Read Fore Iburu 11 Bible Online

Iburu 11 - Fore bible

Iburu 11

¹Tamatitiꞌenaba pipa Kotiti atokaema agawa pompentanama nkagowe. Eya, taowama kampa agamintanaba taguꞌamaba tamatiti puma tagantana piye.

²Piya, paisa kinaꞌmiba esegima imatiti puguna, Kotiba igaogana kanarasantiye.

³Piya, taeba tamatiti puma, Koti nkawamutasa maba punti kamanapa abune. Eya, Kotiba kaꞌena kampa waintapisa aborantika agaune. Eborowa Inokowa Nowawa sumawe

⁴Eboro aeba Kotiti amatiti puma muta ataogana, pi mputa ataomeꞌnaba Keni muta ataomepa againtiye. Eya, Eboro amatiti pogana, Kotiba muta ataomentanawaka agaogana kanarasaogana: Arupu yagaragawe, otantiye. We, Eboro puꞌwantemipa amatitiꞌenawampaba kamanapa uwa uyaba miye.

⁵Inoko aeba Kotiti amatiti pogana, purikenaenama auti kampa aegayabomeka Kotiba aoganta ababute mantabinti intiye. Eya, wasanamiba aeka aguyosagaumepa, Koti ababurogini kampa agantawe. Piya, Inoko kampa intogana aeka Koti abogana kanarasantiye, mono isaꞌamaba piya iye.

⁶Piya, wasanama Kotiti kampa amatiti pemipa, Koti abimagina kampa aꞌmu potaye. Kampaye. We, wasanamaba Kotiti atokaekena puntanaba, aeba: Koti uwa mintana aeka aguyosaga kinapa aogi ika imikiye, utegina amatiti pekana kanarasakiye.

⁷Nowa aeba Kotiti amatiti puntiye. Piya pogana, Kotiba ainti aborakibintanaga omogana, Nowaba kamanawapa aegaꞌma ae tunka nkiꞌikenaga wanipisa kareba puntiye. Piya pumagina, aeba pi amatitiꞌena yugawatasa mampabisa kinapa kamanapa uwaitantiye. Eya, amatitiꞌenawata arupu puratakenaenara Nowa paitaratantiye. Abaraꞌamuwe

⁸Abaraꞌamu aeba Kotiti amatiti pogana, Kotiba Abaraꞌamuka kegaꞌe yogana pi kamanapa wasintiye. Piya, aeba kumaꞌwapa kaitegina, Koti amikena maga agakena wama amatiti puta kampa agantome kiꞌi wantiye.

⁹Wamagina, aeba amatiti puma Koti otaome mpara wama, pimpara namu yagara kanta puma umintantiye. Aeba seri nama kimaꞌma mintoginisi, yagarawa Aisakibe Yekobube kaga mintantase. Piya, isigeba pimpa kaga maekibesema, Koti uma esegi puntiye.

¹⁰Piya, Abaraꞌamuba aꞌyaꞌma yaga aota kumapi ampikenaga napintiye. Pi kumapa esegi waꞌega wantaga, Koti aema aborakibi kumaka napintiye.

¹¹Serageba Kotiti amatiti puntiye. Piya, aeba yakari pukena kanapa ago agasoganaba, otanti ntagarama kamanaka: Tagane, uma amatiti puma, kanara yagaraena pukena esegiyenaba maentiye.

¹²Piya, Abaraꞌamuba karenarama aro ntaganto purikena pogini, aepisa uwaena kina aborantawe. Eya, mantarisa noribe kayo wanitasa kepiyape kampa aisompesa puma, pi nkawameta aborantawe.

¹³Pigoya, pi kinaꞌmiba imatitiꞌenayaga mima puꞌwaewantawe. Piya, utawaitanti ntanama nkauꞌwa kampa maenta, pagasara waintogini agama iꞌmu puma mintantawe. Piya igeba: Taeba namuꞌisa kina kanta puma mamparapa aꞌyo ampintune, untawe.

¹⁴Piya yume kinaꞌmiba ma agowai iyota aguyosagakena untawe.

¹⁵We, igeba ikaꞌintaesi potanta mpawaika napintasinta, aguyosaꞌma aꞌwae puma wakena kipa agantasine.

¹⁶We, pipa kampaye. Igeba mawaipa agasima waintome mpa agakenaga ibugantiye. Eya, manta asu agakenaga ibugantiye. Piya puguna, Kotiba abima ige Koti mikenaga kampa ani puntiye. Kampaye. Aeba aota kumaꞌwaipa ago yokege puntiye.

¹⁷Piya, Abaraꞌamuba Kotiti amatiti pogana, Koti abaraꞌamu nkagoba agakenaga omogana, aeba Aisakipa ababuma Kotiti muta atakena puntiye. We, paipa Kotiba Abaraꞌamupa maya omintiye: Aisakipisa yakarakiꞌnunkapa uwaena aborakibewe, omintiye. Pi kamanakaba Abaraꞌamuba kampa tara agiba napinta, aeba Koti nkawamu wasima, ka yagarantowa aeguma kaema muta atakena puntiye.

¹⁹Piya, aeba mayama napintiye: Aeba puꞌwakanaba Kotiba kanara asitakiyema, napima ababute wantiye. Eya, aeba yagarawa purintapisa ababunti nkawametane. Aisakiwa Yekobuwa Yosepewa sumawe

²⁰Aisaki aeba Kotiti amatiti pumagina, Yekobuke Isokeba aꞌmu puwaisitama, ainti Kotitisa isigeti aborakibintanaga uma aꞌmu puwaisitantiye.

