Read Fore Iburu 10 Bible Online

Iburu 10 - Fore bible

Iburu 10

¹Pigoya, paisa mono ago kamanapa pipa amane. Eya, aogi auꞌwa ainti aborakibintanaba pipa tagantanawe. Piya, paisa monoti pase kinaꞌmika kaboga kaboga paisa muta atantapa, pika ago kamanaꞌamaba kampa arupu puwaitagini igeba aota kina kampa aborawe. Pipa kampaye.

²Piya, igeba aota kina aborasinta, pika to ka kaburapa kampa mutapa atasine. Piya, monoti pase kinaꞌmiba apuya puma miye kina aborasinta, to kakeba aguntaenawaikaga kampa napiyesine.

³We, aꞌyaꞌma kabuba muta atamaginiba, aꞌyaꞌma yaga aguntaenawaikaba uwa napiyewe.

⁴Eya, purumakankama kuratasabe memewama kuratasabe aguntaena agora maegaikenaba kampa waintiye. Kampaye.

⁵Aibuguna, Karaisiti mampabi tumintana Kotipa maya omintiye:Kaema agunta pasa katakenaenabe muta katakenaenabe kampa kabogana napintana, kaeba pika nauꞌnepa aboranamintane, iye.

⁶Piya, kaeti yaga kaekenaenagabe aguntaena maegasima muta atakenaenagabe kampa kaꞌmu pene, iye.

⁷Piya, naeba maya yuwe: We, Koti, pai kamanaꞌnepa esapi kaemarantasa puma, ibaba kabugaintana wasikena kanauwe, yuwe, untiye, iye.

⁸Piya, aeba ago kamana wasikenaga napima marupa maya untiye: Kaeba kaema agunta pasa katakenaenagabe muta katakenaenagabe, kaeti yaga kaekenaenagabe aguntaena maegasima muta atakenaenagabe, kampa kabegina kampa kaꞌmu pene, untiye.

⁹Piya untana, akaꞌiba maya untiye: We, kabugaintana wasikena kanauwe, untiye. Piyama maruꞌenaba asuꞌa pugasima, kasaꞌenaba ae marupi asima esegi potantiye.

¹⁰Piya, Isu Karaisiti aeba Koti nkabugaintana wasima, auꞌwapa muta atantiye. Piya puma, aeba ka yaga muta atama esegi pogana aota puratantiye. Karaisiti mputa atakenaenawampa aguntaenarepa maegaintiye

¹¹Piya, aꞌyaꞌma mono kiye kinaꞌmiba asi nasi asima mima yogawaipa puma muta atabuntawe. Piya puntapa, aguntaenaba agorapa kampa maegaintiye.

¹²Piya, Karaisiti aeba ka yaga ka muta atama aguntaenaba agora maegaintine. Piya potate, aeba Koti nkayatakanti asu maraꞌmimagina,

¹³kama kinaꞌwapa aki puwaitakana agisa aema miyemika aobi puma miye.

¹⁴Eya, Karaisitiba ka muta atamagina, pi ntugarasa aeti atokaeyompe kinaꞌmite aota puratantika, aota miyaba mikune.

¹⁵Pika Aota Awamusaꞌamageba awaga kamanapa mayama aboraramiye:

¹⁶Piya, Waꞌegawamaba maya untiye: Ma ntagaba aꞌya waka, wasana to ka atokaekena kamana uma esegi pukuwe, untiye, iye.Pi kamanapa mayamawe: Ago kamanaꞌnepa igupi atakana waikiye, iye.Eya, ago kamanaꞌnepa napiyenawaipipa kaetakana waikiye, untiye, iye.

¹⁷Pigoya, to amato puma maya untiye:Aguntaenawaikabe antageꞌenawaikabe to kakema kampa napikuwe, untiye, iye.

¹⁸Piya, Kotiba aguntaena ago asuꞌa pugasaka, aguntaena maegaikena muta atakenaba to kakema kampa waintiye. Kotiti atokaema miyeno

¹⁹We, naoꞌmitaba, Isu kuratasa kabe aitatantika, kampa taekuruba punta Koti nkaota marupipa asu pasokana kanarasaye.

²⁰Piya, pi mparupi asu pasikena kasa eꞌwasa kipa Isu aeꞌwa nkautasa aitatantiye. Eya, auꞌwapa kairasa kabera akumparanta kanta puma aꞌwaeratantiye.

²¹We, mono kiyerentaga kana Koti nkaokinatapa kabirataka, aeti atokaema miyeno.

