Read Fore Iburu 12 Bible Online

Iburu 12 - Fore bible

Iburu 12

¹Pigoya, pi paisa kinaꞌmiba imatitiꞌenawaipa tayakintawe. Piya, iwaga kamana tabe ibina kanta puma taenkima kobe purataye. Piya pegi, taeba aꞌyaꞌma kuntaenarepe tarakuri nkaguntaenarepe kasima, tantawamaba maema esegi puma ankagasi ankagasi puma utaratanti mpono kiꞌi karuseno.

²Eya, taowamaba Isuti agano. Aeba amatitiꞌenama nkagoba mima paitaratama tamatitiꞌenama nkauꞌwapa aborakena yagarawe. Piya, aeba aꞌmuntanabi mpikenaga napima, auki nakiyena maema yara puꞌma anintanama nkabobori asugaintiye. Piya, ibaba Koti nkaemu yabaera ayatakanti asu maraꞌmintiye. Pika napima aepa agano. Koti kuntaena tamemipa aota puratakenawe

³We, tigeba Isuka aogima ntapiyiyo. Piya, agunta pume kinaꞌmiba kama potantaka, pipa aeba asima esegi puntiye. Pika tigeba napima, tintawamaba uwasuwa puma tiyonanta puma wareꞌnasanaga, aeka napima asima esegi piyo.

⁴Piya, aguntaenaba aeguma mabi nkatakenaraka maꞌena pepa, koratipa kampa pagiye. Asugasima esegi piyo.

⁵We, Koti: Naene ntagararawe, urimima esegi puritami kamanapa ago tigeguꞌa piya, a. Pipa mayamawe:Yagaranene. Waꞌegawama parutu pugatakanapa, uwaena kantaba a-peno, iye.Piya, aeba parutu pugatakena kuntuyena kamekanapa, kantawamaba anuntanaba a-peno, iye.

⁶Eya, Waꞌegawama ka yagara agu kaoꞌena potamipa, antabaipinti parutu potakena yugaba piye, iye.Piyama ae tunkapa ababuwaitami kinapa eru kasutasa parutu puwaitaye, mono isaꞌama piya iye.

⁷Piya, Kotiba parutu puritakenaenarapa a-tiyekuru puma, asima esegi puma maeyiyo. Eya, Koti ntagarawa mpiyegana piya puritaye. We, yagarawampa aba kampa parutu potamipa, aempaye. Pipa kampaye.

⁸We, aꞌyaꞌma Koti tumpitepa parutu puratakena yugaba tantabaipi puntiye. Piya, aeba kampa parutu puritamisinta, tigeba yagarawapa kampa mima keꞌisa yagara kanta pesine.

⁹Pikaba to ka urimekiri abiyo: Mabisa tabarempagiba parutu purataga, ige igeba asagayuyune. We, taguꞌama nkaba igepa asu igasima mintika, amentapinti miyaba mima eꞌwasaenabi mpiyeno.

¹⁰Piya, mabisa tabarempagiba igewai ntapiyena aegaꞌma aro ntaganto parutu puratagana, Kotiba taoꞌmaekenaga parutu puratamika, taeba aotaꞌenawapi ubasikune.

¹¹Piya, marupa parutu puratamika tanta asoyaena kampa punta kunta pegi, aintiba parutu puratami kinaꞌmitaba paru puma arupuyenama nkauꞌwapa tayapisa aborakune. Asima esegi piyo

¹²Piya, magimagi tiyenkama nkagaꞌnawapa pakisuma yogaba esegima piyo. Tigisa puꞌwaintakiripa aebarotama asima esegi piyo.

¹³Pugage kinaꞌmi nkigisa airigiwasanaga, kepa arupu puma iyoꞌmaeyakana itawano.

¹⁴Eya, tigeba wasanaba kaga paruyenabi mpikenaga yogaba piyo. Tigeba aota kina aborama mikenaga esegi piyo. We, aotaꞌena kampa waintaiꞌnagiba Waꞌegaba kampa asu agakibewe.