²¹Yekobu aeba Kotiti amatiti puma, purikena puntanaba aeba aꞌmuntana Yosepe ntagara tara isimintiye. Piyama asawata amagi tara puma Kotiti parokaema aꞌmu puwaisitantiye.

²²Yosepe aeba Kotiti amatiti pumagina, purikena kanaꞌwa arosaogana, Isureyo kinaꞌmiba Isipi ma kaitakibe kamanapa untana, ayampuwaka: Uma kainataiyo, uwaimintiye. Mosesewe

²³Mosese anoge abage isigeba Kotiti isimatiti puma yakari potamaginisi, Mosese agausumepa aogi yagara aboraoginisi, isigeba mabisa waꞌegawama kamanakaba kampa isiyekuru pumaginisi, kakaga u kakatantase.

²⁴Mosese aeba Kotiti amatiti pumagina, anosantanaba Parao nkaragama ntagarawe usanagaba kampa abuntiye.

²⁵Piya, aguntaenama nkigaenawapa aronkanto waiyogana pipinti uma pasisanagaba kampa abogana, aeba Koti nkaokinaꞌmige kuntaena maesanaga abuntiye.

²⁶Eya, aeba Isipi kinaꞌmi mpone kuta maesanaga kampa abogana, aeba Karaisiti aborakibi ntagaga karana potaumekaba: Kanarane, untiye. Piya, aeba Kotitisa aogi ika mpaekenaga piya puntiye.

²⁷Piya, Mosese aeba Kotiti amatiti pumagina, mabisa waꞌega yagarama nkamoꞌenagaba kampa aekuru punta, asima Isipi maba kaintiye. Piya, aeba Koti nkagasu puma asima esegi puntiye.

²⁸Aeba amatiti puma, Pasoba naninta nama, korapa maema kabera paiꞌataogana marusa yagara aegukena enisorewama agama kampa iyeguntiye.

²⁹Isureyo kinaꞌmiba Kotiti imatiti puma, tete kayo wanipi uwa mari wasuma taꞌeyuguna, Isipi kinaꞌmiba igate ikaꞌi wauguna, wanipa tumima iyeguyogini pirintama naesuwaewantawe.

³⁰Igeba Kotiti imatiti pumagini, wama Yeriko kuma tonaentisa tarumaema yaga ainkinki puguna, yabatasa kimaranta kibi takuma aigasabaꞌwantiye.

³¹Piya, kumi wae Areyabu aeba Kotiti amatiti pomekana, aeba tara yagara tara pi kumapinti kiya pukena wausuguna isiyoꞌmaeyomekana, pi kumatasa kamana akayuyome kinake kampa purintiye. Uwaena to kinaꞌmiba imatiti puntawe

³²Pigoya, aya kita to kamanapa amato puma usuwe. Aꞌyaꞌma kinaꞌmika yosinta eꞌero kamana yosine. Piya, Kitiyoniwa, Parakiwa, Samusoniwa, Yepitawa, Tebitiwa, Samuweriwa, aꞌyaꞌma poropete kinana, sumagini,

³³igeba Kotiti imatiti puntawe. Piya, igeba maꞌena puma uwoma kina igaintawe. Igeba arupu puwaitakena yuga puntawe. Igeba Koti utawaitanti nkauꞌwapa maentawe. Igeba araiyoni yagami iba nakena iwamupa akunintawe.

³⁴Igeba tabe yakunkama nkesegiyenawapa asugasima atuꞌmantawe. Igeba iyegaka wauguna paroya ntoginkamaba kampa irisantiye. Igeba magimagiyenabisa esegiyenawaipa maentawe. Igeba esegi maꞌena kina aborantawe. Igeba namuꞌisa kama kinapa igarubakaentawe.

³⁵Wayaꞌmiba iyokinapa purintapisa ibabuntawe. Pigoya, to kaꞌisa kinaꞌmiba asima aogi eꞌwasaena maekenaga napiyuguni karana itama iyeguyuguni: Aerawane, ute puꞌwantawe.

³⁶To kaꞌisa kinaꞌmiba kuntaena maeyuguni karana puwaita kinaꞌmiba igeꞌwaintanaraka akayasuma, igaꞌna kasutasa iyegumagini, esegi igaꞌnarasa kirokaetama, igaꞌna namapi itantawe.

³⁷Piya, igeti kuntaena maeyuguni, yaba kasutasa iyeguntini, sorasa ikapi katisakasi puntini, paroya ntogirasa iyeguyuguni puꞌwantawe. Piya, igeba sipisipa aribe meme aribe maema itasaenaba puma mimagini, kusi kinaꞌena puma miyuguni, wasanamiba tabe kuntuyena imima, ataena puwaitantawe.

³⁸Igeba kaꞌme mparibe amu wainta maribe wagana kana puma, yaba nkagepintibe ma agepintibe uma kakama mintantawe. We, pi kinaꞌmiba aogima imatiti puma, mampabisa kinaꞌmipa asu igasuguni igege mikenaba kampa kanarasantiye.

³⁹We, aꞌyaꞌma pi kinaꞌmiba Kotiti imatiti puguna, Koti igaogana kanarasantiye. Aibogini, igeba Koti utawaitanti ntanama nkauꞌwapa kampa maentawe. Kampaye.

⁴⁰Piya, pi nkagoba mayamawe: Koti aeba aogima againtintanaba uwa aeꞌwaratakena puntine. Eya, paisa imatiti pume kinaꞌmiba kampa paitaratama taobi puma taebe kaga aotaꞌena aborama auꞌwapa kaga maekune.