Read Fore Iburu 1 Bible Online

Iburu 1 - Fore bible

Iburu 1

¹Paipa uwaena yaga Kotiba toma toma ki iꞌma poropete kinaꞌmi nkiwamutasa tayabamagi mono kamanaꞌwapa uwaimita kanantiye.

²Piya, ainti atuti iba nagarikena kanara, Kotiba kamana agowapa, yagarawa nkaboraramintine. Pi ntagarama nkayatasa Kotiba mampaba pumaꞌma, aꞌyaꞌmaenama nkago miyenoma otantine.

³Piya, yagarawampa aeba Koti kanta puma mima kaꞌmasa pumagina, aeba Koti nkeꞌwasaena aboraramimagina, kamanaꞌwampa nkesegiyenarasa aꞌyaꞌmaena mabe mantabe parutu puma kabiye. Aeba aguntaenabisa aeyobatatakena yuga puma aꞌya kaitegina, Tabe Waꞌegama nkayatakanti inati asu maraꞌmintiye. Koti Ntagarama aꞌyaꞌma enisore kinapa igantiye

⁴Pigoya, abawampa yagaranene ominti nkagiba enisore kinaꞌmi nkigeba igasisa puma, aewapa enisore kinaꞌmi igasima abawampa nkayatakanti maraꞌmintiye.

⁵Piya, paipa paipa Kotiba yagarawaka maya omintiye:Yagaranekawe. Kaepa iba aboragatauwe, untiye, iye. Piya, aeka to kake maya untiye:Naeba abawampantana puma miyekana, aeba yagaranentana puma miyeno, untiye, iye. Pigoya, pi kamanapa Kotiba ka enisore yagaraga untiye, a. Kampaye.

⁶Piya, aeba amaru yagarawa mabi ataogana aboraogana maya untiye:Aꞌyaꞌma enisore kinaꞌnempitaba, aeti tirakabima agisiyo, untiye, iye.

⁷Piya, enisore kinaꞌmikaba maya untiye:Naeba enisore kinaꞌnepa esiba kanta puma aboramagi, pi ntuga kinaꞌnepa yaku nkantebu kanta puma aborawaitauwe, untiye, iye.

⁸We, aꞌwae puma yagarawaka Kotiba maya omintiye:Kaeba Koti mimagina, tabe Waꞌega aꞌyaꞌma yaga miyaba mima, kabiwaitakenaenagatapa kabima mima parutuꞌena puma miyaba mikibene, iye.

⁹Piya, kaeba arupuyenaga kabegina, antageꞌenaba kama potane, iye.Pika kae Kotina, naeba kaꞌmuntanagapa kae tikataogana kaoꞌmipa igasaye, untiye, iye.

¹⁰Pigoya, to kapa Kotiba maya omintiye:Waꞌega, kaeba paitakaꞌya maba aboratama, mantaba kayapisa pumarantampene, iye.

¹¹Piya, kaeba miyaba miyegana, mantabe mabe paisa kai abararaisa puma abararama ata puwakiye, iye.

¹²Piya, kabi akarakitantana to antota kasa maema kabisa puma, mantabe mabe to antota kasaꞌena aborakiye, iye.We, kaeba kampa antota kasaꞌena aborama pabiyama mimagina, masimabi kauꞌyaga miyaba mikibene, untiye, iye.

¹³Pigoya, paipa Kotiba yagarawaka to ka maya omintiye:Kaeba nayatakanti maraꞌmiyega, kama kinakapa kagisa amentapinti atakini waiyo, untiye, iye. Pigoya, pi kamanapa Kotiba ka enisore yagaraga untiye, a. Pipa kampaye.

¹⁴We, enisore kina igeba awamusa kina mima Koti kayokaya potagina, iꞌikibi kina iyoꞌmaeyiyema uwaitaye.