Read Fore Iburu 3 Bible Online

Iburu 3 - Fore bible

Iburu 3

¹Pigoya, aota naoꞌmitaba, mantabi ubasikibe kinaꞌmitaba, tigeba Isugaba aogima napiyiyo. Aeba tamatitiꞌenama nkagowama tabe aposorobe monota paitanta kiye yagararepe mima, Koti nkawamupa aogima wasintiye.

²Piya, Kotiba pi ntugaraka otaogana, pai Mosese Koti nkawamu wasima Koti nkaokinaꞌmi kayokayaꞌena puntisa puma, Isuba Koti nkawamupa aogima wasima yogawapa puntiye.

³Eya, nama kiyi ntagarama nkagewamaba pi ntamankama nkageba asu agasisa puma, Koti nkaobipa Isu nkagewamaba Mosese nkageba asu againtiye.

⁴Piya, namapa wasanami nkiyapisa aborantegina, we, aꞌyaꞌwaemaena aboranti ntagaraba Kotiwe.

⁵Piya, Moseseba aeba Koti nkawamu wasima Koti nkaokinapa kabima mima, ainti aborakibintanaga awaga kamana umagina, aeba kayokaya yagaragana mintantiye.

⁶We, Karaisitiba Koti nkawamu wasima Koti nkaokinapa kabima mimagina, aeba Koti Ntagaragana mintiye. Piya, taeba aꞌyaꞌma yaga esegima aegaꞌma Kotiti atokaekenaga taꞌmu puntapa, taeba Koti nkaokina mima namantanawapa pukune. Isureyo kinaꞌmiba ata puntasapa a-piyo

⁷Pigoya, pika Aota Awamuasꞌama maya untiye:Ibaba, tigeba Koti kamana abintiripa, aogima abiyo, iye.

⁸Eya, Isureyo kinaꞌmiba kaꞌme mpari mima Koti amiyoꞌena potama ago kamana akayumagini, igu akunintasa piyaba a-piyo, iye.

⁹Eya, kaꞌme mpari tiyabamagiba 40-wa kabuba mima nae puwantanaba agantiniba namiyo puntane, iye.

¹⁰Piya pugu, naeba igama pi kinaꞌmika namoꞌenaba puma maya yuwe: Iguꞌamaba aꞌyaꞌma yagaba kepa agasima antageꞌena pumagini, nae kipa kampa agama nasewe, yuwe, iye.

¹¹Piya, igeka namoꞌena puwaitamagi, mayama esegima yuwe: Igeba migarakenaenanetiba kampa ubasikibewe, yuwe, untiye, iye.

¹²We, naoꞌmitaba, tigeba aogima kabiyiyo. Aꞌyugu tikapisa kaꞌwainaba antabinti aguntaena puma amatitiꞌenawa kaite, miyaba Koti akaꞌintaesi potasanaga, aogima kabiyiyo.

¹³We: Ibawe, untipa ma ntagawe. Piya, ibasa yagaba aguntaenama tikapisa kaꞌwaina nkao airarikaeyakana antaba akunisanaga, tigeba kabima mima aꞌyaꞌma yaga tiyoꞌmipa aogi kamana uwaimigini, napiyenawaipa igegano.

¹⁴Piya, pai tamatiti puntompentana to esegi puma mirite wama nagariyeka, Karaisitintanabi ubasikune.

¹⁵Eya, ibasa yagaga mono isaꞌamaba maya iye:Ibaba, tigeba Koti kamana abintiripa, aogima abiyo, iye.Eya, Isureyo kinaꞌmiba Koti nkago kamana akayumagini, igu akunintasa piyaba a-piyo, untiye, iye.

¹⁶Pigoya, aya pume kinaꞌmi Koti kamana abima ataena puma akayuntawe. Pipa Moseseba wawaya iba purite Isipi maba agaite waume kinaꞌmi, ige akayuntawe.

¹⁷Eya, aya pume kinaꞌmi kamana akayuguna Koti 40-wa kabuba amoꞌenaba puwaitantiye. Pipa wawayaꞌmi aguntaena pume kinaꞌmika Kotiba amoꞌenaba puwaitantegini, iꞌwaipa kaꞌme mpari wareꞌnawaewantawe.

¹⁸Aya pume kinaꞌmika Kotiba: Igeba migarakenaenanetiba kampa ubasikibeweba, untiye. Pipa wawayaꞌmi kamanaꞌwa akayuye kinaꞌmika untiye.

¹⁹Piꞌna nkagoba taeba abune. Kampa imatiti peꞌnagiba, igeba Koti mpigarakenaenawatiba kampa ubasikibewe.