¹⁵Piya, tigetisa kaꞌwainaba Koti nkawagaenawa kaisanaga aogima kabiyiyo. Piya, tikapi asa kamana aborama ata puma uwoma kinapa iꞌnintana puwaitasanaga, aogima kabiyiyo.

¹⁶Piya, Iso puntisa puma kumiyena pusanagabe Koti mpono akabitasanagabe aogima kabiyiyo. Piya, aeba amaru yagarama mpaekenaenaba aꞌnanto menkamima ka nakenaenawapa ika puntiye.

¹⁷Ika pumagina, aintiba pi nkaꞌmuntana maekena pogana Kotiba kakataogana, Isoba tabera kubeꞌena puma aguyosagaomepa, ae aꞌwae puma maekena kipa kampa waintantiye. Pipa ago abintawe. Ae puntisa pusanaga aogima kabiyiyo. Moseseti wanane, Isuti aboraune

¹⁸Pigoya, tayabamagi Sainai amuti aborama auꞌwaintaꞌenamati iya atantasa puma arirasaenariba kampa aegaꞌma aborawe. Kampaye. Piya, igetiba tabe yakupe tununtanabe ibinape antaruyenabe irari kaentiye.

¹⁹Eya, pikuriyama aga yogana, awamu aga agasiya kamana yogini, abume kinaꞌmiba: To kakema kampa abema tagigaye, untawe.

²⁰Piya, Kotiba maya untiye: Ka yagaramawo, yagamawo, pi nkamuta aya atama arakurekiripa, yaba kasutasa aeguyigina pureno, untiye. Piya yogini, pi kamanakaba iyekuru pumagini: Toba a-so, untawe.

²¹We, iyekuru puguna pintanaraka Mosesegeba: Naekuru puma tabaraba puwe, untiye.

²²Pigoya, tigeba pi nkamuti wanane. Tigeba Saiyoni amuti irosantawe. Eya, miyaba Koti mintiti ae kumati mantarasa Yerusaremi aborakenaga irasantawe. Pi kumatia enisore kina kampa aisuwaeyama kina mima iꞌmu pewe.

²³Pitaꞌi marusa yakarakiꞌnu, mantabinti igewai kaenta kinaꞌmi aki pegana, aꞌyaꞌma kinaꞌmi kamana abima pakobemi ntagara Kotiba miyegini, aota puwaitanti arupu kinaꞌmi nkimaba miyewe.

²⁴Eya, pitaꞌi Isu, aeba Kotike wasanage atarawaisitama kasa utaratanti kamanaꞌama nkauꞌwa aborakena yagara mintiye. Eya, pitaꞌi paitatanti kurankapa, Eboro kura agasima awaga yugaba aogima aboranti kurapa waintiye. We, pi kumati aborakenaga aota kina irosantawe. Koti unti kamanapa aogima kabiyeno

²⁵Pigoya, taga kamana urimintiꞌnapa tikaꞌintaesi pusanaga kabima miyiyo. Piya, paitakaꞌya mabi Mosese aeba esegi kamana uwaitaogini, akayuyuguna Kotiba ata antotaꞌena imogini kampa kakama mintantawe. We, Kotiba mantabintisa esegi kamana uramintegi, takaꞌintaesi potaompeka antotaꞌena tamemipa kampa kakama mikune.

²⁶Piya, paipa Koti nkawamuꞌama mampaba imimapa puntiye. Piya puntana aeba to ka maya uramintiye: Naeba to ka yagaba ma abiba kampaye. Mantabe mabe kaga asari pukuwe, untiye.

²⁷Pi kamanapa: To ka yagaba, uma piyama tayakiye: Aꞌyaꞌmaena pumarantintanaba asari puma aebasanakana, to kaꞌisa kampa asari pukenaenaba uwa waikiye.

²⁸Piya, kabiratakenaena maekubompeka taꞌmu peno. Pipa kampa asari pukenaenawe. Eya, pika Kotiti taꞌmu potamagi, aeꞌwa nkabemintana puma agegaꞌe asagayuma aeka taekuru peno.

²⁹Pipa nanagawe: Kotirempa aeba yaku tawaewakenaenama nkagowe.