Read Fore Taitasi 1 Bible Online

Taitasi 1 - Fore bible

Taitasi 1

¹Nae Poro, Koti kayokaya yagara, Isu Karaisiti nkaposoro nawe. Aeba unatama, Koti uwaitanti kinaꞌmi nkimatitiꞌena esegi puwaitaoma, naba punatantine. Piya, taga kamanapa abibebe pigina anosakini Koti kanta puma mima,

²utarantanti nkeꞌwasaenabi ubasikibeka unatantine. We, Kotiba kumparipa kampa ukena yagara mimagina, paitakaꞌya eꞌwasaenawapi ubasikibeka utaratamagina,

³aintiba aeꞌwa kanapa pi kamanaꞌama nkauꞌwapa mono kamanaꞌwapisa aboraramintiye. Eya, tauꞌikena yagarare Kotiba aeba ago ugasima pi ntugaba namegi kamanaꞌnetasa uma aborauwe.

⁴Taitasi kati ma nkisapa kaeyuwe. Piya, kaeba taga nae yagara kanta puma mimagina, kamatitiꞌena tae pompesa puma kaꞌmasa pene. Pigoya, taba Kotige, tauꞌikena yagarare Karaisiti Isuge, isigetisa awagaenabe paruyenabe kaeti waima waiyeno. Monotasa kiye kinaꞌmi kamanane

⁵Pigoya, Kariti mariba mono yuga atunkapa waintoga: Puma nagaraoma, megatamagi, aꞌyaꞌma kumaka kumaka monota kabiye kinaꞌmikaba: Asiwaitaoma, ugamintone.

⁶Piya, kaꞌwainaba wasanami nkiyobipa kamanaꞌwa kampa waintakanaba, anara kaꞌanto mintakanaba, araga yagarawaisiti aguntaena pusanagaba kamanaꞌwaipa kampa wainta, ino ibagi kamana kampa akayunta Karaisititi imatiti pigina kabikibi, piya kina kiyaba asitao.

⁷Piya, pasitori kinaꞌmaba aeba Koti ntugara kabikenaenara mima aꞌyugu kamana aeti waisanagaba kabima miyeno. Aeba agebigoꞌenaba a-peno. Karuꞌenaba anta aukikenaenaba a-peno. Esegi wani ntama aiboꞌenaba a-peno. A-nkaibasanano. Aeba mone kuta asugasima maekenaenagaba a-nkabeno. Kampaye.

⁸Aeba wasana kayone puma kabiyeno. Aogiyenagaba aepa abugano. Aeꞌwa nkaupa kabima mima, Kotintana aegaꞌma, aota mima, napiyenawatapa aogima kabiyeno.

⁹Aeba taga kamana omogana abintitapa esegima asiyeno. Piya pukibepa, aeba wasanamipa arupu kamanapa aogima uwaimimagina, akayuye kinaꞌmi kamanapa akayuma asu igasano. Kariti maripa uwaena kinaꞌmiba kumpari kamana untawe

¹⁰We, pi mpariba uwaena kinaꞌmiba taga kamanapa akayuyewe. Igeba auꞌwa kampa wainta kamana uma wasana imiyoꞌena puwaitawe. Eya, Yuta kina, i kasakena tupisa kinaꞌmiba piya pewe.

¹¹We, piya kinaꞌmi nkiwamupa akunkitao. Piya, igeba kota mpaekenaga aꞌyuguyenaba puwaiyakima, piyaenaba kaꞌisa kinaꞌmi ntapiyenaba waya yagarawaipe ibaibewe. Ibaibegana, pi kinaꞌmi nkiwamupa akunkitao.

¹²We, paipa ka Kariti poropete yagarama aokinaꞌmikaba maya untiye: Kariti kinaꞌmiba aꞌyaꞌma yaga kumpariꞌena puma, kabu kina kanta puma mima, iyekita karegi kinane, untiye.

¹³Pi nkawaga kamanapa tagane. Piya, kaeba esegi kamanatasa uwaimegini, igeba imatiti pukenaraka esegima asiyeno.

¹⁴Eya, Yuta kinaꞌmi nkamani kamanapa a-nkaegaꞌma, taga kamana ikabita kinaꞌmi nkimentantiba a-mpiyeno.

¹⁵Piya, wasanami ntapiyenawaipa nare ntare peginaba, aꞌyaꞌmaenaba iyobipa nare ntare piye. We, kampa imatiti puma kamparagaena napiye kinaꞌmitiba, kaꞌenaba kampa nare ntarepa piye. Kampaye. Igeꞌwai napiyenawaintaga iguꞌyaga kaga iꞌni pawaye.

¹⁶Piya, igeba iwamutasaba Kotipa aegarauwe untiniba, nasikenaenawaitasaba Kotiba ikabitawe. Piya pegana, Kotiba igekaba aema itaye. Igeba kamana akayumagini, aogiyena pukenaenaba kapa kampa abae pewe.