Read Fore Iburu 13 Bible Online

Iburu 13 - Fore bible

Iburu 13

¹Pigoya, tigeba mono kinatawa, tiyoꞌmipa timaba imiyaba miyiyo.

²Tigeba naꞌmu kina a-tiyogapa agagasima kayone puwaitaiyo. We, paipa kaꞌisa kinaꞌmiba pabiyama wasanawema napimagini, enisore kinapa kayone puwaitama ibabuntawe.

³Tigeba igaꞌnabi mpinta kinaꞌmikaba aogima napintiri, tiba puritasuma napima iyoꞌmaeyiyo. Piya pumagiri, tigeba iꞌwaita kuntaena maeya kinaꞌmikaba napintiri, kaga wasanarawema napima iyoꞌmaeyiyo.

⁴Pigoya, ibaꞌena pukenaenaba kanaraꞌenawe. Pipa asagayuntiri, iꞌnintana potasanaga kabima mima kumiyenaba a-piyo. Eya, kumiyena pe kinape kupiyona pe kinape Kotiba ata ikapa imikiye.

⁵Tigeba mone kutakaba asi nasi maekenagaba a-ntapiyiyo. Wairitanti nkawameta maema uwa miyiyo. Piya, Kotiba maya uramintiye: Naeba kaege ampima kampa nakabikatama kamparakaꞌya katakuwe, untiye.

⁶Eya, taeba pika napima tara tagi kampa napinta, mayama esegima seno:Waꞌega aeba naoꞌmaenta yagara mintemika, kampa naekuruba pukuwe, yeno.Piya, wasanamiba igeꞌwai ntapiyenabisaba nana punatakibewe. Pipa kampaye, taeba yeno. Paisa monoꞌama nkawameta aegaraune

⁷Pigoya, tigeba Koti kamana uriminta paitaritanta kinatimpikaba napiyiyo. Eya, mono kita nasi nasiyenawaimpa nkagowapa agama imatiti pesa piyo.

⁸Piya, Isu Karaisiti aeba aibe ibabe aꞌyaꞌma yagabe kaꞌyaga miyemisa puma miyabane.

⁹Piya, tonarona kasa kamanaꞌama ampa tibaibusanaga kabiyiyo. Piya: Pipa nao, pipa a-ntao, kamana wasiye kinaꞌmiba pintanarasaba esegiyenaba kampa maeyawe. Kampaye. We, tigeba Kotitisa awagaena maeyaka tigupa esegi pukibewe.

¹⁰Pigoya, taetiba aota arata yare awameta Karaisitiba mintiye. Piya, paisa seri namapisa mono wasiye kinaꞌmiba aota aratarasaba nakenaba kampa maeyawe.

¹¹Piya, monota paitanta kiyema yagama kurapa maete seri nama nkaota marupintiba ima, aguntaena maegaikena muta atabuntiye. Piya puntana, yagama nkauꞌwapa abeꞌi yakupi tumpa kaegasi puntiye.

¹²Piya pumagina, Isuba abeꞌi kagisa awari auki nakiyenaba maema aeꞌwa kurankatasa aota puratakena puntiye.

¹³Piya, taegeba kuma abeꞌi wasu puma aeti atokaema ae kuntu yugabi ubaseno.

¹⁴Eya, mampabipa waiyaba kumaꞌamaba kampa taeti waiyegi, taeba taga kuma aborakibika aobi pune.

¹⁵Pigoya, pika aeti atokaema Kotiti taꞌmu potakena muta atano. Eya, agewapa maete ima tawamuꞌama nkauꞌwapa muta atano.

¹⁶Piya, aogiyena pukenaenabe titasaenarasa tiyoꞌmipa iyoꞌmaekenaenabe, uwasuwaba a-piyo. Piya puma iyoꞌmaekibepa, tigeba Kotiti muta ataiginaba aꞌmu pukiye.

¹⁷Pigoya, paitaritanta kinatimpi imentapinti mima kamanaꞌwaipa wasiyiyo. Piya, igeba aintiba Kotita uma aborama yogawaimpa nkawaga kamanapa omikenaga tigupipa kabiwaitawe. Aibigiripa, tigeba kamanaꞌwaipa aegaꞌma wasiyiyo. Wasikibepa, igeba iꞌmuntanabisa aogima kabiritakibewe. Aꞌyugu intawama kuntaꞌyaga kabiritantiniba, kampa aogima tiyoꞌmaekibewe. Nagarikena kamanane

¹⁸Pigoya, tigeba Kotiti nunamu yigina taoꞌmaeyano. Piya, taeba aꞌyaꞌma yaga arupu puma nasikenaenareka Koti nkaobi kamanatepa kampa waintiyema, napiyune.

¹⁹Eya, nunamurasa naoꞌmaeyigi, Koti naoꞌmaeyakapa tigeti karuꞌena to kake ampa aborakuwema, esegima urimuwe.

²⁰Pigoya, Waꞌegare Isu aeba yagawampate tabe kiyerene. Isuba atokaeratayaba mikenaga purogana, paru Koti aeba purintapisa asitantiye.

²¹Tigeba aeꞌwa ntapiyena aegarakenaga, asitanti Kotiba aogiyenarasa paitaritama tiyoꞌmaeyano. Eya, Isu Karaisiti ntugarasa ae aobi kanarasantintana tagupipa aꞌyaꞌma aborano. Ae agegaꞌeba asagayuyaba miyeno. Tagane.

²²We, naoꞌmitaba, naeba aro kamana kaema urimekiripa, esegi kamanaꞌnepa abigina ataba a-peno.

²³Pigoya, taoꞌyagara Timotika urimekiri abiyo. Aepa igaꞌnabisaba ago akariyoba atakana, agaro kanakapa ababurekara tigeti wakuse.

²⁴Pigoya, aꞌyaꞌma paitaritanta kinatimpibe aꞌyaꞌma Kotiti atokaenta kinaꞌmibe, taetisaba: Aya pewe, uwaimiyo. Piya, Itari marisa kinaꞌmiba kaga: Aya pewe, yewe.

²⁵Pigoya, Koti nkawagaenawapa aꞌyaꞌma kinaꞌmititi waima waiyeno.