Read Fore Iburu 2 Bible Online

Iburu 2 - Fore bible

Iburu 2

¹Piya pegi, pi abintompe kamana uwasuwa pusanaga, taeba napiyenaretapa arakuꞌma upebe puma aegarano.

²Piya, Kotiba kamanaꞌwapa enisore kinaꞌmi nkiwamuta umarantegina, pi kamanaꞌamaba waima esegi puntiye. Kana kamanaꞌamaba aꞌyaꞌma aibasanaꞌma aemita punta kinape kamana akayunta kinape ata ikankaipa antotapa maentawa, taewariye.

³We, aogima tauꞌikena aboraratantintanaga taekita pompepa, aya pumabaya ataenabisaba taegakapa wagaikune. Pipa kamparakaꞌyane. Pigoya, Waꞌegawama aewa pi tauꞌikena kamanapa maru uma aboraratantegini, ae kamana abinta kinaꞌmiba kaga taeti ago ampa aborantawe.

⁴Ampa aborauguna, Kotiba agowa abompeka iyapisa tonarona aboraogini, igeba awameꞌenabe kasaꞌenabe toma toma esegiyenabe aborantini, Aota Awamusaꞌama nkabemika ka ka imogini tonarona aꞌmu ntuga aborantawe. Isu aeba tauꞌikena aiꞌnerakaꞌyane

⁵Piya, aborakibi mpaga kamanapa yune. Pi mpa kabiyiyomaba, enisore kinapa Kotiba kampa uwaitantiye. Pipa kampaye.

⁶Pika ka yagarama mono isapi mayama ka aukaꞌi Kotipa omintiye:Wasanaba nanagana kaeba napiyene. Wasanama Ntagaraba nanagana aepa kabitanema, untiye, iye.

⁷Piya, arontaganto enisore kinaꞌmi nkimentapinti kaeba aepa atamagina, to kake aꞌwae puma aba puma au maete ima agegaꞌeba asagayuma,

⁸aꞌyaꞌmaenaba ae agisa amentapinti aki pekana waiyegina aeba kabiye, untiye, iye. Eya, Kotiba pi ntagarama nkamentapinti aꞌyaꞌmaenaba waiyenema otantana, kaꞌisaenaba uwaba kampa waiyenema otantiye. We, aꞌyaꞌmaena pi ntagarama nkamentapinti waiyemaba ibaba taobisaba kampa agaune.

⁹Piya, to kapa agaune: Isupa enisore kinaꞌmi nkimentanti arontaganto otaogana, tumpimagina Koti nkawagaenawa mpaema aꞌyaꞌma kinaꞌmiteka purintiye. Aeba auki nakiyena puma purogana asitama au maete ima ageba asagayuntiye. Piꞌna nkagoba ago agaune.

¹⁰Pigoya, Kotiba aꞌyaꞌwaemaenama nkagogana pumaꞌma mintiye. Piya, aeba otaogana Isu puꞌmagina auki nakiyenawatasa tauꞌima paitakena yagara aota mikena agegaꞌeba maeyogana, Kotiba uwoma araga yagara ibabute eꞌwasaenawapi ubasintiye. Pintanaba aeba arupuyenarakaꞌya puntiye.

¹¹Piya, aota puratakena yagarabe, aota puratami kinape, ka aukaꞌisa aboraune. Piya pokana, aeba taeka ani pusanaga kampa napima: Naꞌnatabararawe, uramiye.

¹²Pika mono isapi maya untiye:We, Koti, naeba kae kagegaꞌeba naꞌnatabaraba uwaimukuwe, iye.Eya, naeba monota aiꞌaru pe kinaꞌmi nkikapi kagegaꞌeba asagayukuwe, untiye, iye.

¹³Piya, aeba to ka maya untiye:Naeba Kotiti namatiti potakuwe, untiye, iye. Pigoya, pika to ka maya untiye:Kaeba nagaka, naeba mataꞌi mima aꞌyaꞌma yagaraba Koti namemiꞌnagigeba kaga miyompene, untiye, iye. Isu wasanarakaꞌya aborama taoꞌmaentiye

¹⁴Pigoya, Koti ntagarakiꞌnu taeba wasana mintokana, Isuba tae kanta puma aborantiye. Eya, tae kanta puma aboramagina, purikenama nkagoba aegugaikenaga puꞌma asintiye. Piꞌna nkagoba kewamawe.

¹⁵Piya, aꞌyaꞌma purikenaenaga taekuru pompe kinaꞌmiba aꞌyaꞌma yaga kewama igaꞌna purataginaba, Isu aepa aegugasimagina pi nkigaꞌnabisa akariyobatatakenaga puꞌma asintiye.

¹⁶We, tagane. Aeba enisore kinaꞌmikaba aeꞌwa ntuga kampa puma iyoꞌmaentiye. Pipa kampaye. Aeba Abaraꞌamu tumpi ntuga puma iyoꞌmaentiye.

¹⁷Piya, aꞌnatabara iyoꞌmaekenaga aeba kaꞌmasa puma aborantine. Piya, aeba monota paitanta kiye yagara ampima, Koti ntuga puma arupu puma antara puratama, wawayaꞌmite nkaguntaenarempa nkantota ika puratakenaga, aꞌnatabaramige kaꞌmasa puma aborantine.

¹⁸Piya, auki nakiyenabe amiyoꞌenabe aeti aboramogana aeba asu againtemika, taepa pabiyama tamiyoꞌena aborarameginaba kanara taoꞌmaeye.