²²Piya, aeba korankapa aibarase puma tagupisa ata napiyenarepa aeyobakasima, aota wanitasa tautepisa iꞌnintana aeyobatagaintika, taeba tara tagiba kampa napinta Kotiti tamatititakaꞌya puma aeti atokaema miyeno.

²³Eya, utaratanti Kotiba tagantanama nkagowe. Pika taeba tara tagiba kampa napinta, aeti atokaema tamatiti pompentanaba kampa kaenta, aeti esegima atokaeyano.

²⁴Eya, pika taoꞌmikegaba napima kabima mima, agu kaoꞌenabe aogi yugabe takapintisa aborano.

²⁵We, monota aiꞌaru petiba kaꞌisa kinaꞌmiba kampa irosaꞌma wanta uwasuwa puma miyewe. Ige pesapa kampa punta, taoꞌmipa kabiwaitano. We, Karaisiti kanaba aborakena pemika aogima kabiyeno. Koti Ntagarapa a-tikabitaiyo

²⁶Pigoya, Karaisiti taga kamanaꞌama nkagoba aogima abibebe punta, aintiba taete ntapiyenarasa agunta kiꞌi nasi nasi pukubompepa, aguntaena maegaikena mutapa to kakema kampa waikiye. Pipa kampaye.

²⁷Piya pe kinaꞌmiti tabera iyekuru piginaba, kamana uwaitakenaena igeti aborakana, pabi ntaga tabe yakutasa Kotiba kama kinaꞌwapa kaegaikiye.

²⁸Pigoya, taeba abune: Kaꞌwainaba Mosese nkago kamanapa aemita puma ataena pukibipa, tarawo kakaga kinaꞌmiba agama kamanaꞌwapa aboraigini, pi ntagaragaba kampa intarapa puma aeguyigina purikiye.

²⁹We, to kaꞌwainaba Koti Ntagara akabitamikaba, ayawema napiyewe. Pi ntagaramaba atokaekena kuratasa aota yagara aboranti, pi kurapa iꞌnintana potamagina, awagaena taminti Nkawamusaꞌamaka uma ata potamagina, aeba tabe kuntuyenaba maekiye.

³⁰Eya: Kamparaga ika nkantotaꞌena naeꞌenawe, yemi ntagarama nkagowapa ago agaune. Piya, aeba to ka maya untiye: Waꞌega aeba aokinaꞌmi kamanapa abima aewa aꞌyiginkitakiye, untiye.

³¹We, eꞌwasa Kotiba tarakuꞌma kamparaga ikatepa aboraramikibipa, pipa tabe taekuruyenawe. Tamatitiꞌenara asima esegi peno

³²Pigoya, tigeba paipa Kotitisa eꞌwasaena maentaka napiyiyo. Pi ntagaba tabe kuntuyenaba timigiri, tigeba aesagaꞌma araga ntuga puma esegi puntawe.

³³Piya, kaꞌisa yagaba wasanami nkiyobi asiritama, kamparaga kamana uritama tabe kuntuyena timintini, to kaꞌisa yagaba tiyoꞌmikeba kaꞌmasa puma imuguri, tigeba tiyoꞌmiti iyoꞌmaekena atokaentawe.

³⁴Eya, tigeba igaꞌna punta kinakaba tintara puwaitantawe. We, kaꞌisa yagaba wasanamiba mone kutati tiparauguripa, tigeba: Aerawane, uma, tigeti asugasima waiyabaꞌenaripa waintika napima, tintawamaba asoya puntawe.

³⁵Piya pumagiri, tigeba pi esegi timatitiꞌenabisa tabe ikantana maekibewe. Pipa a-kasiyo.

³⁶Piya, tigeba esegima asimagiri, Koti nkabugaintana wasiyiyo. Piya puntiripa, Koti utaritantintanaba maekibewe.

³⁷Eya, mono isaꞌamaba maya iye:Pigoya, aro ntagantowe, iye.Aborakibi ntagara kampa uwa migaranta aborakiye, iye.

³⁸Piya, arupu kinaꞌnempiba imatiti puma miyaba mikibewe, iye.We, kapa aꞌwae puma natakibipa, nantawamaba kampa aꞌmu potakiye, untiye, iye.

³⁹We, taeba aꞌwae puma ataenabi mpikena kinaꞌmi tupisa kampa mintune. Taeba tamatiti puma tauma waiyaba mikena kinaꞌmi tupisawe.