya poga, naeba abuntuwe. Kaeba taga kamatiti potane.

⁶Piyama napiyenaga pugatakana, kaeba napiyomawe. Piya, nae kaꞌnota naya katauwagana Kotiba yoga pukenaga aꞌmuntana kamogana kantabaipi wainti, pipa wasanama yaku pukama to kaeyamisa puma ituru po.

⁷Piya, Kotiba taemarakenaenaba kampa tamiye. Kampaye. Aeba esegi puma mikenaenabe, agu kaoꞌenabe, taupa kabikena esegiyenabe, tantabaipi aborama ituru purataye.

⁸Piya pika, kaeba Waꞌegarempa kamana ukenaba a-kani po. Piya, naeba igaꞌna yagarawantawa, kaga naeka a-kanipa po. Kaeba Kotitisa esegiyena maemagina, kaeti aborakibi kuntuyenaba aesagaꞌma mono auꞌwapa uma aborao.

⁹Piya, Kotiba tauꞌima aota mikenaenara taba puratantiye. Aogi pompentanareka wanane. Aeꞌwa ntapiyenarasa taba puratantine. Eya, paitakaꞌya aeba Karaisiti Isu ntugarasa awagaenawapa utaratamagina,

¹⁰ibasa yagaba pi nkawagaenama nkauꞌwapa aboraramintiye. Piya, tauꞌikena yagarare Karaisiti Isu aeba ampa aborama purikenaenama nkauꞌwapa aegugasima, aogi kamanaꞌwatasa eꞌwasaenabe miyaba mikenaenabe aboraramintiye.

¹¹Piya, pi aogi kamana aborakenaga aeba naeka: Mono kamana yoma, aposoronabe tisaenabe poma, unatantine.

¹²Piya, pi ntugaraka kuntaenaba aboranamewe. Aerawane. Naeba kampa nanipa puwe. Kampaye. Naeba namatiti potao ntagarama nkagoba aogima agantuwe. Piya, naeba abuntuwe. Ae ayata ataontanaba aeba aogima kabita wagana agogo yaga uma aborano.

¹³Pigoya, arupu kamanapa nawamupisa abempe, pi kipa aegaꞌma upebe po. Eya, kaeba Karaisiti Isuti atokaemagina kamatitiꞌenama nkauꞌwape agu kaoꞌenama nkauꞌwape aogima aborao.

¹⁴Piya, Aota Awamusaꞌamaba tagupinti mima taoꞌmaeye. Piya, aeba tagantanama ntuga kayata atamipa, aogima kabiyegana waigatano.

¹⁵We, kaeba ago abintane. Aꞌyaꞌma Esiya marisa kinaꞌmiba ikabinataginisi, Pigerasibe Emogenisibe isigeba kaga nagasase.

¹⁶Pigoya, Waꞌegawamaba Onisiporasi nkaotumpiba antaraꞌena puwaitama iyoꞌmaeyano. Piya, uwoma ntagaba aeba kayonena punatama, igaꞌna puntokaba kampa anipa piye. Kampaye.

¹⁷Aeba Aroma kumata aborama araga puma naguyosaꞌma nagantine.

¹⁸We, Waꞌegawamaba agogo yagaba Onisiporasikaba antara potakana aogima miyeno. Piya, Epesasi kumata aeba kayokayaꞌena uwaenara puntiye. Pipa kaega aogima agantane.