Read Fore Taitasi 3 Bible Online

Taitasi 3 - Fore bible

Taitasi 3

¹Piya, kaeba kaoꞌmipa asi nasiba uwaimegini, igeba kabiwaita kinaꞌmipe kiya kinaꞌmipe imentapinti mima, igeꞌwai nkiwamupa wasimagini, aogi yuga pukenagaba yokege piyo.

²Piya, igeba a-nkakayasuwaitamagini, maka kamanapa a-nkuwaitamagini, paru puma mima aꞌyaꞌma wasanamipa kayone puwaitaiyo.

³We, paipa taegeba aiboꞌena pumagi kamanapa akayuntune. Piya puwakana, kewamaba antage kiꞌi tabaibogana, tonarona tagu iꞌnintanamage kamparaga taꞌmuntanamage igaꞌna puratantine. Piya purataoga, taeba asi nasiba wasana ata puwaitama igeꞌwai mparuta maekenagaba napintune. Piya puwakini, wasanamiba kama purataugu, taeba taoꞌmipa pabiyama kamaena puwaitantompene.

⁴Pigoya, aintiba tauꞌikena yagarare Kotiba aogiyenama nkagowa aborama agu kaoꞌena pukena antaraꞌenaba aborantipa tauꞌima taba puntiye.

⁵Piya, aeba taere nkarupuyena pompe ntugaraka wanane. Aeꞌwa nkagutasa antara puratamagina, Aota Awamusaꞌwatasaba aeyobatatama aota aboraratama, kasa yagara kanta puma taba puratantine.

⁶Eya, tauꞌikena yagarare Isu Karaisiti ntugarasa Kotiba Aota Awamusaꞌwapa asunu kaeyogana, taetiba tumpa pumaewantiye.

⁷Piya, aeba awagaenawatasa arupu purataka, taeba aeti atokaema waiyaba eꞌwasa maekenaga asunu kaerataogana, taeti tumintiye.

⁸Pi kamanapa tagane. Piya, nae nabemika kaeba pi kamanapa esegima uwaimegini, Kotiti imatiti peꞌnagiba asima paebuma mima aogi yuga pukenaga asi nasi napiyiyo. Pi ntugaba kanara puma wasanaba iyoꞌmaeye.

⁹Pigoya, tonarona uwa ibigata nasikena kamanape, aotumpi kamanape, akayukena kamanape, ago kamanataka maka ukenaenabe, pintanamaba kampa taoꞌmaema aogi nakenaba kampa aekiye. Pipa kaeba kakabitao.

¹⁰Piya, kaꞌwaina aeba mono kinaꞌmi ntapiyena paibekanapa, katano, tararano, arupu potagana kampa abekanapa, kasagana abira miyeno.

¹¹We, kaeba abintane. Piya kinaꞌmaba aeba kepa kaitegina aguntaena puma, aeꞌwa nkaupi pima piye. Nagarikena kamanane

¹²Pigoya, Atemasiwo, Tikikasiwoma otakana kaetiba wakanapa, kaeba Nikoporisi kumati ampa nagao. Piya, tabe esiba yagaba pi kumata ampikuwema, napiyuwe.

¹³Pigoya, ago kamanaꞌyaga yagara Senasibe, aoꞌmi Aporobe, isigeba kaeti aboraisiginapa, keꞌi kusi pusanaga nasikenaenarapa isiyoꞌmaeyo.

¹⁴Piya, taokinaꞌmipa puwaiyakegini, igeba asima paebuma mima asi nasiba aogi yuga puma, kusi pe kinapa iyoꞌmaeyigina, monoꞌwaimpaba auꞌwantagaꞌena peno.

¹⁵Aꞌyaꞌma naege miye kinaꞌmiba: Aya pene, ugamewe. Kaeba imatiti puma agu kaoꞌena purata kinaꞌmipa: Aya pewe iyema, uwaimo. Pigoya, awagaenaba aꞌyaꞌma tigeti waima waiyeno.Poro piya isa kaentiye.