Read Fore 2 Timoti 4 Bible Online

2 Timoti 4 - Fore bible

2 Timoti 4

¹Pigoya, Karaisiti Isu aeba aoganta kinape purinta kinape aꞌyigitatakiye. Piyama, aeba tumpa aborama kabiratakenaenaga napima ae aobipe Koti nkaobipe naeba esegi kamanapa mayama ugamuwe:

²Kaeba mono kamanaꞌwapa uma aborao. Piya, wasanami abikena piginape, kampa abikena piginapeba aꞌyaꞌma yaga kaeba yokege puma monopa uma aborao. Kaeba esegi kamana uma intawamapa aseyo puwaitamagina, aguntaenawaika kamana uwaitamagina, igupa asiwaitagini Kotipa aegaraiyo. Piyama, aꞌyaꞌma yagaba pasema yoga puwaitama aogima ibubasanao.

³Piya, ka kana arosakanapa, wasanamipa arupu kamana maesanagaba kampa ibikiye. Kampaye. Piyama, igeba igebinti antunta uwakena tisa kina aki puma iba pigini, igebi nkiyobi kamanapa nigiꞌma ukibewe.

⁴Aibigini, igeba taga kamana abikenagaba ikabitama, tonarona aꞌyugu amani kamana kiꞌi nasikibewe.

⁵We, kaeba kampaye. Aꞌyaꞌma yaga kaega parutu kagi napiyo. Kaeba kuntaenaba aesagabo. Eya, aogi kamanapa aborakena yugaba puma, mono yugagampa nkauꞌpa aogima aborano. Poro kanaꞌwapa arosantiye

⁶Pigoya, nae nau Kotiti muta atakena kanapa arosasu pegi, mampaba atakena puwe.

⁷Naeba agasigasi pukenaenaba aogima puntuwe. Eya, naeba keꞌnempa nkatuta ago kanamagi, namatitiꞌenanempa kampa antage potauwe.

⁸Piya, ibaba arupuyenama nkantotaꞌena taminonki natakena yokege pumagina, agogo yagaba Waꞌega, arupu kamana ukena yagaramaba, aeba namikiye. We, naeꞌmana nane. Aꞌyaꞌma ae irosakibitaka ibugai kina, igeke kaga imikiye. Nagarikena kamanane

⁹Pigoya, kaeba karuꞌena naetiba kanao.

¹⁰Piya, Timasiba aeba mampabisaenaga abugaogana nagasima Tesaronaika kumati wantiye. Keresenisiba aeba kanara puma Karesiya mari waogana, Taitasiba aeba Tarimesiya mari wantiye.

¹¹We, Aruku ae abintowapa naege mintiye. Piya, kaeba Makapa aba puregirisi kanaisigina, aeba kanara yogaba ampa naoꞌmaeyano.

¹²Naeba Tikikasipa otauwagana aeba Epesasi kumati wantiye.

¹³We, naeba eꞌero muꞌmu kainepa Torowasi kumata Kapasi ntamapi atantogana, kaeba kanakena puntanapa, maentana purite kanantana, esaꞌnepe, we, yaga auꞌarirasa pumaranta isapa kaga maete kanao.

¹⁴Aresanta aeba kapa yugawa pukena yagara, aeba tabera ata punatantiye. Aintiba Waꞌegawamaba antotaꞌenaba aꞌwae pomeno.

¹⁵We, aeba kamanatepa tabera kama puratantegina, kaegeba aekaba kabima miyo.

¹⁶Pigoya, maruꞌenaba kamana unatauguni, wasanamiba kampa naoꞌmaema aꞌyaꞌma kinaꞌmiba nagaintawe. We, naeba Kotiti nunamu yokini, pi nkaiboꞌenawaikaba kamanapa a-nkuwaitano.

¹⁷Pigoya, Waꞌegawama nagora asimagina esegiyenaba namima naoꞌmaeyoga, naeba kanara aogi kamanaꞌama nkago uma aborauwagini, aꞌyaꞌma namuꞌisa kinaꞌmiba abintawe. Eya, Kotiba araiyoniwama nkawamupisa apaꞌnatantisa puma nauꞌintiye.

¹⁸Piyama, Waꞌegawamaba aꞌyaꞌma aguntaenabisa apaꞌnatamagina, mantawama kabiratakenaenawapi ubasikenaga nauꞌikiye. We, ae agegaꞌeba asagayuyaba miyeno. Tagane.

¹⁹Pigoya, Pirisikabe Akurabe Onisiporasi tunkape: Aya pewe uritayema, uwaimo.

²⁰Pigoya, Erasitasiba aeba Korinti kumata pabita mintogana, Toropimasipa yoni nkaboga aepa Mairitasi kumata atauwagana mintantiye.

²¹We, kamparaga esiba yaga aborakiya, kaeba karuꞌena naeti kanao. Pigoya, Yuburasibe Putenisibe Arainasibe Korotiyabe aꞌyaꞌma mono kinaꞌmibe kaga: Aya pene, yewe.

²²Waꞌegawamaba kauma kagukampage miyeno. Awagaenawampaba tigeti waima waiyeno.Poro piya isa kaentiye.