Read Fore Taitasi 2 Bible Online

Taitasi 2 - Fore bible

Taitasi 2

¹Pigoya, kaekantanaga napima maya yuwe: Kaeba wasanaba arupu kamanapa uwaimo.

²Piya, kaeba anasa kinaꞌmipa mono uwaimegini, igeba paebuma mima, arupu puma mima, napiyenawaitapa kabima mima, imatitiꞌenabe agu kaoꞌenabe monota asima mikenaenabe tagantana pigina waiwaitano.

³Piya, anasa waeꞌmikeba pabiyama uwaimegini, igeba monota aota mima, akaya kamana kampa uma, aibo waninkama igaꞌna puwaitasanaga kabima mima, aogiyenama nkagowapa puwaiyakiyo.

⁴Puwaiyakimagini igeba kasa waeꞌmipa uwaimigini, igeba iwaegipe yagarawaipe agu kaoꞌena aogima puwaitama,

⁵napiyenawaitapa kabima mima, nare ntare puma mima, namapintisaena aogi puma, kayonena puma, iwaegi nkiwamu wasiyiyo. Piya, Koti kamana akayasuma maete tumisanaga, piya piyo.

⁶Piya, masimabimikeba pabiyama esegima uwaimegini, igeba iꞌwaitapa kabima miyiyo.

⁷Pigoya, kaega aogiyenamana paitawaitama, aꞌyaꞌma aogi yuga pegini agama kaegaraiyo. Mono untanapa antage kamanakeba kagapa a-nkuwaimima, taga kamana paebuma uwaimo.

⁸Piya, aogima parutu kamana yegini, kama kinatimpiba akayapa kampa uma taeti ata kamanaka aisakateginiba, igeba ini piyo.

⁹Pigoya, kaeba kayokaya kinapa kamana uwaimegini, igeba kiya kinaꞌwaimpi nkimentanti mima, aꞌyaꞌma kayokayaꞌena aogima puwaitaiyo. Piya, igeba iwamupisa kamanapa a-nkakayuma,

¹⁰kuntanaba a-punta mima, aꞌyaꞌmaenawaipa tagantanamana puwaitaiyo. Aꞌyaꞌmaenawaika piya pumagini, tauꞌikena yagarare Koti aeꞌwa kamanaꞌama nkauꞌwapa aboraigini iꞌmu piyo. Taeba nare ntare puma Karaisiti kanaka aobi peno

¹¹Pigoya, aꞌyaꞌma maga maga kinaꞌmite tauꞌikenaraka Koti nkawagaenawampa aborantine.

¹²Piya, atama mpikenaenarepe mampabisa iꞌnintanarepe atasanagaba aborama purayakima: Mampara paebuma arupu puma mima Koti kanta puma miyiyomagina, awagaenawapa aborantine.

¹³Eya, tabe Kotire, tauꞌikena yagara Karaisiti Isuba eꞌwasaenabi aborawaeyakana aeti aogima atokaekenaga: Aobi puma aota miyiyoma, utaratantine.

¹⁴Piya, aeꞌwa nkauma kasima, aꞌyaꞌma antageꞌenabisa ika puma taba puratantegi, ae tunkampitaba nare ntare puma mima aogi mono yuga pukenaga esegi pukubompeka, puꞌma aogi puratantiye.

¹⁵Pigoya, kaeba ma kamanaꞌama nkagoba aogima uwaimimagina, kiya kinaꞌmi usu kamana uma asiwaitagini ataenawaipa aebasanaiyo. We, kaekaba wasanamiba: Uwa yagaragawe, usanagaba, aogima kabiyo.