Read Fore 2 Timoti 3 Bible Online

2 Timoti 3 - Fore bible

2 Timoti 3

¹Pigoya, ma kamanapa aogima abo: Agogo yagaba uwaena kuntaenaba aborakiye.

²Piya, pabi ntagaba wasanamiba igeꞌwai nki asagayuyigina, mone kutaka ibugakini, paebuta nasima, igebigoꞌena pumagini, kamanapa akayasumagini, ino ibagi kamanapa akayuma, kampa iꞌmupa puma, aota mikenaenaba akayumagini,

³iyoꞌena kampa puma, imoꞌenawaipa kampa kasimagini, akaya kamanapa uta nasima, iꞌama ntapiyenarapa kampa kabima mimagini, wasanaba ata puwaitama, aogiyenamapa kama potamagini,

⁴iyokinaꞌmipa minagaꞌena puwaitamagini, kampa napinta karuꞌena kamparagaena pigina, igebigoꞌenawaimpaba anosakini, Kotikaba kampa napiyigina ari itasaenaga ibegini,

⁵mono iga puma mima agowama nkesegiyenaba ikabitakibewe. Piyama miyiginapa igama kakabitao.

⁶Piya, kaꞌisa piya kinaꞌmiba igebi nkiyobi kamana uma aibo wayaꞌmi ntamapinti ubaiꞌmagini, napiyenawaipa igaꞌna puwaitawe. Piya waeꞌmiba aguntaenawaika kuntaena napiyegana intawamapisa tonaronama ibai puta nasegini,

⁷igeba tonarona kinaꞌmi kamana abima, taga kamanaꞌama nkagowapa kampa abikena pewe.

⁸We, paipa Yanisige Yampirisige Mosesepa kama potantamesa puma, kana kinaꞌmiba taga kamanapa kama potawe. Piya, igewai ntapiyenaba abararantaꞌena pegina imatitiꞌenawaipa agoꞌenaba piye.

⁹Piya pepa, pintanawaipa agorapa kampa kakawakiye. Kampaye. Piya, pai Yanisige Yampirisige aiboꞌenawaisipa agantasa puma, kana kinaꞌmi nkaiboꞌenawaipa aꞌyaꞌma kinaꞌmi nkiyobi aborakini agakibewe. Koti kamanata arakuregana kabigatano

¹⁰Pigoya, kaeba agonepa aogima agantane. Piya, tisaena yuganepe, nasikenaenanepe, mikenaenanempa kipe, namatitiꞌenanepe, paebuma mikenaenanepe, agu kaoꞌenanepe, asima esegima mikenaenanepe,

¹¹kama punatantananepe, nauki nakiyenanepe, ago agantane. Piya, Antiyoki kumatape, Aikoniyamu kumatape, Arisitera kumatape, tabe kuntuyena namugu aesaga pintopa nagantane. We, Waꞌegawamaba aꞌyaꞌma pi kuntuyenabisa nauꞌintiye.

¹²Eya, aꞌyaꞌma kina, Karaisiti Isuti atokaema Koti kanta puma misanaga ibemi kinaꞌmipa, igepa wasanamiba karana puwaitakebewe.

¹³Piya, agunta kinaꞌmibe amiyo kinaꞌmibe igeba tonarona ataena pigina anosakiye. Eya, igeba imiyoꞌena pigini, to igepa imiyoꞌena puwaitakibewe.

¹⁴Pigoya, kaeba aogi kamana abima esegima kamatiti puntampene. Pi kamanapa upebe po. Piya, ugamintompe kinaꞌmite nkagorepa agantane.

¹⁵Piya kaeba uwaena yagaranto mintana aota mono isapa maema aisuma abita kanama miyempene. Pi nkisaꞌama aogi napiyenaba ugamekana, Karaisiti Isuti kamatiti pegana Kotiba kauꞌiyeno.

¹⁶Piya, Piya, aꞌyaꞌma mono isapa Koti ntapiyenabisa aborantiye. Aibumagina, pi kamanapa ketepa aogima purayakima, aguntaenarekaba taupi pima, nasikenaenarepa parutu puratama, arupu kipa purayakiye.

¹⁷Piya pegina, Koti nkaoyagaramaba monota anosama aꞌyaꞌma aogi yugara yokege peno.