Read Fore 2 Timoti 2 Bible Online

2 Timoti 2 - Fore bible

2 Timoti 2

¹We, yagaranempa, Karaisiti Isu aeba awagaena pugatakanaba, kaeba maema esegima asiyo.

²Piya, naeba uwoma kinaꞌmi nkiyobipa kamanaꞌnepa uma aboraogana abempe, pipa aꞌwae puma taga kinaꞌmiti uma aborawaimegini igeba to kaꞌisa kinapa aborawaimiyo.

³Kaeba Karaisiti Isu nkaogi irebu yagara mimagina, kaeba to irebu kinaꞌmi pesa puma kuntaenaba aesaga po.

⁴Piya, kaꞌwaina irebu yugara miyemiꞌnaba, aeba uwa kinaꞌmi ntugaba kagapa kampa puta waye. Kampaye. Aeba irebu yugamana puma, aeba ababunti ntagarama nkawamupa wasiyekana kanarasakiye.

⁵Pita, to kaꞌwaina ankagasi agasi pukena pemiꞌnaba, aeba ari kamanaꞌwata kampa aegaꞌma uwa karusemipa, aeba ikankapa kampa maekiye.

⁶Piya, to kaꞌwaina araga ntuga peꞌnagiba, aeba paitama pi ntugarasaba nanintawapa maeyakana kanarasakiye.

⁷Pi yo kamanapa napiyo. Waꞌegawamaba napiyenagapa maema aragatakana aꞌyaꞌmaenama nkagowapa abiwaeyano.

⁸Pigoya, Isu Karaisiti aeba Tebiti tupisa aboramagina, purintapisa asintika, aogima napi napi po. Pika naeba aogi kamanaꞌnepa yuwe.

⁹Piya, pi aogi kamana uma aboraoka kuntaenaba namewe. Eya, igeba igaꞌna kina kanta punatamagini kirokaentawe. We, Koti kamanaꞌamaba wasanaba igaꞌnaba kampa kirokaetakenaenawe.

¹⁰Piya, Koti ababikibi kina iyoꞌmaekenaga naeba aꞌyaꞌma kuntuyenaba aesaga puwe. Piya, nae nabemika, igeba Karaisiti Isuti atokaeyigina iꞌima, miyaba eꞌwasaenaga kaga aborawaimeno.

¹¹We, ma kamanapa tagane:Piya, taeba aeti atokaema purintipi ubasikubompepa, aege kaga miyaba mikune, iye.

¹²Piya, aeka kuntaenarepa aesaga pukubompepa, aege kaga asu kabikune, iye.Piya, taeba takabitakanaba, aegeba akabiratakiye, iye.

¹³We, taeba kamana akayukubompepa, ae abiwa tagantanarakaꞌya piye. Eya, aeba tagantanama nkago mima, kamanaꞌwapa kampa akuyukiye, iye. Koti nkaobipa mono yugaba aogima piyo

¹⁴Pigoya, pi kamanakaba kaeba wasanamipa uwaimegini igeba aogima abiyo. Piya, Koti nkaobipa esegi kamanapa uwaimegini, igeba abima uwa kamanakaba maꞌenaba a-piyo. We, pintanamaba abe kinaꞌmi nki maete tumikenaenawe.

¹⁵Kaeba araga ntugaba puma taga kamanaꞌama nkagowapa arupu puma aboramagina, Koti nkaobipa aogima aborakana kanarasano. Piya pukibempepa, ae aobipa kampa kanintanaba waikiye.

¹⁶Eya, aꞌyugu kamana yiginapa, kaeba kakabitao. Piya kamana yeꞌnagiba igeba to kamparagaena puta wama mono ataigina,

¹⁷kamanaꞌwaimpaba ata inamunkama pisa puma anosama abararano. We, Aimeniyasige Pairitasige isige pi tupisa piyama ata puntase.

¹⁸Piya, isigeba taga kamanakaba paga pamaginisi: Asiratakenaenaba ago nagari waye, umaginisi kaꞌisa kinaꞌmi nkimatitiꞌenaba asunu kaegasawe.

¹⁹We, Kotiba esegi wage aemaꞌma mintegina, pi wageba asima esegi puntiye. Pika awaꞌena mayama kaentiye: Waꞌegawamaba aeba wayaꞌwawampipa aogima igantiye, iye. Piya, aꞌyaꞌma Waꞌegawamati atokaema ae agegaꞌeba maeya kinaꞌmiba igeba ataenaba ikabitaiyo, iyema kaentiye.

²⁰Pigoya, tabe namapipa tuꞌnapa korirasabe siribarasabe pewe. Ibiwanane. Igeba to kaꞌisaba yarasa puntini, kaꞌisaba marasa pewe. Piyama kaꞌisamiba aogi yuga pegini, kaꞌisamiba tuminta yugaba pewe.

²¹Piyamagina, kaꞌwainaba tumintaꞌenawapa maegaitegina nare ntare puma mimaginaba, aeba aogi tuꞌna pisa puma aogi yuga puma mima, aota mikiye. Aeba piyama kanara tabewapa aoꞌmaema tonarona aogi yuga pukenaba yokege pukiye.

²²Piya, kaeba masimabi kinaꞌmi nkigu iꞌnintanaba kakabitamagina, kekapa iꞌma arupu puma, kamatiti puma, agu kaoꞌena puma, paruyenabi miyo. Eya, aꞌyaꞌma apuya igutasa Waꞌegawama nkagegaꞌe ye kinaꞌmiba, igege kaga ketipa iꞌma paruyenabi miyiyo.

²³We, kaꞌisamiba aiboꞌnabo puma kampa abinta tonarona kamanapa uwa uta nasewa, kaeba kakabiwaitao. Piya, kaeba ago abintane. Pi kamanapa maka kamana aboraye.

²⁴Piya, Waꞌegawama ntuga pemi kinaꞌmaba maka kamanapa a-seno. Kampaye. Aeba aꞌyaꞌma kinaꞌmipa kayonena puwaitamagina, aogi tisa mimagina, kampa karuꞌena aꞌwae puma ikapa puwaitamagina,

²⁵aeba paebuma mima kamanaꞌwapa akayuye kinaꞌmi ntapiyenaba arupu puwaitano. Aeba piya pekanaba, Kotiba iyoꞌmaeyagini, igupa aꞌwae puma taga kamanapa aegaꞌma abibebe piyo.

²⁶Eya, kewamaba aeꞌwa nkawamu wasikenaga koꞌwapi iraꞌwaitantikini, kaeba paebuma taga kamana uwaimeginiba igeba abima koꞌwapisaba paima iyegaka waiyo.