Read Fore Pirimoni 1 Bible Online

Pirimoni 1 - Fore bible

Pirimoni 1

¹Naeba Poronawe. Karaisiti Isu, aeka igaꞌna punataga mintuwe. Naebe, taoꞌyagara Timotibe, tasigeba ma nkisapa Pirimoni kaeti kaeyuse. Kaeba tasibugai ntagara ka yugare pompene.

²Piya, kaewa, tamana Apiyawa, taoꞌmaenti ntagara Akipasiwa, kae namapi monota aiꞌaru pe kinana, sumagira tigeti kaeyuse.

³Tabarempa Koti, Waꞌega Isu Karaisiti, isigetisa awagaenabe tintawama paruyenabe tigeti waiyeno. Pirimoni aogima nkaegarantiye

⁴Naeba kaeka nunamunepisa esugatamagi, Kotinempakati naꞌmu pugatauwe, omuwe.

⁵Piya, naeba abopa kaeka maya yewe: Kaeba Waꞌega Isuka kamatitiꞌena potamagina, Kotiti atokaenta kinapa, agu kaoꞌena puwaitane. Pika yega, abima Kotika naꞌmu puwe.

⁶Piya, kaeba wasanage ampa kabo puma kamatitiꞌena piya pega, aꞌyaꞌwaema Karaisititisa aogiyena maeyompentana igeba agaka, nunamu yuwe.

⁷Owe, naoꞌyagara, Kotiti atokaenta kina agu kaoꞌena puwaitampe, pintana intawama esegi puwaitaka, nantawama paruyena pegi asugasima naꞌmu puwe. Kayokaya yagara Onisimasi ae kamanane

⁸Piyama naeba Karaisiti nkawamutaka: Kaeba aogiyena po, esegima ugamosinta kanara yosine.

⁹Pigoya, naeba karena, Karaisiti Isu ae igaꞌna yagara ibaba mintuwe. Piya, esegi kamanapa kampa ukuboka, agu kaoꞌena puma paebuma ugamukuwe.

¹⁰Naeba maya yuwe: Yagarane Onisimasika kabigauwe. Naeba igaꞌna namapi minta, mono omintone. Pintana aogima abima, pigoyema yagarane kanta puma abora mintemine. Kaeba agama aogi potao.

¹¹Piya, aeba paipa kampa aogi yuga puma kaoꞌmaentemine. Ibaba aeba kanara aogi yuga puma, kaepe naepe tasiyoꞌmaekiye.

¹²Ibaba naeba agarubaogana, aeba mayama naunkantayaga to kaeti waye.

¹³Piya, naeba aogi mono kamana yuwagini igaꞌna namapi nataugu mintoka, Onisimasipa mataꞌi naoꞌmaekenaga arakuꞌma ababosinta, kae maru mpaema naomaeyamisine.

¹⁴Pipa naene kampagi uwa arakuꞌmagi, kampa esegi pugatauwe. Nae nabemika, kaeka ntapiyenabisa aogi po.

¹⁵Piya, kasa yagara aboragina agora to ababikibempeka, aꞌyo kagaite kanantipayawema napiyuwe.

¹⁶Piya, ibaba uwa kayokaya yagaraba kampaye. Aeba Isu nkaegarami kayokaya yagara mintiye. Pi tabugai taoꞌyagaraga naepa nabugaikana, kaeba asunagasima tabera potakibenema abuwe. Piya, yoga yagaraga, Waꞌega aegaranta yagara, aepa aogima ababo.

¹⁷Piya, naeka: Naoꞌyagara, naege ka yugara piyema napiyempepa, Onisimasi to kakema nababempesa puma ababo.

¹⁸Pigoya, kaꞌena kamparaga pugatama, ireta pugatakanapa, nae nagera atao.

¹⁹Iretawapa naene ikapukuwe. Tagane. Naeba Poronawe. Ma nkisapa nayantepisa kaeyuwe. We, kaeba nae kamana abima eꞌwasa maentampe, pika iretaba tabera punatampene. Aerawane. Pikaba kampa yuwe.

²⁰We, naoꞌyagara, Waꞌegawama nkageraka kaꞌmu punatamagina, pi Karaisiti nkagegaꞌeraka aogi potamagina paruyena punatao.

²¹Naeba abopa, pi kamanaꞌne wasikibene. Piya pega, naeba ma nkisapa kaeti kaeyano. Kamanaꞌne ugamosa puma, kaꞌisa napiyenagatasa amato pukibenema, abuntuwe.

²²Pigoya, Koti nunamuripa abiritaka naeba tigeti kananoma, napiyuwe. Piya, ka maru naeꞌena akusanataga kaege ampiyeno. Kamana uma nagarintiye

²³Pigoya, Epaparasi aeba: Aya pene, ugamiye. Aeba Naebe Karaisiti nkigaꞌna yagararasawe.

²⁴Pigoya, aꞌyaꞌma yuga kinaꞌne: Makabe, Arisitakasibe, Timasibe, Arukube, igeba pabiyama: Aya pene, yewe.

²⁵Pigoya, Waꞌega Isu Karaisiti aetisa awagaena tiguti waiyeno.Poro piya isa kaentiye.